[47] Āhuneyyo mesi hitānukampī
dhātā vidhātā casi kāmapālo
tayī hutā rāja mahapphalā hi 2
kāmena me ummādantiṁ paṭiccha.

[48] Addhā hi sabbaṁ abhipāraka tuvaṁ
dhammaṁ acārī mama kattuputta
añño nu te ko idha sotthikattā
dvipado naro aruṇe jīvaloke.

[49] Tvaṁ nu seṭṭho tvamanuttarosi
tvaṁ dhammagū dhammavidū sumedho
so dhammagutto cirameva jīva
1 Ma. na hetadhammaṁ. 2 Yu. mahapphalā hi me.
Dhammañca me desaya dhammapāla.

[50] Tadiṅgha abhipāraka suṇohi vacanaṁ mama
dhammante desayissāmi sataṁ āsevitaṁ ahaṁ.
Sādhu dhammarucī rājā sādhu paññāṇavā naro
sādhu mittānamaddubbho pāpassākaraṇaṁ sukhaṁ.
Akkodhanassa vijite ṭhitadhammassa rājino
sukhaṁ manussā āsetha sītacchāyāya saṅghare.
Na cāhametaṁ abhirocayāmi
kammaṁ asamekkhakataṁ asādhu
yevāpi ñatvāna sayaṁ karonti
upamā imā mayha tuvaṁ suṇohi.
Gavañce taramānānaṁ jimhaṁ gacchati puṅgavo
sabbā tā jimhaṁ gacchanti nette jimhaṁ gate sati.
Evameva manussesu yo hoti seṭṭhasammato
so ce adhammaṁ carati pageva itarā pajā
sabbaṁ raṭṭhaṁ dukkhaṁ seti rājā ce hoti adhammiko.
Gavañce taramānānaṁ ujuṁ gacchati puṅgavo
sabbā tā ujuṁ gacchanti nette ujuṁ gate sati.
Evameva manussesu yo hoti seṭṭhasammato
so cepi 1 dhammaṁ carati pageva itarā pajā
1 Ma. sace.
Sabbaṁ raṭṭhaṁ sukhaṁ seti rājā ce hoti dhammiko.
Na cāpāhaṁ adhammena amarattamabhipatthaye
imaṁ vā paṭhaviṁ sabbaṁ vijetuṁ abhipāraka.
Yañhi kiñci manussesu ratanaṁ idha vijjati
gāvo dāso hiraññañca vatthiyaṁ haricandanaṁ.
Assitthiyo ca ratanaṁ maṇikañca
yañcāpime candasuriyā abhipālayanti
na tassa hetu visamaṁ careyya
majjhe sivīnaṁ usabhosmi jāto.
Netā hitā 1 uggato raṭṭhapālo
dhammaṁ sivīnaṁ apacāyamāno
so dhammamevānuvicintayanto
tasmā sake cittavase na vatto.

[51] Addhā tuvaṁ mahārāja niccaṁ abyasanaṁ sivaṁ
karissasi ciraṁ rajjaṁ paññā hi tava tādisī.
Etante anumodāma yaṁ dhammaṁ nappamajjasi
dhammaṁ pamajja khattiyo raṭṭhā 2 cavati issaro.
Dhammañcara 3 mahārāja mātāpitūsu khattiya
idha dhammaṁ caritvāna rāja saggaṁ gamissasi.
Dhammañcara mahārāja puttadāresu khattiya
1 Yu. pitā. 2 Sī. ṭhānā. 3 Ma. sabbattha dhammaṁ care....
Idha dhammaṁ caritvāna rāja saggaṁ gamissasi.
Dhammañcara mahārāja mittāmaccesu khattiya
idha dhammaṁ caritvāna rāja saggaṁ gamissasi.
Dhammañcara mahārāja vāhanesu balesu ca
idha dhammaṁ caritvāna rāja saggaṁ gamissasi.
Dhammañcara mahārāja gāmesu nigamesu ca
idha dhammaṁ caritvāna rāja saggaṁ gamissasi.
Dhammañcara mahārāja raṭṭhesu janapadesu ca
idha dhammaṁ caritvāna rāja saggaṁ gamissasi.
Dhammañcara mahārāja samaṇe brāhmaṇesu ca
idha dhammaṁ caritvāna rāja saggaṁ gamissasi.
Dhammañcara mahārāja migapakkhīsu khattiya
idha dhammaṁ caritvāna rāja saggaṁ gamissasi.
Dhammañcara mahārāja dhammo ciṇṇo sukhāvaho
idha dhammaṁ caritvāna rāja saggaṁ gamissasi.
Dhammañcara mahārāja indā devā sabrahmakā
suciṇṇena divaṁ pattā mā dhammaṁ rāja pāmadoti.
Ummādantījātakaṁ dutiyaṁ.
---------
3 Mahābodhijātakaṁ

[52] Kinnu daṇḍaṁ kimājinaṁ kiṁ chattaṁ kiṁ upāhanaṁ
kiṁ aṅkusañca pattañca saṅghāṭiñcāpi brāhmaṇa
taramānarūpo gaṇhāsi kinnu patthayase disaṁ.

[53] Dvādasetāni vassāni vasitāni tavantike
nābhijānāmi soṇena piṅgalenābhikūjitaṁ.
Svāyaṁ dittova nadati sukkadāṭhaṁ vidaṁsayaṁ
tava sutvā sabhariyassa vītasaddhassa maṁ pati.

[54] Ahu esa kato doso yathā bhāsasi brāhmaṇa
esa bhiyyo pasīdāmi vasa brāhmaṇa mā gamā.

[55] Sabbaseto pure āsi tatopi sabalo ahu
sabbalohitakodāni kālo pakkamituṁ mama.
Abbhantaraṁ pure āsi tato majjhe tato bahi
purā niddhamanā hoti sayameva vajāmahaṁ.
Vītasaddhaṁ na seveyya udapānaṁvanodakaṁ
sacepi naṁ anukhaṇe vārikaddamagandhikaṁ.
Pasannameva seveyya appasannaṁ vivajjaye
pasannaṁ payirupāseyya rahadaṁvudakatthiko.
Bhaje bhajantaṁ purisaṁ abhajantaṁ na bhajjaye
asappurisadhammo so yo bhajantaṁ na bhajjati.
Yo bhajantaṁ na bhajati sevamānaṁ na sevati
save manussapāpiṭṭho migo sākhassito yathā.
Accābhikkhaṇasaṁsaggā asamo saraṇena ca
etena mittā jīranti akāle yācanāya ca.
Tasmā nābhikkhaṇaṁ gacche na ca gacche cirāciraṁ
kālena yācaṁ yāceyya evaṁ mittā na jirare 1 .
Aticiraṁ nivāsena piyo bhavati appiyo
āmanta kho taṁ gacchāma purā te homa appiyā.

[56] Evaṁ ce yācamānānaṁ añjaliṁ nāvabujjhasi
paricārikānaṁ sattānaṁ 2 vacanaṁ na karosi no
evantaṁ abhiyācāma puna kayirāsi pariyāyaṁ.