[280] Ñattiyā dukkaṭaṁ dvīhi kammavācāhi dukkaṭā
kammavācāpariyosāne āpatti pācittiyassa.

[281] Dhammakamme dhammakammasaññā nappaṭinissajjati āpatti
pācittiyassa. Dhammakamme vematikā nappaṭinissajjati āpatti
pācittiyassa. Dhammakamme adhammakammasaññā nappaṭinissajjati
āpatti pācittiyassa. Adhammakamme dhammakammasaññā āpatti
dukkaṭassa. Adhammakamme vematikā āpatti dukkaṭassa.
Adhammakamme adhammakammasaññā āpatti dukkaṭassa.

[282] Anāpatti asamanubhāsantiyā paṭinissajjantiyā
ummattikāya ādikammikāyāti.
--------
Tuvaṭṭavaggassa sattamasikkhāpadaṁ

[283] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena 1 antoraṭṭhe
sāsaṅkasammate sappaṭibhaye asatthikā cārikaṁ caranti. Dhuttā dūsenti.
Yā tā bhikkhuniyo appicchā .pe. Tā ujjhāyanti khīyanti
vipācenti kathaṁ hi nāma bhikkhuniyo antoraṭṭhe sāsaṅkasammate
sappaṭibhaye asatthikā cārikaṁ carissantīti .pe. Saccaṁ kira bhikkhave
bhikkhuniyo antoraṭṭhe sāsaṅkasammate sappaṭibhaye asatthikā cārikaṁ
carantīti. Saccaṁ bhagavāti. Vigarahi buddho bhagavā kathaṁ hi nāma
bhikkhave bhikkhunīyo antoraṭṭhe sāsaṅkasammate sappaṭibhaye asatthikā
cārikaṁ carissanti netaṁ bhikkhave appasannānaṁ vā pasādāya .pe.
1 Ma. Yu. etthantare bhikkhuniyoti dissati.
Evañca pana bhikkhave bhikkhuniyo imaṁ sikkhāpadaṁ uddisantu yā
pana bhikkhunī antoraṭṭhe sāsaṅkasammate sappaṭibhaye asatthikā cārikaṁ
careyya pācittiyanti.

[284] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Antoraṭṭheti yassa vijite viharati
tassa raṭṭhe. Sāsaṅkaṁ nāma tasmiṁ magge corānaṁ niviṭṭhokāso
dissati bhattokāso dissati ṭhitokāso dissati nisinnokāso dissati
nipannokāso dissati. Sappaṭibhayaṁ nāma tasmiṁ magge corehi
manussā hatā dissanti viluttā dissanti ākoṭitā dissanti.
Asatthikā nāma vinā satthena. Cārikaṁ careyyāti kukkuṭasaṁpāte
gāme gāmantare gāmantare āpatti pācittiyassa. Agāmake
araññe aḍḍhayojane aḍḍhayojane āpatti pācittiyassa.

[285] Anāpatti satthena saha gacchati kheme appaṭibhaye
gacchati āpadāsu ummattikāya ādikammikāyāti.
--------
Tuvaṭṭavaggassa aṭṭhamasikkhāpadaṁ

[286] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhikkhuniyo
tiroraṭṭhe sāsaṅkasammate sappaṭibhaye asatthikā cārikaṁ caranti. Dhuttā
dūsenti. Yā tā bhikkhuniyo appicchā .pe. Tā ujjhāyanti
Khīyanti vipācenti kathaṁ hi nāma bhikkhuniyo tiroraṭṭhe sāsaṅkasammate
sappaṭibhaye asatthikā cārikaṁ carissantīti .pe. Saccaṁ
kira bhikkhave bhikkhuniyo tiroraṭṭhe sāsaṅkasammate sappaṭibhaye asatthikā
cārikaṁ carantīti. Saccaṁ bhagavāti. Vigarahi buddho bhagavā kathaṁ
hi nāma bhikkhave bhikkhuniyo tiroraṭṭhe sāsaṅkasammate sappaṭibhaye
asatthikā cārikaṁ carissanti netaṁ bhikkhave appasannānaṁ vā pasādāya
.pe. Evañca pana bhikkhave bhikkhuniyo imaṁ sikkhāpadaṁ uddisantu
yā pana bhikkhunī tiroraṭṭhe sāsaṅkasammate sappaṭibhaye asatthikā
cārikaṁ careyya pācittiyanti.

[287] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Tiroraṭṭheti yassa vijite
viharati taṁ ṭhapetvā aññassa raṭṭhe. Sāsaṅkaṁ nāma tasmiṁ
magge corānaṁ niviṭṭhokāso dissati bhuttokāso dissati ṭhitokāso
dissati nisinnokāso dissati nipannokāso dissati.
Sappaṭibhayaṁ nāma tasmiṁ magge corehi manussā hatā dissanti
viluttā dissanti ākoṭitā dissanti. Asatthikā nāma vinā
satthena. Cārikaṁ careyyāti kukkuṭasaṁpāte gāme gāmantare
gāmantare āpatti pācittiyassa. Agāmake araññe aḍḍhayojane
aḍḍhayojane āpatti pācittiyassa.

[288] Anāpatti satthena saha gacchati kheme appaṭibhaye
Gacchati āpadāsu ummattikāya ādikammikāyāti.
--------
Tuvaṭṭavaggassa navamasikkhāpadaṁ

[289] Tena samayena buddho bhagavā rājagahe viharati veḷuvane
kalandakanivāpe. Tena kho pana samayena bhikkhuniyo antovassaṁ
cārikaṁ caranti. Manussā ujjhāyanti khīyanti vipācenti kathaṁ
hi nāma bhikkhuniyo antovassaṁ cārikaṁ carissanti haritāni tiṇāni
sammaddantā ekindriyaṁ jīvaṁ viheṭhentā bahū khuddake pāṇe
saṅghāṭaṁ āpādentāti. Assosuṁ kho bhikkhuniyo tesaṁ manussānaṁ
ujjhāyantānaṁ khīyantānaṁ vipācentānaṁ. Yā tā bhikkhuniyo
appicchā .pe. Tā ujjhāyanti khīyanti vipācenti kathaṁ hi nāma
bhikkhuniyo antovassaṁ cārikaṁ carissantīti .pe. Saccaṁ kira bhikkhave
bhikkhuniyo antovassaṁ cārikaṁ carantīti. Saccaṁ bhagavāti. Vigarahi
buddho bhagavā kathaṁ hi nāma bhikkhave bhikkhuniyo antovassaṁ
cārikaṁ carissanti netaṁ bhikkhave appasannānaṁ vā pasādāya .pe.
Evañca pana bhikkhave bhikkhuniyo imaṁ sikkhāpadaṁ uddisantu yā
pana bhikkhunī antovassaṁ cārikaṁ careyya pācittiyanti.