[230] Anāpatti sati antarāye pariyesitvā na labhati
karontī catūhapañcāhaṁ atikkāmeti gilānāya āpadāsu
ummattikāya ādikammikāyāti.
---------
Naggavaggassa catutthasikkhāpadaṁ

[231] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhikkhuniyo
bhikkhunīnaṁ hatthe cīvaraṁ nikkhipitvā santaruttarena janapadacārikaṁ
pakkamanti. Tāni cīvarāni ciraṁ nikkhittāni kaṇṇakitāni honti.
Tāni bhikkhuniyo otāpenti. Bhikkhuniyo tā bhikkhuniyo etadavocuṁ
kassimāni ayye cīvarāni kaṇṇakitānīti. Athakho tā bhikkhuniyo
bhikkhunīnaṁ etamatthaṁ ārocesuṁ. Yā tā bhikkhuniyo appicchā .pe.
Tā ujjhāyanti khīyanti vipācenti kathaṁ hi nāma bhikkhuniyo
bhikkhunīnaṁ hatthe cīvaraṁ nikkhipitvā santaruttarena janapadacārikaṁ
pakkamissantīti .pe. Saccaṁ kira bhikkhave bhikkhuniyo bhikkhunīnaṁ hatthe
cīvaraṁ nikkhipitvā santaruttarena janapadacārikaṁ pakkamantīti. Saccaṁ
bhagavāti. Vigarahi buddho bhagavā kathaṁ hi nāma bhikkhave bhikkhuniyo
bhikkhunīnaṁ hatthe cīvaraṁ nikkhipitvā santaruttarena janapadacārikaṁ
pakkamissanti netaṁ bhikkhave appasannānaṁ vā pasādāya .pe.
Evañca pana bhikkhave bhikkhuniyo imaṁ sikkhāpadaṁ uddisantu yā
Pana bhikkhunī pañcāhikaṁ saṅghāṭivāraṁ 1 atikkāmeyya pācittiyanti.

[232] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Pañcāhikaṁ saṅghāṭivāraṁ
atikkāmeyyāti pañcamaṁ divasaṁ pañca cīvarāni neva nivāseti na pārupati
na otāpeti pañcamaṁ divasaṁ atikkāmeti āpatti pācittiyassa.

[233] Pañcāhātikkante atikkantasaññā āpatti
pācittiyassa. Pañcāhātikkante vematikā āpatti pācittiyassa.
Pañcāhātikkante anatikkantasaññā āpatti pācittiyassa.
Pañcāhānatikkante atikkantasaññā āpatti dukkaṭassa.
Pañcāhānatikkante vematikā āpatti dukkaṭassa. Pañcāhānatikkante
anatikkantasaññā anāpatti.

[234] Anāpatti pañcamaṁ divasaṁ pañca cīvarāni nivāseti vā
pārupati vā otāpeti vā gilānāya āpadāsu ummattikāya
ādikammikāyāti.
--------
Naggavaggassa pañcamasikkhāpadaṁ

[235] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena aññatarā
bhikkhunī piṇḍāya caritvā allacīvaraṁ pattharitvā vihāraṁ pāvisi.
1 Ma. Yu. saṅghāṭicāraṁ.
Aññatarā bhikkhunī taṁ cīvaraṁ pārupitvā gāmaṁ piṇḍāya pāvisi.
Sā nikkhamitvā bhikkhuniyo pucchi apayye mayhaṁ cīvaraṁ passeyyāthāti.
Bhikkhuniyo tassā bhikkhuniyā etamatthaṁ ārocesuṁ. Athakho
sā bhikkhunī ujjhāyati khīyati vipāceti kathaṁ hi nāma bhikkhunī
mayhaṁ cīvaraṁ anāpucchā pārupissatīti. Athakho sā bhikkhunī bhikkhunīnaṁ
etamatthaṁ ārocesi. Yā tā bhikkhuniyo appicchā .pe. Tā
ujjhāyanti khīyanti vipācenti kathaṁ hi nāma bhikkhunī bhikkhuniyā
cīvaraṁ anāpucchā pārupissatīti .pe. Saccaṁ kira bhikkhave bhikkhunī
bhikkhuniyā cīvaraṁ anāpucchā pārupatīti 1 . Saccaṁ bhagavāti. Vigarahi
buddho bhagavā kathaṁ hi nāma bhikkhave bhikkhunī bhikkhuniyā cīvaraṁ
anāpucchā pārupissati netaṁ bhikkhave appasannānaṁ vā pasādāya
.pe. Evañca pana bhikkhave bhikkhuniyo imaṁ sikkhāpadaṁ uddisantu
yā pana bhikkhunī cīvarasaṅkamanīyaṁ dhāreyya pācittiyanti.

