[260] Anāpatti ekāya nipannāya aparā nisīdati ubho
vā nisīdanti ummattikānaṁ ādikammikānanti.
--------
Tuvaṭṭavaggassa dutiyasikkhāpadaṁ

[261] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhikkhuniyo
dve ekattharaṇapāpuraṇā 1 tuvaṭṭenti. Manussā vihāracārikaṁ
āhiṇḍantā passitvā ujjhāyanti khīyanti vipācenti kathaṁ hi nāma
bhikkhuniyo dve ekattharaṇapāpuraṇā tuvaṭṭessanti seyyathāpi
gihiniyo kāmabhoginiyoti. Assosuṁ kho bhikkhuniyo tesaṁ manussānaṁ
ujjhāyantānaṁ khīyantānaṁ vipācentānaṁ. Yā tā bhikkhuniyo
appicchā .pe. Tā ujjhāyanti khīyanti vipācenti kathaṁ hi nāma
bhikkhuniyo dve ekattharaṇapāpuraṇā tuvaṭṭessantīti .pe. Saccaṁ
kira bhikkhave bhikkhuniyo dve ekattharaṇapāpuraṇā tuvaṭṭentīti.
1 Ma. Yu. ekattharaṇapāvuraṇā.
Saccaṁ bhagavāti. Vigarahi buddho bhagavā kathaṁ hi nāma bhikkhave
bhikkhuniyo dve ekattharaṇapāpuraṇā tuvaṭṭessanti netaṁ bhikkhave
appasannānaṁ vā pasādāya .pe. Evañca pana bhikkhave bhikkhuniyo
imaṁ sikkhāpadaṁ uddisantu yā pana bhikkhuniyo dve ekattharaṇapāpuraṇā
tuvaṭṭeyyuṁ pācittiyanti.

[262] Yā panāti yā yādisā .pe. Bhikkhuniyoti
upasampannāyo vuccanti. Dve ekattharaṇapāpuraṇā tuvaṭṭeyyunti
taññeva attharitvā taññeva pārupanti āpatti pācittiyassa.

[263] Ekattharaṇapāpuraṇe ekattharaṇapāpuraṇasaññā tuvaṭṭenti
āpatti pācittiyassa. Ekattharaṇapāpuraṇe vematikā tuvaṭṭenti
āpatti pācittiyassa. Ekattharaṇapāpuraṇe nānattharaṇapāpuraṇasaññā
tuvaṭṭenti āpatti pācittiyassa. Ekattharaṇe nānāpāpuraṇe 1
āpatti dukkaṭassa. Nānattharaṇe ekapāpuraṇe 2 āpatti
dukkaṭassa. Nānattharaṇapāpuraṇe ekattharaṇapāpuraṇasaññā āpatti
dukkaṭassa. Nānattharaṇapāpuraṇe vematikā āpatti dukkaṭassa.
Nānattharaṇapāpuraṇe nānattharaṇapāpuraṇasaññā anāpatti.

[264] Anāpatti vatthānaṁ 3 dassetvā nipajjanti ummattikānaṁ
ādikammikānanti.
1 Ma. Yu. nānāpāvuraṇasaññā. 2 Ma. ekapāvuraṇasaññā. Yu.
ekattharaṇāpāvuraṇasaññā. 3 Yu. vavatthānaṁ.
Tuvaṭṭavaggassa tatiyasikkhāpadaṁ

