[320] Anissajjite anissajjitasaññā pakkamati āpatti
pācittiyassa anissajjite vematikā pakkamati āpatti pācittiyassa.
1 Ma. Yu. pakkāmeti. 2 atikkāmentiyā evaṁ sabbattha ñātabbaṁ.
Anissajjite nissajjitasaññā pakkamati āpatti pācittiyassa.
Akavāṭabaddhaṁ anissajjitvā pakkamati āpatti dukkaṭassa.
Nissajjite anissajjitasaññā āpatti dukkaṭassa. Nissajjite
vematikā āpatti dukkaṭassa. Nissajjite nissajjitasaññā
anāpatti.

[321] Anāpatti nissajjitvā pakkamati sati antarāye
pariyesitvā na labhati gilānāya āpadāsu ummattikāya
ādikammikāyāti.
--------
Cittāgāravaggassa navamasikkhāpadaṁ

[322] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhuniyo tiracchānavijjaṁ pariyāpuṇanti. Manussā ujjhāyanti khīyanti
vipācenti kathaṁ hi nāma bhikkhuniyo tiracchānavijjaṁ pariyāpuṇissanti
seyyathāpi gihiniyo kāmabhoginiyoti. Assosuṁ kho bhikkhuniyo tesaṁ
manussānaṁ ujjhāyantānaṁ khīyantānaṁ vipācentānaṁ. Yā tā bhikkhuniyo
appicchā .pe. Tā ujjhāyanti khīyanti vipācenti kathaṁ
hi nāma chabbaggiyā bhikkhuniyo tiracchānavijjaṁ pariyāpuṇissantīti.
.pe. Saccaṁ kira bhikkhave chabbaggiyā bhikkhuniyo tiracchānavijjaṁ
pariyāpuṇantīti. Saccaṁ bhagavāti. Vigarahi buddho bhagavā kathaṁ
Hi nāma bhikkhave chabbaggiyā bhikkhuniyo tiracchānavijjaṁ pariyāpuṇissanti
netaṁ bhikkhave appasannānaṁ vā pasādāya .pe. Evañca
pana bhikkhave bhikkhuniyo imaṁ sikkhāpadaṁ uddisantu yā pana bhikkhunī
tiracchānavijjaṁ pariyāpuṇeyya pācittiyanti.

[323] Yā panāti yā yādisā .pe. Bhikkhunīti .pe. Ayaṁ imasmiṁ
atthe adhippetā bhikkhunīti. Tiracchānavijjā nāma yaṅkiñci bāhirakaṁ
anatthasañhitaṁ. Pariyāpuṇeyyāti padena pariyāpuṇāti pade
pade āpatti pācittiyassa. Akkharāya pariyāpuṇāti akkharakkharāya
āpatti pācittiyassa.

[324] Anāpatti lekhaṁ pariyāpuṇāti dhāraṇaṁ pariyāpuṇāti
guttatthāya parittaṁ pariyāpuṇāti ummattikāya ādikammikāyāti.
--------
Cittāgāravaggassa dasamasikkhāpadaṁ

[325] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhuniyo tiracchānavijjaṁ vācenti. Manussā ujjhāyanti khīyanti
vipācenti kathaṁ hi nāma bhikkhuniyo tiracchānavijjaṁ vācessanti
seyyathāpi gihiniyo kāmabhoginiyoti. Assosuṁ kho bhikkhuniyo tesaṁ
manussānaṁ ujjhāyantānaṁ khīyantānaṁ vipācentānaṁ. Yā tā bhikkhuniyo
appicchā .pe. Tā ujjhāyanti khīyanti vipācenti kathaṁ hi nāma
Chabbaggiyā bhikkhuniyo tiracchānavijjaṁ vācessantīti .pe. Saccaṁ kira
bhikkhave chabbaggiyā bhikkhuniyo tiracchānavijjaṁ vācentīti. Saccaṁ
bhagavāti. Vigarahi buddho bhagavā kathaṁ hi nāma bhikkhave chabbaggiyā
bhikkhuniyo tiracchānavijjaṁ vācessanti netaṁ bhikkhave appasannānaṁ
vā pasādāya .pe. Evañca pana bhikkhave bhikkhuniyo imaṁ sikkhāpadaṁ
uddisantu yā pana bhikkhunī tiracchānavijjaṁ vāceyya pācittiyanti.

