[2277] Sīhā ca byagghā ca athopi dīpiyo
pasayha khādanti viphandamānaṁ
na maccuno khāditumussahanti
tamme matī hoti carāmi dhammaṁ.

[2278] Māyākārā raṅgamajjhe karontā
mohenti cakkhūni janassa tāvade
na maccuno mohayitumussahanti
tamme matī hoti carāmi dhammaṁ.

[2279] Āsīvisā kuppitā uggatejā
ḍaṁsanti mārentipi te manusse
na maccuno ḍaṁsitumussahanti
tamme matī hoti carāmi dhammaṁ.

[2280] Āsīvisā kuppitā yaṁ ḍaṁsanti
tikicchakā tesa visaṁ hananti
na maccuno daṭṭhavisaṁ hananti
tamme matī hoti carāmi dhammaṁ.

[2281] Dhammantarī vettaruṇo 1 ca bhojo
1 Ma. vettaraṇī. Sī. Yu. vetaraṇī.
Visāni hantvāna bhujaṅgamānaṁ
suyyanti te kālakatā tatheva
tamme matī hoti carāmi dhammaṁ.

[2282] Vijjādharā ghoramadhīyamānā
adassanaṁ osadhebhi vajanti
na maccurājassa vajanti adassanaṁ
tamme matī hoti carāmi dhammaṁ.

[2283] Dhammo have rakkhati dhammacāriṁ
dhammo suciṇṇo sukhamāvahāti
esānisaṁso dhamme suciṇṇe
na duggatiṁ gacchati dhammacārī.

[2284] Nahi dhammo adhammo ca ubho samavipākino
adhammo nirayaṁ neti dhammo pāpeti suggatinti.
Ayogharajātakaṁ cuddasamaṁ.
Tassuddānaṁ
mātaṅga sambhūta sīvi sirimanto
rohana haṁsa sattigumbo bhallātiya
somanassa campeyya brahma pañca-
paṇḍita cirassaṁvata ayogharāti.
Vīsatinipātaṁ niṭṭhitaṁ.
Tiṁsatinipātajātakaṁ
1 kiṁchandajātakaṁ

[2285] Kiṁchando kimadhippāyo eko sammasi ghammani
kiṁ patthayāno kiṁ esaṁ kena atthena brāhmaṇa.

[2286] Yathā mahā vāridharo kumbho supariṇāhavā
tathūpamaṁ ambapakkaṁ vaṇṇagandharasuttamaṁ.
Taṁ vuyhamānaṁ sotena disvānāmalamajjhime
pāṇībhi naṁ gahetvāna agyāyatanamāhariṁ.
Tato kadalipattesu nikkhipitvā sayaṁ ahaṁ
satthena naṁ vikappetvā khuppipāsaṁ ahāsi me.
Sohaṁ apetadaratho byantībhūto dukkhakkhamo
assādaṁ nādhigacchāmi phalesvaññesu kesuci.
Sositvā nūna maraṇaṁ taṁ mamaṁ āvahissati
ambaṁ yassa phalaṁ sāduṁ madhuraggaṁ manoramaṁ.
Yamuddhariṁ vuyhamānaṁ udadhismā mahaṇṇave
akkhātaṁ te mayā sabbaṁ yasmā upavasāmahaṁ.
Rammaṁ pati nisinnosmi puthulomāyutā puthu
tañca kho meva akkhāhi attānamapalāyinī.
Kā vā tvamasi kalyāṇī kissa vā tvaṁ sumajjhime
Rūpapaṭṭaplamaṭṭhīva 1 byagghīva girisānujā.
Yā santi nāriyo devesu devānaṁ paricārikā
yā ca manussalokasmiṁ rūpenanvāgatitthiyo.
Rūpena te sadisī natthi devagandhabbamānuse 2
puṭṭhāsi me cārupubbaṅgī brūhi nāmañca bandhave.