[2257] Paṅke ca posaṁ palipe byasannaṁ
balī yathā dubbalamuddhareyya
evampi maṁ tvaṁ udatāri bhoti
pañcāli gāthāhi subhāsitāhi.

[2258] Idaṁ vatvā mahārājā esukārī disampati
raṭṭhaṁ hitvāna pabbajji nāgo chetvāva bandhanaṁ.

[2259] Rājā ca pabbajjamarocayittha
raṭṭhaṁ pahāya naravīraseṭṭho
tuvaṁpi no hohi yatheva rājā
amhehi guttā anusāsa rajjaṁ.

[2260] Rājā ca pabbajjamarocayittha
1 Sī. Yu. kantāni. 2 Ma. padāliya. 3 Sī. Yu. te.
Raṭṭhaṁ pahāya naravīraseṭṭho
ahaṁpi ekā 1 carissāmi loke
hitvāna kāmāni manoramāni.
Rājā ca pabbajjamarocayittha
raṭṭhaṁ pahāya naravīraseṭṭho
ahaṁpi ekā carissāmi loke
hitvāna kāmāni yathodhikāni.
Accenti kālā tarayanti rattiyo
vayoguṇā anupubbaṁ jahanti
ahaṁpi ekā carissāmi loke
hitvāna kāmāni manoramāni.
Accenti kālā tarayanti rattiyo
vayoguṇā anupubbaṁ jahanti
ahaṁpi ekā carissāmi loke
hitvāna kāmāni yathodhikāni.
Accenti kālā tarayanti rattiyo
vayoguṇā anupubbaṁ jahanti
ahaṁpi ekā carissāmi loke
sītibhūtā sabbamaticca saṅganti.
Hatthipālajātakaṁ terasamaṁ
------------
1 Sī. ekāva. evamuparipi.
14 Ayogharajātakaṁ

[2261] Yamekarattiṁ paṭhamaṁ gabbhe vasati māṇavo
abbhuṭṭhitova so yāti sa gacchaṁ na nivattati.

[2262] Na yujjhamānā na balena vassitā
narā na jīranti na cāpi miyyare
sabbañhi 1 taṁ jātijarāyupaddutaṁ
tamme matī hoti carāmi dhammaṁ.

[2263] Caturaṅginiṁ sena 2 subhiṁsarūpaṁ
jayanti raṭṭhādhipatī pasayha
na maccuno jayitumussahanti
tamme matī hoti carāmi dhammaṁ.

[2264] Hatthīhi assehi rathehi pattihi
parivāritā muñcare ekacceyyā
na maccuno muñcitumussahanti
tamme matī hoti carāmi dhammaṁ.

[2265] Hatthīhi assehi rathehi pattihi
sūrā pabhañjanti padhaṁsayanti
na maccuno bhañjitumussahanti
tamme matī hoti carāmi dhammaṁ.

[2266] Mattā gajā bhinnagaḷā pabhinnā
1 Ma. sabbaṁ hidaṁ. 2 Ma. senaṁ.
Nagarāni maddanti janaṁ hananti
na maccuno madditumussahanti
tamme matī hoti carāmi dhammaṁ.