[377] Yo ve piyaṁ meti piyānurakkhī
attaṁ niraṅkatva 2 piyāni sevati
soṇḍova pitvā visamissathālaṁ 3
teneva so hoti dukkhī parattha.
Yo cīdha saṅkhāya piyāni hitvā
kicchenapi sevati ariyadhamme
dukkhitova pitvāna yathosadhāni
teneva so hoti sukhī parattha.

[378] Ohāyahaṁ pitaraṁ mātarañca
manāpike kāmaguṇepi 4 pañca
etassa hetumhi vanaṁ paviṭṭho
tante varaṁ kintimahaṁ dadāmi.

[379] Na paṇḍitā diguṇamāhu vākyaṁ
saccappaṭiññāva bhavanti santo
varassu samma iti maṁ avoca
iccābravī tvaṁ na hi te sameti.
1 Ma. ca. 2 Ma. niraṅkacca. 3 Ma. visamissapānaṁ. 4 Ma. manāpiye kāmaguṇe ca.

[380] Apuññalābhaṁ ayasaṁ akittiṁ
pāpaṁ bahuṁ duccaritaṁ kilesaṁ
manussamaṁsassa bhavo 1 upāgā
tante varaṁ kintimahaṁ dadeyyaṁ.

[381] Na taṁ varaṁ arahati jantu dātuṁ
yaṁ vāpi datvā na avākareyya
varassu samma avikampamāno
pāṇaṁ cajitvānapi dassameva.

[382] Pāṇaṁ cajanti satānesa dhammo 2
saccappaṭiññāva bhavanti santo
datvā varaṁ khippamavākarohi
etena sampajja surājaseṭṭha.
Caje dhanaṁ 3 aṅgavarassa hetu
aṅgaṁ caje jīvitaṁ rakkhamāno
aṅgaṁ dhanaṁ jīvitañcāpi sabbaṁ
caje naro dhammamanussaranto.

[383] Yasmā hi dhammaṁ puriso vijaññā
ye cassa kaṅkhaṁ vinayanti santo
tañhissa dīpañca parāyanañca
1 Ma. kate. 2 Ma. pāṇaṁ cajanti santo nāpi dhammaṁ. 3 Sī. dhanaṁ caje.
Na tena mettiṁ jirayetha pañño.

[384] Addhā hi so bhakkho mama manāpo
etassa hetumhi vanaṁ paviṭṭho
sace ca maṁ yācasi etamatthaṁ
etaṁpi te samma varaṁ dadāmi.

[385] Satthā ca me hosi sakhā ca mesi
vacanaṁpi te samma ahaṁ akāsiṁ
tvaṁpi me samma karohi vākyaṁ
ubhopi gantvāna pamocayāma.

[386] Satthā ca te homi sakhā ca tyamhi
vacanaṁpi me samma tuvaṁ akāsi
ahaṁpi te samma karomi vākyaṁ
ubhopi gantvāna pamocayāma.