[290] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Antovassanti purimaṁ vā
temāsaṁ pacchimaṁ vā temāsaṁ avasitvā. Cārikaṁ careyyāti kukkuṭasaṁpāte
Gāme gāmantare gāmantare āpatti pācittiyassa. Agāmake
araññe aḍḍhayojane aḍḍhayojane āpatti pācittiyassa.

[291] Anāpatti sattāhakaraṇīyena gacchati kenaci ubbāḷhā
gacchati āpadāsu ummattikāya ādikammikāyāti.
-------
Tuvaṭṭavaggassa dasamasikkhāpadaṁ

[292] Tena samayena buddho bhagavā rājagahe viharati veḷuvane
kalandakanivāpe. Tena kho pana samayena bhikkhuniyo tattheva rājagahe
vassaṁ vasanti tattha hemantaṁ tattha gimhaṁ. Manussā ujjhāyanti
khīyanti vipācenti āhundarikā bhikkhunīnaṁ disā andhakārā
na imāsaṁ disā pakkhāyantīti. Assosuṁ kho bhikkhuniyo tesaṁ
manussānaṁ ujjhāyantānaṁ khīyantānaṁ vipācentānaṁ. Athakho tā
bhikkhuniyo bhikkhūnaṁ etamatthaṁ ārocesuṁ. Bhikkhū bhagavato etamatthaṁ
ārocesuṁ. Athakho bhagavā etasmiṁ nidāne etasmiṁ pakaraṇe
dhammiṁ kathaṁ katvā bhikkhū āmantesi tenahi bhikkhave bhikkhunīnaṁ
sikkhāpadaṁ paññāpessāmi dasa atthavase paṭicca saṅghasuṭṭhutāya
.pe. Saddhammaṭṭhitiyā vinayānuggahāya. Evañca pana bhikkhave
bhikkhuniyo imaṁ sikkhāpadaṁ uddisantu yā pana bhikkhunī vassaṁ vutthā
cārikaṁ na pakkameyya antamaso chappañcayojanānipi pācittiyanti.

[293] Yā panāti yā yādisā .pe. Bhikkhunīti .pe. Ayaṁ
Imasmiṁ atthe adhippetā bhikkhunīti. Vassaṁ vutthā nāma purimaṁ
vā temāsaṁ pacchimaṁ vā temāsaṁ vutthā. Cārikaṁ na pakkamissāmi
antamaso chappañcayojanānīti 1 dhūraṁ nikkhittamatte āpatti pācittiyassa.

[294] Anāpatti sati antarāye pariyesitvā dutiyikaṁ bhikkhuniṁ
na labhati gilānāya āpadāsu ummattikāya ādikammikāyāti.
Tuvaṭṭavaggo catuttho.
-----------
Cittāgāravaggassa paṭhamasikkhāpadaṁ

[295] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena rañño
pasenadissa kosalassa 2 uyyāne cittāgāre paṭibhānacittaṁ kataṁ
hoti. Bahū manussā cittāgāraṁ dassanāya gacchanti. Chabbaggiyāpi
bhikkhuniyo cittāgāraṁ dassanāya agamaṁsu. Manussā ujjhāyanti
khīyanti vipācenti kathaṁ hi nāma bhikkhuniyo cittāgāraṁ dassanāya
gacchissanti seyyathāpi gihiniyo kāmabhoginiyoti 3 . Assosuṁ kho
bhikkhuniyo tesaṁ manussānaṁ ujjhāyantānaṁ khīyantānaṁ vipācentānaṁ.
Yā tā bhikkhuniyo appicchā .pe. Tā ujjhāyanti khīyanti
vipācenti kathaṁ hi nāma chabbaggiyā bhikkhuniyo cittāgāraṁ
dassanāya gacchissantīti .pe. Saccaṁ kira bhikkhave chabbaggiyā
1 Ma. Yu. chappañcayojanānipīti dissati. 2 Ma. Yu. pasenadikosalassa.
3 Ma. Yu. gihikāmabhoginiyoti evaṁ sabbattha ñātabbaṁ.
Bhikkhuniyo cittāgāraṁ dassanāya gacchantīti. Saccaṁ bhagavāti.
Vigarahi buddho bhagavā kathaṁ hi nāma bhikkhave chabbaggiyā bhikkhuniyo
cittāgāraṁ dassanāya gacchissanti netaṁ bhikkhave appasannānaṁ
vā pasādāya .pe. Evañca pana bhikkhave bhikkhuniyo
imaṁ sikkhāpadaṁ uddisantu yā pana bhikkhunī rājāgāraṁ vā
cittāgāraṁ vā ārāmaṁ vā uyyānaṁ vā pokkharaṇiṁ vā dassanāya
gaccheyya pācittiyanti.

