[310] Anāpatti sati antarāye pariyesitvā na labhati
gilānāya āpadāsu ummattikāya ādikammikāyāti.
---------
Cittāgāravaggassa chaṭṭhasikkhāpadaṁ

[311] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena thullanandā
bhikkhunī naṭānaṁpi naṭakānaṁpi laṅghikānaṁpi sokajjhāyikānaṁpi kumbhathūnikānaṁpi
sahatthā khādanīyaṁ bhojanīyaṁ deti mayhaṁ parisati vaṇṇaṁ
bhāsathāti. Naṭāpi naṭakāpi laṅghikāpi sokajjhāyikāpi kumbhathūnikāpi
thullanandāya bhikkhuniyā parisati vaṇṇaṁ bhāsanti ayyā thullanandā
bahussutā bhāṇikā visāradā paṭṭhā dhammiṁ kathaṁ kātuṁ detha
ayyāya karotha ayyāyāti. Yā tā bhikkhuniyo appicchā .pe.
Tā ujjhāyanti khīyanti vipācenti kathaṁ hi nāma ayyā thullanandā
āgārikassa sahatthā khādanīyaṁ bhojanīyaṁ dassatīti .pe.
Saccaṁ kira bhikkhave thullanandā bhikkhunī āgārikassa sahatthā khādanīyaṁ
bhojanīyaṁ detīti. Saccaṁ bhagavāti. Vigarahi buddho bhagavā kathaṁ
hi nāma bhikkhave thullanandā bhikkhunī āgārikassa sahatthā khādanīyaṁ
bhojanīyaṁ dassati netaṁ bhikkhave appasannānaṁ vā pasādāya .pe.
Evañca pana bhikkhave bhikkhuniyo imaṁ sikkhāpadaṁ uddisantu yā
pana bhikkhunī āgārikassa vā paribbājakassa vā paribbājikāya
vā sahatthā khādanīyaṁ vā bhojanīyaṁ vā dadeyya pācittiyanti.

[312] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Āgāriko nāma yo koci
agāraṁ ajjhāvasati. Paribbājako nāma bhikkhuñca sāmaṇerañca
ṭhapetvā yo koci paribbājakasamāpanno. Paribbājikā nāma
bhikkhuniñca sikkhamānañca sāmaṇeriñca ṭhapetvā yā kāci
paribbājikasamāpannā. Khādanīyaṁ nāma pañca bhojanāni udakadantapoṇaṁ
ṭhapetvā avasesaṁ khādanīyaṁ nāma. Bhojanīyaṁ nāma pañca bhojanāni
odano kummāso sattu maccho maṁsaṁ. Dadeyyāti kāyena vā
kāyapaṭibaddhena vā nissaggiyena vā deti āpatti pācittiyassa.
Udakadantapoṇaṁ deti āpatti dukkaṭassa.

[313] Anāpatti dāpeti na deti upanikkhipitvā deti
Bāhiralepaṁ deti ummattikāya ādikammikāyāti.
-------
Cittāgāravaggassa sattamasikkhāpadaṁ

[314] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena thullanandā
bhikkhunī āvasathacīvaraṁ anissajjitvā paribhuñjati. Aññā utuniyo
bhikkhuniyo na labhanti. Yā tā bhikkhuniyo appicchā .pe. Tā
ujjhāyanti khīyanti vipācenti kathaṁ hi nāma ayyā thullanandā
āvasathacīvaraṁ anissajjitvā paribhuñjissatīti .pe. Saccaṁ kira
bhikkhave thullanandā bhikkhunī āvasathacīvaraṁ anissajjitvā paribhuñjatīti.
Saccaṁ bhagavāti. Vigarahi buddho bhagavā kathaṁ hi nāma
bhikkhave thullanandā bhikkhunī āvasathacīvaraṁ anissajjitvā paribhuñjissati
netaṁ bhikkhave appasannānaṁ vā pasādāya .pe. Evañca
pana bhikkhave bhikkhuniyo imaṁ sikkhāpadaṁ uddisantu yā pana bhikkhunī
āvasathacīvaraṁ anissajjitvā paribhuñjeyya pācittiyanti.

[315] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Āvasathacīvaraṁ nāma utuniyo
bhikkhuniyo paribhuñjantūti dinnaṁ hoti. Anissajjitvā paribhuñjeyyāti
dve tisso rattiyo paribhuñjitvā catutthadivase dhovitvā
bhikkhuniyā vā sikkhamānāya vā sāmaṇeriyā vā anissajjitvā
Paribhuñjati āpatti pācittiyassa.

[316] Anissajjite anissajjitasaññā paribhuñjati āpatti
pācittiyassa. Anissajjite vematikā paribhuñjati āpatti pācittiyassa.
Anissajjite nissajjitasaññā paribhuñjati āpatti pācittiyassa.
Nissajjite anissajjitasaññā āpatti dukkaṭassa.
Nissajjite vematikā āpatti dukkaṭassa. Nissajjite nissajjitasaññā
anāpatti.

[317] Anāpatti nissajjitvā paribhuñjati puna pariyāyena
paribhuñjati aññā utuniyo bhikkhuniyo na honti acchinnacīvarikāya
naṭṭhacīvarikāya āpadāsu ummattikāya ādikammikāyāti.
---------
Cittāgāravaggassa aṭṭhamasikkhāpadaṁ

[318] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena thullanandā
bhikkhunī āvasathaṁ anissajjitvā cārikaṁ pakkāmi. Tena kho pana
samayena thullanandāya bhikkhuniyā āvasatho dayhati. Bhikkhuniyo evamāhaṁsu
handayye bhaṇḍakaṁ nīharāmāti. Ekaccā evamāhaṁsu na
mayaṁ ayye nīharissāma yaṅkiñci naṭṭhaṁ sabbaṁ amhe abhiyuñjissatīti.
Thullanandā bhikkhunī punadeva taṁ āvasathaṁ paccāgantvā
bhikkhuniyo pucchi apayye bhaṇḍakaṁ nīharitthāti. Na mayaṁ ayye
Nīharimhāti. Thullanandā bhikkhunī ujjhāyati khīyati vipāceti kathaṁ
hi nāma bhikkhuniyo āvasathe dayhamāne bhaṇḍakaṁ na nīharissantīti.
Yā tā bhikkhuniyo appicchā .pe. Tā ujjhāyanti khīyanti
vipācenti kathaṁ hi nāma ayyā thullanandā āvasathaṁ anissajjitvā
cārikaṁ pakkamissatīti .pe. Saccaṁ kira bhikkhave thullanandā bhikkhunī
āvasathaṁ anissajjitvā cārikaṁ pakkamatīti 1 . Saccaṁ bhagavāti. Vigarahi
buddho bhagavā kathaṁ hi nāma bhikkhave thullanandā bhikkhunī āvasathaṁ
anissajjitvā cārikaṁ pakkamissati netaṁ bhikkhave appasannānaṁ vā
pasādāya .pe. Evañca pana bhikkhave bhikkhuniyo imaṁ sikkhāpadaṁ
uddisantu yā pana bhikkhunī āvasathaṁ anissajjitvā cārikaṁ
pakkameyya pācittiyanti.

[319] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Āvasatho nāma kavāṭabaddho
vuccati. Anissajjitvā cārikaṁ pakkameyyāti bhikkhuniyā vā sikkhamānāya
vā sāmaṇeriyā vā anissajjitvā parikkhittassa āvasathassa
parikkhepaṁ atikkamantiyā 2 āpatti pācittiyassa. Aparikkhittassa
āvasathassa upacāraṁ atikkamantiyā āpatti pācittiyassa.