[270] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Dukkhitā nāma gilānā vuccati.
Sahajīvinī nāma saddhivihārinī vuccati. Neva upaṭṭheyyāti na sayaṁ
upaṭṭheyya. Na upaṭṭhāpanāya ussukkaṁ kareyyāti na aññaṁ
Āṇāpeyya. Neva upaṭṭhessāmi na upaṭṭhāpanāya ussukkaṁ
karissāmīti dhuraṁ nikkhittamatte āpatti pācittiyassa. Antevāsiniṁ 1
vā anupasampannaṁ vā neva upaṭṭheti na upaṭṭhāpanāya ussukkaṁ
karoti āpatti dukkaṭassa.

[271] Anāpatti sati antarāye pariyesitvā na labhati
gilānāya āpadāsu ummattikāya ādikammikāyāti.
---------
Tuvaṭṭavaggassa pañcamasikkhāpadaṁ

[272] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhaddā kāpilānī
sākete vassaṁ upagatā hoti. Sā kenacideva karaṇīyena [2]- thullanandāya
bhikkhuniyā santike dūtaṁ pāhesi sace me ayyā thullanandā upassayaṁ
dadeyya gaccheyyāmahaṁ 3 sāvatthinti. Thullanandā bhikkhunī evamāha
āgacchatu dassāmīti. Athakho 4 bhaddā kāpilānī sāketā sāvatthiṁ
agamāsi. Thullanandā bhikkhunī bhaddāya kāpilāniyā upassayaṁ
adāsi. Tena kho pana samayena thullanandā bhikkhunī bahussutā
hoti bhāṇikā visāradā paṭṭhā dhammiṁ kathaṁ kātuṁ. Bhaddāpi
kāpilānī bahussutā hoti bhāṇikā visāradā paṭṭhā dhammiṁ kathaṁ kātuṁ
uḷārasambhāvitā. Manussā ayyā bhaddā kāpilānī bahussutā
bhāṇikā visāradā paṭṭhā dhammiṁ kathaṁ kātuṁ uḷārasambhāvitāti bhaddaṁ
1 Ma. Yu. antevāsiṁ. 2 Ma. etthantare ubbāḷhā iti dissati. 3 Ma. Yu.
āgaccheyyāmahaṁ. 4 Ma. sāiti dissati.
Kāpilāniṁ paṭhamaṁ payirupāsitvā pacchā thullanandaṁ bhikkhuniṁ payirupāsanti.
Thullanandā bhikkhunī issāpakatā imā kira appicchā santuṭṭhā
pavivittā asaṁsaṭṭhā yā imā saññattibahulā viññattibahulā
viharantīti kupitā anattamanā bhaddaṁ kāpilāniṁ upassayā nikkaḍḍhi.
Yā tā bhikkhuniyo appicchā .pe. Tā ujjhāyanti khīyanti
vipācenti kathaṁ hi nāma ayyā thullanandā ayyāya bhaddāya
kāpilāniyā upassayaṁ datvā kupitā anattamanā nikkaḍḍhissatīti
.pe. Saccaṁ kira bhikkhave thullanandā bhikkhunī bhaddāya kāpilāniyā
upassayaṁ datvā kupitā anattamanā nikkaḍḍhatīti 1 . Saccaṁ bhagavāti.
Vigarahi buddho bhagavā kathaṁ hi nāma bhikkhave thullanandā bhikkhunī
bhaddāya kāpilāniyā upassayaṁ datvā kupitā anattamanā
nikkaḍḍhissati netaṁ bhikkhave appasannānaṁ vā pasādāya .pe. Evañca
pana bhikkhave bhikkhuniyo imaṁ sikkhāpadaṁ uddisantu yā pana
bhikkhunī bhikkhuniyā upassayaṁ datvā kupitā anattamanā nikkaḍḍheyya
vā nikkaḍḍhāpeyya vā pācittiyanti.