[236] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Cīvarasaṅkamanīyaṁ nāma
upasampannāya pañcannaṁ cīvarānaṁ aññataraṁ cīvaraṁ. Tassā vā adinnaṁ
taṁ vā anāpucchā nivāseti vā pārupati vā āpatti pācittiyassa.

[237] Upasampannāya upasampannasaññā cīvarasaṅkamanīyaṁ dhāreti
āpatti pācittiyassa. Upasampannāya vematikā cīvarasaṅkamanīyaṁ
1 Ma. Yu. pārupīti.
Dhāreti āpatti pācittiyassa. Upasampannāya anupasampannasaññā
cīvarasaṅkamanīyaṁ dhāreti āpatti pācittiyassa. Anupasampannāya
cīvarasaṅkamanīyaṁ dhāreti āpatti dukkaṭassa. Anupasampannāya
upasampannasaññā āpatti dukkaṭassa. Anupasampannāya vematikā
āpatti dukkaṭassa. Anupasampannāya anupasampannasaññā
āpatti dukkaṭassa.

[238] Anāpatti sā vā deti taṁ vā āpucchā nivāseti
vā pārupati vā acchinnacīvarikāya naṭṭhacīvarikāya āpadāsu
ummattikāya ādikammikāyāti.
--------
Naggavaggassa chaṭṭhasikkhāpadaṁ

[239] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena thullanandāya
bhikkhuniyā upaṭṭhākakulaṁ thullanandaṁ bhikkhuniṁ etadavoca bhikkhunīsaṅghassa
ayye cīvaraṁ dassāmāti. Thullanandā bhikkhunī tumhe
bahukiccā bahukaraṇīyāti antarāyaṁ akāsi. Tena kho pana samayena
tassa kulassa gharaṁ dayhati. Te ujjhāyanti khīyanti vipācenti
kathaṁ hi nāma ayyā thullanandā amhākaṁ deyyadhammaṁ antarāyaṁ
karissati ubhayenamha paribāhirā bhogehi ca puññena cāti.
Assosuṁ kho bhikkhuniyo tesaṁ manussānaṁ ujjhāyantānaṁ khīyantānaṁ
Vipācentānaṁ. Yā tā bhikkhuniyo appicchā .pe. Tā
ujjhāyanti khīyanti vipācenti kathaṁ hi nāma ayyā thullanandā
gaṇassa cīvaralābhaṁ antarāyaṁ karissatīti .pe. Saccaṁ kira bhikkhave
thullanandā bhikkhunī gaṇassa cīvaralābhaṁ antarāyaṁ karotīti 1 . Saccaṁ
bhagavāti. Vigarahi buddho bhagavā kathaṁ hi nāma bhikkhave thullanandā
bhikkhunī gaṇassa cīvaralābhaṁ antarāyaṁ karissati netaṁ bhikkhave
appasannānaṁ vā pasādāya .pe. Evañca pana bhikkhave bhikkhuniyo
imaṁ sikkhāpadaṁ uddisantu yā pana bhikkhunī gaṇassa cīvaralābhaṁ
antarāyaṁ kareyya pācittiyanti.