[326] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Tiracchānavijjā nāma yaṅkiñci
bāhirakaṁ anatthasañhitaṁ. Vāceyyāti padena vāceti pade pade
āpatti pācittiyassa. Akkharāya vāceti akkharakkharāya āpatti
pācittiyassa.

[327] Anāpatti lekhaṁ vāceti dhāraṇaṁ vāceti guttatthāya
parittaṁ vāceti ummattikāya ādikammikāyāti.
Cittāgāravaggo pañcamo.
-------
Ārāmavaggassa paṭhamasikkhāpadaṁ

[328] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena sambahulā
bhikkhū gāmakāvāse ekacīvarā cīvarakammaṁ karonti. Bhikkhuniyo
anāpucchā ārāmaṁ pavisitvā yena te bhikkhū tenupasaṅkamiṁsu. Bhikkhū
Ujjhāyanti khīyanti vipācenti kathaṁ hi nāma bhikkhuniyo anāpucchā
ārāmaṁ pavisissantīti .pe. Saccaṁ kira bhikkhave bhikkhuniyo
anāpucchā ārāmaṁ pavisantīti. Saccaṁ bhagavāti. Vigarahi buddho
bhagavā kathaṁ hi nāma [1]- bhikkhuniyo anāpucchā ārāmaṁ pavisissanti
netaṁ bhikkhave appasannānaṁ vā pasādāya .pe. Evañca pana
bhikkhave bhikkhuniyo imaṁ sikkhāpadaṁ uddisantu yā pana bhikkhunī
anāpucchā ārāmaṁ paviseyya pācittiyanti. Evañcidaṁ bhagavatā
bhikkhunīnaṁ sikkhāpadaṁ paññattaṁ hoti.

[329] Tena kho pana samayena te bhikkhū tamhā āvāsā pakkamiṁsu.
Bhikkhuniyo ayyā pakkantāti ārāmaṁ nāgamaṁsu. Athakho te bhikkhū
punadeva taṁ āvāsaṁ paccāgacchiṁsu. Bhikkhuniyo ayyā āgatāti
āpucchā ārāmaṁ pavisitvā yena te bhikkhū tenupasaṅkamiṁsu
upasaṅkamitvā te bhikkhū abhivādetvā ekamantaṁ aṭṭhaṁsu. Ekamantaṁ
ṭhitā kho tā bhikkhuniyo te bhikkhū etadavocuṁ kissa tumhe bhaginiyo
ārāmaṁ neva sammajjittha na pānīyaṁ paribhojanīyaṁ upaṭṭhapitthāti.
Bhagavatā ayyā sikkhāpadaṁ paññattaṁ [2]- na anāpucchā ārāmo
pavisitabboti tena mayaṁ nāgamimhāti. Bhagavato etamatthaṁ ārocesuṁ.
Anujānāmi bhikkhave santaṁ bhikkhuṁ āpucchā ārāmaṁ pavisituṁ. Evañca
pana bhikkhave bhikkhuniyo imaṁ sikkhāpadaṁ uddisantu yā pana bhikkhunī
santaṁ bhikkhuṁ anāpucchā ārāmaṁ paviseyya pācittiyanti.
1 Ma. Yu. etthantare bhikkhaveti ālapanapadaṁ dissati. 2 hotīti padaṁ dissati.
Evañcidaṁ bhagavatā bhikkhunīnaṁ sikkhāpadaṁ paññattaṁ hoti.