[273] Yā panāti yā yādisā .pe. Bhikkhunīti .pe. Ayaṁ imasmiṁ
atthe adhippetā bhikkhunīti. Bhikkhuniyāti aññāya bhikkhuniyā.
Upassayo nāma kavāṭabaddho vuccati. Datvāti sayaṁ datvā.
Kupitā anattamanāti anabhiraddhā āhatacittā khīlajātā. Nikkaḍḍheyyāti
1 Ma. Yu. nikkaḍḍhīti.
Gabbhe gahetvā pamukhaṁ nikkaḍḍhati āpatti pācittiyassa.
Pamukhaṁ gahetvā bahi nikkaḍḍhati āpatti pācittiyassa. Ekena
payogena bahukepi dvāre atikkāmeti āpatti pācittiyassa.
Nikkaḍḍhāpeyyāti aññaṁ āṇāpeti āpatti dukkaṭassa. Sakiṁ
āṇattā bahukepi dvāre atikkāmeti āpatti pācittiyassa.

[274] Upasampannāya upasampannasaññā upassayaṁ datvā kupitā
anattamanā nikkaḍḍhati vā nikkaḍḍhāpeti vā āpatti pācittiyassa.
Upasampannāya vematikā upassayaṁ datvā kupitā anattamanā
nikkaḍḍhati vā nikkaḍḍhāpeti vā āpatti pācittiyassa.
Upasampannāya anupasampannasaññā upassayaṁ datvā kupitā anattamanā
nikkaḍḍhati vā nikkaḍḍhāpeti vā āpatti pācittiyassa.
Tassā parikkhāraṁ nikkaḍḍhati vā nikkaḍḍhāpeti vā āpatti
dukkaṭassa. Akavāṭabaddhā nikkaḍḍhati vā nikkaḍḍhāpeti vā āpatti
dukkaṭassa. Tassā parikkhāraṁ nikkaḍḍhati vā nikkaḍḍhāpeti vā
āpatti dukkaṭassa. Anupasampannaṁ kavāṭabaddhā vā akavāṭabaddhā
vā nikkaḍḍhati vā nikkaḍḍhāpeti vā āpatti dukkaṭassa.
Tassā parikkhāraṁ nikkaḍḍhati vā nikkaḍḍhāpeti vā āpatti
dukkaṭassa. Anupasampannāya upasampannasaññā āpatti
dukkaṭassa. Anupasampannāya vematikā āpatti dukkaṭassa.
Anupasampannāya anupasampannasaññā āpatti dukkaṭassa.

[275] Anāpatti alajjiniṁ nikkaḍḍhati vā nikkaḍḍhāpeti vā
tassā parikkhāraṁ nikkaḍḍhati vā nikkaḍḍhāpeti vā ummattikaṁ
nikkaḍḍhati vā nikkaḍḍhāpeti vā tassā parikkhāraṁ nikkaḍḍhati
vā nikkaḍḍhāpeti vā bhaṇḍanakārikaṁ ... Kalahakārikaṁ ... Vivādakārikaṁ ...
Bhassakārikaṁ ... Saṅghe adhikaraṇakārikaṁ nikkaḍḍhati vā nikkaḍḍhāpeti
vā tassā parikkhāraṁ nikkaḍḍhati vā nikkaḍḍhāpeti vā
antevāsiniṁ vā saddhivihāriniṁ vā nasammāvattantiṁ nikkaḍḍhati vā
nikkaḍḍhāpeti vā tassā parikkhāraṁ nikkaḍḍhati vā nikkaḍḍhāpeti
vā ummattikāya ādikammikāyāti.
--------
Tuvaṭṭavaggassa chaṭṭhasikkhāpadaṁ

