[2227] Khattiyo ca isiṁ disvā gacchamānaṁ vihāyasaṁ
saṁvegaṁ alabhi dhīro pabbajjaṁ samarocayi.
Tato so pabbajitvāna kāmarāgaṁ virājayi
1 Ma. nibbidā.
Kāmarāgaṁ virājetvā brahmalokūpago ahūti.
Mahāpalobhanajātakaṁ ekādasamaṁ.
-----------
12 Pañcapaṇḍitajātakaṁ

[2228] Pañca paṇḍitā samāgatā
pañho 1 me paṭibhāti taṁ suṇātha
nindiyamatthaṁ pasaṁsiyaṁ vā
kassevāvīkareyya guyhamatthaṁ.

[2229] Tvaṁ āvīkarohi bhūmipāla
bhattā bhārasaho tuvaṁ vadetaṁ
tava chandarucīni sammasitvā
atha vakkhanti janinda pañca dhīrā.

[2230] Yā sīlavatīva anaññatheyyā 2
bhattu chandavasānugā piyā manāpā
nindiyamatthaṁ pasaṁsiyaṁ vā
bhariyāyāvīkareyya guyhamatthaṁ.

[2231] Yo kicchagatassa āturassa
saraṇaṁ hoti gati parāyanañca
nindiyamatthaṁ pasaṁsiyaṁ vā
sakhino vāvīkareyya guyhamatthaṁ.
1 Ma. pañhā. 2 Sī. Yu. anaññadheyyā.

[2232] Yo 1 jeṭṭho atha majjhimo kaniṭṭho
so 2 ce sīlasamāhito ṭhitatto
nindiyamatthaṁ pasaṁsiyaṁ vā
bhātuno vāvīkareyya guyhamatthaṁ.

[2233] Yo ve pitu hadayassa patthagū
anujāto pitaraṁ anomapañño
nindiyamatthaṁ pasaṁsiyaṁ vā
puttassāvīkareyya guyhamatthaṁ.

[2234] Mātā dvipadajanindaseṭṭha
yā naṁ 3 poseti chandasā piyena
nindiyamatthaṁ pasaṁsiyaṁ vā
mātuyāvīkareyya guyhamatthaṁ.

[2235] Guyhassa hi guyhameva sādhu
na hi guyhassa pasatthamāvikammaṁ
anipphannatāya saheyya dhīro
nipphannatthova 4 yathāsukhaṁ bhaṇeyya.

[2236] Kiṁ tvaṁ vimanosi rājaseṭṭha
dipadinda 5 vacanaṁ suṇoma te taṁ
kiṁ cintayamāno dummanosi
na hi deva aparādho atthi mayhaṁ.
1 Ma. ayaṁ pāṭho natthi. 2 Ma. yo. 3 Sī. Yu. yo taṁ. 4 Ma. nipphannova.
5 Ma. dvipadajaninuda.