[67] Katarasmiṁ so janapade raṭṭhesu nigamesu ca
kattha soṇakamaddakkhi 4 taṁ me akkhāhi pucchito.

[68] Taveva deva vijite tavevuyyānabhūmiyā
ujuvaṁsā mahāsālā nīlobhāsā manoramā.
Tiṭṭhanti meghasamānā rammā aññoññanissitā
tesaṁ mūlasmi soṇako jhāyati anupādino
upādānesu lokesu ḍayhamānesu nibbuto.

[69] Tato ca rājā pāyāsi senāya caturaṅgiyā
kārāpetvā samaṁ maggaṁ agamā yena soṇako.
Uyyānabhūmiṁ gantvāna vicaranto brahāvane
1-2 Sī. Yu. daṭṭhu-. 3 Sī. Yu. ayaṁ pāṭho natthi. 4 Sī. Yu. kattha te soṇako
diṭṭho.
Āsīnaṁ soṇakaṁ dakkhi ḍayhamānesu nibbutaṁ.

[70] Kapaṇo vatāyaṁ 1 bhikkhu muṇḍo saṅghāṭipāruto
amātiko apitiko rukkhamūlasmi jhāyati.

[71] Imaṁ vākyaṁ nisāmetvā soṇako etadabravi
na rāja kapaṇo hoti dhammaṁ kāyena phassayaṁ.
Yodha 2 dhammaṁ niraṅkatvā adhammaṁ anuvattati
sa rāja kapaṇo hoti pāpo pāpaparāyano.

[72] Arindamoti me nāmaṁ kāsirājāti maṁ vidū
kacci bhoto sukhaseyyā idha pattassa soṇaka.

[73] Sadāpi bhadramadhanassa anāgārassa bhikkhuno
na tesaṁ koṭṭhe openti na kumbhe na kaḷopiyā
pariniṭṭhitamesānā tena yāpenti subbatā.
Dutiyampi bhadramadhanassa anāgārassa bhikkhuno
anavajjapiṇḍo bhottabbo na ca kocūparodhati.
Tatiyampi bhadramadhanassa anāgārassa bhikkhuno
nibbuto piṇḍo bhottabbo na ca kocūparodhati.
Catutthampi bhadramadhanassa anāgārassa bhikkhuno
muttassa raṭṭhe carato saṅgo yassa na vijjati.
Pañcamampi bhadramadhanassa anāgārassa bhikkhuno
nagaramhi ḍayhamānamhi nāssa kiñci aḍayhatha.
1 Ma. vatayaṁ. 2 Ma. yo ca.
Chaṭṭhampi bhadramadhanassa anāgārassa bhikkhuno
raṭṭhe vilumpamānamhi nāssa kañci ahāratha 1 .
Sattamampi bhadramadhanassa anāgārassa bhikkhuno
corehi rakkhitaṁ maggaṁ ye caññe paripanthikā
pattacīvaramādāya sotthiṁ gacchati subbato.
Aṭṭhamampi bhadramadhanassa anāgārassa bhikkhuno
yaṁ yaṁ disaṁ pakkamati anapekkhova gacchati.

[74] Bahūpi bhadrā etesaṁ 2 yo tvaṁ bhikkhu pasaṁsasi
ahañca giddho kāmesu kathaṁ kāhāmi soṇaka.
Piyā me mānusā kāmā atho dibyāpi me piyā
atha kena nu vaṇṇena ubho loke labhāmase.

[75] Kāme 3 giddhā kāmaratā kāmesu adhimucchitā
narā pāpāni katvāna upapajjanti duggatiṁ.
Ye ca kāme pahantvāna 4 nikkhantā akutobhayā
ekodibhāvādhigatā na te gacchanti duggatiṁ.
Upamante karissāmi taṁ suṇohi arindama
upamāya midhekacce 5 atthaṁ jānanti paṇḍitā.
Gaṅgāya kuṇapaṁ divā vuyhamānaṁ mahaṇṇave
vāyaso samacintesi appapañño acetaso.
1 Ma. ahīratha. 2 Sī. bahūni samaṇabhadrāni. Yu. bahūpi bhadrakā ete.
3 Sī. Yu. kāmesu. 4 Sī. Yu. pahatvāna. 5 Sī. Yu. pidhekacce.
Yānañca vatidaṁ laddhaṁ bhakkho cāyaṁ anappako
tattha rattiṁ tattha divā tattheva nirato mano.
Khādaṁ nāgassa maṁsāni pivaṁ bhāgīrasodakaṁ
sampassaṁ vanacetyāni na palettha vihaṅgamo.
Tañca otaraṇī gaṅgā pamattaṁ kuṇape rataṁ
samuddaṁ ajjhagāhāsi agatī yattha pakkhinaṁ.
So ca bhakkhaparikkhīṇo udapatvā 1 vihaṅgamo
na pacchato na purato nuttaraṁ nopi dakkhiṇaṁ.
Dīpaṁ so najjhagā gañchi agatī yattha pakkhinaṁ
so ca tattheva pāpattha yathā dubbalako tathā.
Tañca sāmuddikā macchā kumbhīlā makarā susū
pasayhakārā khādiṁsu phandamānaṁ vipakkhikaṁ 2 .
Evameva tuvaṁ rāja ye caññe kāmabhogino
giddhā ce na vamissanti kākapaññāya 3 te vidū.
Esā te upamā rāja atthasandassanī katā
tvañca paññāyase tena yadi kāhasi vā na vā.

[76] Ekavācaṁpi dvivācaṁ bhaṇeyya anukampako
tatuttariṁ na bhāseyya dāso vayyassa 4 santike.