[276] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena caṇḍakālī
bhikkhunī saṁsaṭṭhā viharati gahapatināpi gahapatiputtenapi. Yā tā
bhikkhuniyo appicchā .pe. Tā ujjhāyanti khīyanti vipācenti
kathaṁ hi nāma ayyā caṇḍakālī saṁsaṭṭhā viharissati gahapatināpi
gahapatiputtenapīti .pe. Saccaṁ kira bhikkhave caṇḍakālī bhikkhunī
saṁsaṭṭhā viharati gahapatināpi gahapatiputtenapīti. Saccaṁ bhagavāti.
Vigarahi buddho bhagavā kathaṁ hi nāma bhikkhave caṇḍakālī bhikkhunī
saṁsaṭṭhā viharissati gahapatināpi gahapatiputtenapi netaṁ bhikkhave
Appasannānaṁ vā pasādāya .pe. Evañca pana bhikkhave bhikkhuniyo
imaṁ sikkhāpadaṁ uddisantu yā pana bhikkhunī saṁsaṭṭhā vihareyya
gahapatinā vā gahapatiputtena vā. Sā bhikkhunī bhikkhunīhi evamassa
vacanīyā māyye saṁsaṭṭhā vihari gahapatināpi gahapatiputtenapi
viviccāhayye 1 vivekaññeva bhaginiyā saṅgho vaṇṇetīti. Evañca [2]-
sā bhikkhunī bhikkhunīhi vuccamānā tatheva paggaṇheyya sā bhikkhunī
bhikkhunīhi yāvatatiyaṁ samanubhāsitabbā tassa paṭinissaggāya.
Yāvatatiyañce samanubhāsiyamānā taṁ paṭinissajjeyya iccetaṁ kusalaṁ
no ce paṭinissajjeyya pācittiyanti.

[277] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Saṁsaṭṭhā nāma ananulomikena
kāyikavācasikena saṁsaṭṭhā. Gahapati nāma yo koci agāraṁ
ajjhāvasati. Gahapatiputto nāma yo koci puttabhātaro.

[278] Sā bhikkhunīti yā sā saṁsaṭṭhā bhikkhunī. Bhikkhunīhīti
aññāhi bhikkhunīhi yā passanti yā suṇanti tāhi vattabbā
māyye saṁsaṭṭhā vihari gahapatināpi gahapatiputtenapi viviccāhayye
vivekaññeva bhaginiyā saṅgho vaṇṇetīti. Dutiyampi vattabbā tatiyampi
vattabbā. Sace paṭinissajjati iccetaṁ kusalaṁ no ce
paṭinissajjati āpatti dukkaṭassa. Sutvā na vadanti āpatti
dukkaṭassa. Sā bhikkhunī saṅghamajjhaṁpi ākaḍḍhitvā vattabbā
1 Ma. Yu. viviccayye. sabbattha evameva dissati. 2 Ma. Yu. etthantare
panasaddo dissati.
Māyye saṁsaṭṭhā vihari gahapatināpi gahapatiputtenapi viviccāhayye
vivekaññeva bhaginiyā saṅgho vaṇṇetīti. Dutiyampi vattabbā
tatiyampi vattabbā. Sace paṭinissajjati iccetaṁ kusalaṁ no ce
paṭinissajjati āpatti dukkaṭassa.

[279] Sā bhikkhunī samanubhāsitabbā. Evañca pana bhikkhave
samanubhāsitabbā. Byattāya bhikkhuniyā paṭibalāya saṅgho ñāpetabbo
suṇātu me ayye saṅgho ayaṁ itthannāmā bhikkhunī saṁsaṭṭhā viharati
gahapatināpi gahapatiputtenapi. Sā taṁ vatthuṁ nappaṭinissajjati. Yadi
saṅghassa pattakallaṁ saṅgho itthannāmaṁ bhikkhuniṁ samanubhāseyya tassa
vatthussa paṭinissaggāya. Esā ñatti. Suṇātu me ayye saṅgho
ayaṁ itthannāmā bhikkhunī saṁsaṭṭhā viharati gahapatināpi gahapatiputtenapi.
Sā taṁ vatthuṁ nappaṭinissajjati. Saṅgho itthannāmaṁ bhikkhuniṁ
samanubhāsati tassa vatthussa paṭinissaggāya. Yassā ayyāya khamati
itthannāmāya bhikkhuniyā samanubhāsanā tassa vatthussa paṭinissaggāya
sā tuṇhassa yassā nakkhamati sā bhāseyya. Dutiyampi
etamatthaṁ vadāmi .pe. Tatiyampi etamatthaṁ vadāmi .pe. Samanubhaṭṭhā
saṅghena itthannāmā bhikkhunī tassa vatthussa paṭinissaggāya. Khamati
saṅghassa tasmā tuṇhī. Evametaṁ dhārayāmīti.