[265] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena thullanandā
bhikkhunī bahussutā hoti bhāṇikā visāradā paṭṭhā dhammiṁ kathaṁ
kātuṁ. Bhaddāpi kāpilānī bahussutā hoti bhāṇikā visāradā
paṭṭhā dhammiṁ kathaṁ kātuṁ uḷārasambhāvitā. Manussā ayyā bhaddā
kāpilānī bahussutā bhāṇikā visāradā paṭṭhā dhammiṁ kathaṁ kātuṁ
uḷārasambhāvitāti bhaddaṁ kāpilāniṁ paṭhamaṁ payirupāsitvā pacchā
thullanandaṁ bhikkhuniṁ payirupāsanti. Thullanandā bhikkhunī issāpakatā
imā kira appicchā santuṭṭhā pavivittā asaṁsaṭṭhā yā imā
saññattibahulā viññattibahulā viharantīti bhaddāya kāpilāniyā
purato caṅkamatipi tiṭṭhatipi nisīdatipi seyyaṁpi kappeti uddisatipi
uddisāpetipi sajjhāyampi karoti. Yā tā bhikkhuniyo appicchā
.pe. Tā ujjhāyanti khīyanti vipācenti kathaṁ hi nāma
ayyā thullanandā ayyāya bhaddāya kāpilāniyā sañcicca aphāsuṁ
karissatīti .pe. Saccaṁ kira bhikkhave thullanandā bhikkhunī bhaddāya
kāpilāniyā sañcicca aphāsuṁ karotīti. Saccaṁ bhagavāti. Vigarahi
buddho bhagavā kathaṁ hi nāma bhikkhave thullanandā bhikkhunī bhaddāya
kāpilāniyā sañcicca aphāsuṁ karissati netaṁ bhikkhave appasannānaṁ
Vā pasādāya .pe. Evañca pana bhikkhave bhikkhuniyo imaṁ sikkhāpadaṁ
uddisantu yā pana bhikkhunī bhikkhuniyā sañcicca aphāsuṁ kareyya
pācittiyanti.

[266] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Bhikkhuniyāti aññāya bhikkhuniyā.
Sañciccāti jānantī sañjānantī cecca abhivitaritvā vītikkamo.
Aphāsuṁ kareyyāti iminā imissā aphāsuṁ bhavissatīti anāpucchā
purato caṅkamati vā tiṭṭhati vā nisīdati vā seyyaṁ vā kappeti
uddisati vā uddisāpeti vā sajjhāyaṁ vā karoti āpatti
pācittiyassa.

[267] Upasampannāya upasampannasaññā sañcicca aphāsuṁ karoti
āpatti pācittiyassa. Upasampannāya vematikā sañcicca aphāsuṁ
karoti āpatti pācittiyassa. Upasampannāya anupasampannasaññā
sañcicca aphāsuṁ karoti āpatti pācittiyassa. Anupasampannāya 1
upasampannasaññā āpatti dukkaṭassa. Anupasampannāya vematikā
āpatti dukkaṭassa. Anupasampannāya anupasampannasaññā āpatti
dukkaṭassa.

[268] Anāpatti na aphāsuṁ kattukāmā āpucchā purato caṅkamati
vā tiṭṭhati vā nisīdati vā seyyaṁ vā kappeti uddisati vā uddisāpeti
vā sajjhāyaṁ vā karoti ummattikāya ādikammikāyāti.
1 Ma. Yu. etthantare anupasampannāya sañcicca aphāsuṁ karoti āpatti dukkaṭassa iti
ime pāṭhā dissanti.
Tuvaṭṭavaggassa catutthasikkhāpadaṁ

[269] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho samayena thullanandā bhikkhunī
dukkhitaṁ sahajīviniṁ neva upaṭṭheti na upaṭṭhāpanāya ussukkaṁ karoti.
Yā tā bhikkhuniyo appicchā .pe. Tā ujjhāyanti khīyanti
vipācenti kathaṁ hi nāma ayyā thullanandā dukkhitaṁ sahajīviniṁ neva
upaṭṭhessati na upaṭṭhāpanāya ussukkaṁ karissatīti .pe. Saccaṁ
kira bhikkhave thullanandā bhikkhunī dukkhitaṁ sahajīviniṁ neva upaṭṭheti
na upaṭṭhāpanāya ussukkaṁ karotīti. Saccaṁ bhagavāti. Vigarahi
buddho bhagavā kathaṁ hi nāma bhikkhave thullanandā bhikkhunī dukkhitaṁ
sahajīviniṁ neva upaṭṭhessati na upaṭṭhāpanāya ussukkaṁ karissati
netaṁ bhikkhave appasannānaṁ vā pasādāya .pe. Evañca pana bhikkhave
bhikkhuniyo imaṁ sikkhāpadaṁ uddisantu yā pana bhikkhunī dukkhitaṁ
sahajīviniṁ neva upaṭṭheyya na upaṭṭhāpanāya ussukkaṁ kareyya
pācittiyanti.