[250] Yā panāti yā yādisā .pe. Bhikkhunīti .pe. Ayaṁ imasmiṁ
atthe adhippetā bhikkhunīti. Dubbalacīvarapaccāsā nāma sace mayaṁ
sakkoma dassāma karissāmāti vācā bhinnā hoti. Cīvarakālasamayo
nāma anatthate kaṭhine vassānassa pacchimo māso atthate kaṭhine
pañca māsā. Cīvarakālasamayaṁ atikkāmeyyāti anatthate kaṭhine
vassānassa pacchimaṁ divasaṁ atikkāmeti āpatti pācittiyassa.
Atthate kaṭhine kaṭhinuddhāradivasaṁ atikkāmeti āpatti pācittiyassa.

[251] Dubbalacīvare dubbalacīvarasaññā cīvarakālasamayaṁ atikkāmeti
āpatti pācittiyassa. Dubbalacīvare vematikā cīvarakālasamayaṁ
atikkāmeti āpatti dukkaṭassa. Dubbalacīvare adubbalacīvarasaññā
cīvarakālasamayaṁ atikkāmeti anāpatti. [1]- Adubbalacīvare
dubbalacīvarasaññā āpatti dukkaṭassa. Adubbalacīvare vematikā
āpatti dukkaṭassa. Adubbalacīvare adubbalacīvarasaññā anāpatti.

[252] Anāpatti ānisaṁsaṁ dassetvā nivāreti ummattikāya
ādikammikāyāti.
1 Ma. etthantare adubbalacīvare dubbalacīvarakālasamayaṁ atikkāmeti
anāpattīti dissati.
Naggavaggassa dasamasikkhāpadaṁ

[253] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena aññatarena
upāsakena saṅghaṁ uddissa vihāro kārāpito hoti. So tassa vihārassa
mahe ubhatosaṅghassa akālacīvaraṁ dātukāmo hoti. Tena kho pana
samayena ubhatosaṅghassa kaṭhinaṁ atthataṁ hoti. Athakho so upāsako
saṅghaṁ upasaṅkamitvā kaṭhinuddhāraṁ yāci. Bhagavato etamatthaṁ ārocesuṁ.
Athakho bhagavā etasmiṁ nidāne etasmiṁ pakaraṇe dhammiṁ kathaṁ katvā bhikkhū
āmantesi anujānāmi bhikkhave kaṭhinaṁ uddharituṁ evañca pana bhikkhave
kaṭhinaṁ uddharitabbaṁ. Byattena bhikkhunā paṭibalena saṅgho ñāpetabbo
suṇātu me bhante saṅgho yadi saṅghassa pattakallaṁ saṅgho kaṭhinaṁ
uddhareyya. Esā ñatti. Suṇātu me bhante saṅgho saṅgho
kaṭhinaṁ uddharati. Yassāyasmato khamati kaṭhinassa uddhāro so
tuṇhassa yassa nakkhamati so bhāseyya. Uddhataṁ saṅghena kaṭhinaṁ.
Khamati saṅghassa tasmā tuṇhī. Evametaṁ dhārayāmīti.

[254] Athakho so upāsako bhikkhunīsaṅghaṁ upasaṅkamitvā kaṭhinuddhāraṁ
yāci. Thullanandā bhikkhunī cīvaraṁ amhākaṁ bhavissatīti kaṭhinuddhāraṁ
paṭibāhi. Athakho so upāsako ujjhāyati khīyati vipāceti kathaṁ
hi nāma bhikkhuniyo amhākaṁ kaṭhinuddhāraṁ na dassantīti. Assosuṁ
Kho bhikkhuniyo tassa upāsakassa ujjhāyantassa khīyantassa
vipācentassa. Yā tā bhikkhuniyo appicchā .pe. Tā ujjhāyanti
khīyanti vipācenti kathaṁ hi nāma ayyā thullanandā dhammikaṁ
kaṭhinuddhāraṁ paṭibāhissatīti .pe. Saccaṁ kira bhikkhave thullanandā
bhikkhunī dhammikaṁ kaṭhinuddhāraṁ paṭibāhatīti. Saccaṁ bhagavāti.
Vigarahi buddho bhagavā kathaṁ hi nāma bhikkhave thullanandā bhikkhunī
dhammikaṁ kaṭhinuddhāraṁ paṭibāhissati netaṁ bhikkhave appasannānaṁ vā
pasādāya .pe. Evañca pana bhikkhave bhikkhuniyo imaṁ sikkhāpadaṁ
uddisantu yā pana bhikkhunī dhammikaṁ kaṭhinuddhāraṁ paṭibāheyya
pācittiyanti.

[255] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Dhammiko nāma kaṭhinuddhāro
samaggo bhikkhunīsaṅgho sannipatitvā uddharati. Paṭibāheyyāti kathaṁ
idaṁ kaṭhinaṁ uddhareyyāti paṭibāhati āpatti pācittiyassa.

[256] Dhammike dhammikasaññā paṭibāhati āpatti
pācittiyassa. Dhammike vematikā paṭibāhati āpatti dukkaṭassa.
Dhammike adhammikasaññā paṭibāhati anāpatti. Adhammike
dhammikasaññā āpatti dukkaṭassa. Adhammike vematikā āpatti
dukkaṭassa. Adhammike adhammikasaññā anāpatti.

[257] Anāpatti ānisaṁsaṁ dassetvā paṭibāhati ummattikāya
Ādikammikāyāti.
Naggavaggo tatiyo.
--------
Tuvaṭṭavaggassa paṭhamasikkhāpadaṁ

[258] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhikkhuniyo dve
ekamañce tuvaṭṭenti. Manussā vihāracārikaṁ āhiṇḍantā
passitvā ujjhāyanti khīyanti vipācenti kathaṁ hi nāma bhikkhuniyo
dve ekamañce tuvaṭṭessanti seyyathāpi gihiniyo 1 kāmabhoginiyoti.
Assosuṁ kho bhikkhuniyo tesaṁ manussānaṁ ujjhāyantānaṁ
khīyantānaṁ vipācentānaṁ. Yā tā bhikkhuniyo appicchā .pe. Tā
ujjhāyanti khīyanti vipācenti kathaṁ hi nāma bhikkhuniyo dve
ekamañce tuvaṭṭessantīti .pe. Saccaṁ kira bhikkhave bhikkhuniyo
dve ekamañce tuvaṭṭentīti. Saccaṁ bhagavāti. Vigarahi buddho
bhagavā kathaṁ hi nāma bhikkhave bhikkhuniyo dve ekamañce
tuvaṭṭessanti netaṁ bhikkhave appasannānaṁ vā pasādāya .pe.
Evañca pana bhikkhave bhikkhuniyo imaṁ sikkhāpadaṁ uddisantu yā
pana bhikkhuniyo dve ekamañce tuvaṭṭeyyuṁ pācittiyanti.
1 Yu. gihi. Ma. gihī.

[259] Yā panāti yā yādisā .pe. Bhikkhuniyoti
upasampannāyo vuccanti. Dve ekamañce tuvaṭṭeyyunti ekāya
nipannāya aparā nipajjati āpatti pācittiyassa. Ubho vā
nipajjanti āpatti pācittiyassa. Uṭṭhahitvā punappunaṁ nipajjanti
āpatti pācittiyassa.