[97] Abhūti tassa bho hoti yo anicchantamicchati
akāmaṁ rāja kāmehi 1 akanto kantamicchasi 2 .

[98] Akāmaṁ vā sakāmaṁ vā yo naro labhate piyaṁ
lābhamettha pasaṁsāma alābho tattha pāpako.

[99] Pāsāṇasāraṁ khaṇasi kaṇikārassa dārunā
vātaṁ jālena bādhesi yo anicchantamicchasi.

[100] Pāsāṇo nūna te hadaye ohito mudulakkhaṇe
yo te sātaṁ na vindāmi tirojanapadāgato.
Yadā maṁ bhakuṭiṁ 3 katvā rājaputtī udikkhati 4
āḷāriko tadā homi rañño maddassantepure 5 .
Yadā umhayamānā maṁ rājaputtī udikkhati 4
nāḷāriko tadā homi rājā homi tadā kuso.

[101] Sace hi vacanaṁ saccaṁ nemittānaṁ bhavissati
neva me tvaṁ patī assa kāmaṁ chindantu sattadhā.

[102] Sace hi vacanaṁ saccaṁ aññesaṁ yadi vā mamaṁ
neva tuyhaṁ patī atthi añño sīhassarā kusā.

[103] Nekkhaṁ gīvaṁ te kāressaṁ patvā khujje kusāvatiṁ
sace maṁ nāganāsūruṁ olokeyya pabhāvatī.
1 Ma. kāmesi. 2 Ma. akantaṁ kantumicchasi. 3 Sī. Yu. bhūkuṭiṁ. 4 Sī. Yu.
rājaputti adikkhasi. 5 Sī. Yu. maddassa thīpure.
Nekkhaṁ gīvaṁ te kāressaṁ patvā khujje kusāvatiṁ
sace maṁ nāganāsūruṁ ālapeyya pabhāvatī.
Nekkhaṁ gīvaṁ te kāressaṁ patvā khujje kusāvatiṁ
sace maṁ nāganāsūruṁ umhāyeyya pabhāvatī.
Nekkhaṁ gīvaṁ te kāressaṁ patvā khujje kusāvatiṁ
sace maṁ nāganāsūruṁ pamhāyeyya pabhāvatī.
Nekkhaṁ gīvaṁ te kāressaṁ patvā khujje kusāvatiṁ
sace maṁ nāganāsūruṁ pāṇībhi upasaṁphuse.

[104] Na hi nūnāyaṁ rājaputtī kuse sātaṁpi vindati
āḷārike bhate pose vettanena anatthike.

[105] Na hi nūna ayaṁ khujjā labhati jivhāya chedanaṁ
sunisitena satthena evaṁ dubbhāsitaṁ bhaṇaṁ.

[106] Mā naṁ rūpena pāmesi ārohena pabhāvatī
mahāyasoti katvāna karassu rucire piyaṁ.
Mā naṁ rūpena pāmesi ārohena pabhāvatī 1
mahaddhanoti katvāna karassu rucire piyaṁ.
Mā naṁ rūpena pāmesi ārohena pabhāvatī
mahabbaloti katvāna karassu rucire piyaṁ.
Mā naṁ rūpena pāmesi ārohena pabhāvatī
mahāraṭṭhoti katvāna karassu rucire piyaṁ.
1 Yu. pabhāvati. ito paraṁ īdisameva.
Mā naṁ rūpena pāmesi ārohena pabhāvatī
mahārājāti katvāna karassu rucire piyaṁ.
Mā naṁ rūpena pāmesi ārohena pabhāvatī
sīhassaroti katvāna karassu rucire piyaṁ.
Mā naṁ rūpena pāmesi ārohena pabhāvatī
vaggussaroti katvāna karassu rucire piyaṁ.
Mā naṁ rūpena pāmesi ārohena pabhāvatī
bindussaroti katvāna karassu rucire piyaṁ.
Mā naṁ rūpena pāmesi ārohena pabhāvatī
mañjussaroti katvāna karassu rucire piyaṁ.
Mā naṁ rūpena pāmesi ārohena pabhāvatī
madhurassaroti 1 katvāna karassu rucire piyaṁ.
Mā naṁ rūpena pāmesi ārohena pabhāvatī
satasippoti katvāna karassu rucire piyaṁ.
Mā naṁ rūpena pāmesi ārohena pabhāvatī
khattiyotipi katvāna karassu rucire piyaṁ.
Mā naṁ rūpena pāmesi ārohena pabhāvatī
kusarājāti katvāna karassu rucire piyaṁ.