[300] Anāpatti āsandiyā pāde chinditvā paribhuñjati
pallaṅkassa vāle bhinditvā paribhuñjati ummattikāya
ādikammikāyāti.
Cittāgāravaggassa tatiyasikkhāpadaṁ

[301] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhuniyo suttaṁ kantanti. Manussā vihāracārikaṁ āhiṇḍantā
passitvā ujjhāyanti khīyanti vipācenti kathaṁ hi nāma bhikkhuniyo
suttaṁ kantissanti seyyathāpi gihiniyo kāmabhoginiyoti. Assosuṁ
kho bhikkhuniyo tesaṁ manussānaṁ ujjhāyantānaṁ khīyantānaṁ vipācentānaṁ.
Yā tā bhikkhuniyo appicchā .pe. Tā ujjhāyanti khīyanti
vipācenti kathaṁ hi nāma chabbaggiyā bhikkhuniyo suttaṁ kantissantīti.
.pe. Saccaṁ kira bhikkhave chabbaggiyā bhikkhuniyo suttaṁ kantantīti.
Saccaṁ bhagavāti. Vigarahi buddho bhagavā kathaṁ hi nāma bhikkhave
chabbaggiyā bhikkhuniyo suttaṁ kantissanti netaṁ bhikkhave appasannānaṁ
Vā pasādāya .pe. Evañca pana bhikkhave bhikkhuniyo imaṁ sikkhāpadaṁ
uddisantu yā pana bhikkhunī suttaṁ kanteyya pācittiyanti.

[302] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Suttaṁ nāma cha suttāni
khomaṁ kappāsikaṁ koseyyaṁ kambalaṁ sāṇaṁ bhaṅgaṁ. Kanteyyāti sayaṁ
kantati payoge dukkaṭaṁ ujjavujjave āpatti pācittiyassa.

[303] Anāpatti kantitasuttaṁ kantati ummattikāya
ādikammikāyāti.
--------
Cittāgāravaggassa catutthasikkhāpadaṁ

[304] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhikkhuniyo
gihiveyyāvaccaṁ karonti. Yā tā bhikkhuniyo appicchā .pe.
Tā ujjhāyanti khīyanti vipācenti kathaṁ hi nāma bhikkhuniyo
gihiveyyāvaccaṁ karissantīti .pe. Saccaṁ kira bhikkhave bhikkhuniyo
gihiveyyāvaccaṁ karontīti. Saccaṁ bhagavāti. Vigarahi buddho bhagavā
kathaṁ hi nāma bhikkhave bhikkhuniyo gihiveyyāvaccaṁ karissanti netaṁ
bhikkhave appasannānaṁ vā pasādāya .pe. Evañca pana bhikkhave
bhikkhuniyo imaṁ sikkhāpadaṁ uddisantu yā pana bhikkhunī gihiveyyāvaccaṁ
kareyya pācittiyanti.

[305] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Gihiveyyāvaccaṁ nāma āgārikassa
yāguṁ vā bhattaṁ vā khādanīyaṁ vā pacati sāṭakaṁ vā veṭhanaṁ vā
dhovati āpatti pācittiyassa.

[306] Anāpatti yāgupāne saṅghabhatte cetiyapūjāya attano
veyyāvaccakarassa yāguṁ vā bhattaṁ vā khādanīyaṁ vā pacati sāṭakaṁ
vā veṭhanaṁ vā dhovati ummattikāya ādikammikāyāti.
----------
Cittāgāravaggassa pañcamasikkhāpadaṁ

[307] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena aññatarā
bhikkhunī thullanandaṁ bhikkhuniṁ upasaṅkamitvā etadavoca ehayye imaṁ
adhikaraṇaṁ vūpasamehīti. Thullanandā bhikkhunī sādhūti paṭissuṇitvā
neva vūpasameti na vūpasamāya ussukkaṁ karoti. Athakho sā bhikkhunī
bhikkhunīnaṁ etamatthaṁ ārocesi. Yā tā bhikkhuniyo appicchā
.pe. Tā ujjhāyanti khīyanti vipācenti kathaṁ hi nāma ayyā
thullanandā bhikkhuniyo ehayye imaṁ adhikaraṇaṁ vūpasamehīti vuccamānā
sādhūti paṭissuṇitvā neva vūpasamessati na vūpasamāya ussukkaṁ
karissatīti .pe. Saccaṁ kira bhikkhave thullanandā bhikkhunī bhikkhuniyā
ehayye imaṁ adhikaraṇaṁ vūpasamehīti vuccamānā sādhūti paṭissuṇitvā
Neva vūpasameti na vūpasamāya ussukkaṁ karotīti. Saccaṁ bhagavāti.
Vigarahi buddho bhagavā kathaṁ hi nāma bhikkhave thullanandā bhikkhunī
bhikkhuniyā ehayye imaṁ adhikaraṇaṁ vūpasamehīti vuccamānā sādhūti
paṭissuṇitvā neva vūpasamessati na vūpasamāya ussukkaṁ karissati
netaṁ bhikkhave appasannānaṁ vā pasādāya .pe. Evañca pana
bhikkhave bhikkhuniyo imaṁ sikkhāpadaṁ uddisantu yā pana bhikkhunī
bhikkhuniyā ehayye imaṁ adhikaraṇaṁ vūpasamehīti vuccamānā sādhūti
paṭissuṇitvā sā pacchā anantarāyikinī neva vūpasameyya na vūpasamāya
ussukkaṁ kareyya pācittiyanti.

[308] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Bhikkhuniyāti aññāya bhikkhuniyā.
Adhikaraṇaṁ nāma cattāri adhikaraṇāni vivādādhikaraṇaṁ anuvādādhikaraṇaṁ
āpattādhikaraṇaṁ kiccādhikaraṇaṁ. Ehayye imaṁ adhikaraṇaṁ vūpasamehīti
ehayye imaṁ adhikaraṇaṁ vinicchehi. Sā pacchā anantarāyikinīti
asati antarāye. Neva vūpasameyyāti na sayaṁ vūpasameyya. Na
vūpasamāya ussukkaṁ kareyyāti na aññaṁ āṇāpeyya. Neva
vūpasamessāmi na vūpasamāya ussukkaṁ karissāmīti dhuraṁ nikkhittamatte
āpatti pācittiyassa.

[309] Upasampannāya upasampannasaññā adhikaraṇaṁ neva vūpasameti
na vūpasamāya ussukkaṁ karoti āpatti pācittiyassa. Upasampannāya
Sampannāya vematikā adhikaraṇaṁ neva vūpasameti na vūpasamāya ussukkaṁ
karoti āpatti pācittiyassa. Upasampannāya anupasampannasaññā
adhikaraṇaṁ neva vūpasameti na vūpasamāya ussukkaṁ karoti āpatti
pācittiyassa. Anupasampannāya adhikaraṇaṁ neva vūpasameti na
vūpasamāya ussukkaṁ karoti āpatti dukkaṭassa. Anupasampannāya
upasampannasaññā āpatti dukkaṭassa. Anupasampannāya vematikā
āpatti dukkaṭassa. Anupasampannāya anupasampannasaññā āpatti
dukkaṭassa.