[296] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Rājāgāraṁ nāma yattha
katthaci rañño kīḷituṁ ramituṁ kataṁ hoti. Cittāgāraṁ nāma yattha
katthaci manussānaṁ kīḷituṁ ramituṁ kataṁ hoti. Ārāmo nāma yattha
katthaci manussānaṁ kīḷituṁ ramituṁ kato hoti. Uyyānaṁ nāma yattha katthaci
manussānaṁ kīḷituṁ ramituṁ kataṁ hoti. Pokkharaṇī nāma yattha katthaci
manussānaṁ kīḷituṁ ramituṁ katā hoti. Dassanāya gacchati āpatti
dukkaṭassa yattha ṭhitā passati āpatti pācittiyassa. Dassanupacāraṁ
vijahitvā punappunaṁ passati āpatti pācittiyassa. Ekamekaṁ
dassanāya gacchati āpatti dukkaṭassa yattha ṭhitā passati
āpatti pācittiyassa. Dassanupacāraṁ vijahitvā punappunaṁ passati
āpatti pācittiyassa.

[297] Anāpatti ārāme ṭhitā passati gacchantī vā āgacchantī
Vā passati sati karaṇīye gantvā passati āpadāsu
ummattikāya ādikammikāyāti.
-------
Cittāgāravaggassa dutiyasikkhāpadaṁ

[298] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhikkhuniyo
āsandiṁpi pallaṅkaṁpi paribhuñjanti. Manussā vihāracārikaṁ āhiṇḍantā
passitvā ujjhāyanti khīyanti vipācenti kathaṁ hi nāma bhikkhuniyo
āsandiṁpi pallaṅkaṁpi paribhuñjissanti seyyathāpi gihiniyo kāmabhoginiyoti.
Assosuṁ kho bhikkhuniyo tesaṁ manussānaṁ ujjhāyantānaṁ
khīyantānaṁ vipācentānaṁ. Yā tā bhikkhuniyo appicchā .pe.
Tā ujjhāyanti khīyanti vipācenti kathaṁ hi nāma bhikkhuniyo
āsandiṁpi pallaṅkaṁpi paribhuñjissanti .pe. Saccaṁ kira bhikkhave
bhikkhuniyo āsandiṁpi pallaṅkaṁpi paribhuñjantīti. Saccaṁ bhagavāti.
Vigarahi buddho bhagavā kathaṁ hi nāma bhikkhave bhikkhuniyo āsandiṁpi
pallaṅkaṁpi paribhuñjissanti netaṁ bhikkhave appasannānaṁ vā pasādāya
.pe. Evañca pana bhikkhave bhikkhuniyo imaṁ sikkhāpadaṁ uddisantu
yā pana bhikkhunī āsandiṁ vā pallaṅkaṁ vā paribhuñjeyya
pācittiyanti.

[299] Yā panāti yā yādisā .pe. Bhikkhunīti .pe. Ayaṁ
Imasmiṁ atthe adhippetā bhikkhunīti. Āsandi nāma atikkantappamāṇā
vuccati. Pallaṅko nāma āharimehi vālehi kato hoti.
Paribhuñjeyyāti tasmiṁ abhinisīdati vā abhinipajjati vā āpatti
pācittiyassa.