[2137] Kacci te sādisī bhariyā assavā piyabhāṇinī
puttarūpayasūpetā tava chandavasānugā.

[2138] Atho me sādisī bhariyā assavā piyabhāṇinī
puttarūpayasūpetā mama chandavasānugā.

[2139] Kacci te bahavo puttā sujātā raṭṭhavaḍḍhana
paññājavena sampannā sammodanti tato tato.

[2140] Sataṁ eko ca me puttā dhataraṭṭha mayā sutā
tesaṁ tvaṁ kiccamakkhāhi nāvarujjhanti 1 te vaco.

[2141] Upapannopi ce hoti jātiyā vinayena vā
atha pacchā kurute yogaṁ kicce āvāsu 2 sīdati.
Tassa saṁhīrapaññassa vivaro jāyate mahā
rattimandhova rūpāni thūlāni manupassati.
Asāre sārayogaññū matiṁ natveva vindati
sarabhova giriduggasmiṁ antarāyeva sīdati.
Hīnajaccopi ce hoti uṭṭhātā dhitimā naro
ācārasīlasampanno nise aggīva bhāsati.
Etaṁ ve 3 upamaṁ katvā putte vijjāsu ṭhāpaya 4
saṁvirūḷhetha medhāvī khette bījaṁva vuṭṭhiyāti.
Haṁsajātakaṁ chaṭṭhaṁ
1 Sī. Yu. nāvarajjhanti. 2 Ma. kicche āpāsu. 3 Ma. me. 4 Ma. vācaya.
7 Sattigumbajātakaṁ

[2142] Migaluddo mahārājā pañcālānaṁ rathesako
nikkhanto saha senāya ogaṇo vanamāgamā.
Tatthaddasa 1 araññasmiṁ takkarānaṁ kuṭiṁ kataṁ
tasmā 2 kuṭiyā nikkhamma suvo luddāni bhāsati.
Sampannavāhano poso yuvā sammaṭṭhakuṇḍalī 3
sobhati lohituṇhīso divā suriyova bhāsati.
Majjhantike sampatike sutto rājā sasārathi
handassābharaṇaṁ sabbaṁ gaṇhāma sahasā 4 mayaṁ.
Nissivepi 5 rahodāni sutto rājā sasārathi
ādāya vatthaṁ maṇikuṇḍalañca
hantvāna sākhāhi avattharāma.

[2143] Kinnu ummattarūpova sattigumba pabhāsasi
durāsadā hi rājāno aggi pajjalito yathā.

[2144] Atha tvaṁ patikolumba matto thullāni gajjasi
mātari mayha naggāya kiṁ nu tvaṁ vijigucchase.

[2145] Uṭṭhehi samma taramāno rathaṁ yojehi sārathi
sakuṇo me na ruccati aññaṁ gacchāma assamaṁ.

[2146] Yutto ratho mahārāja yutto ca balavāhano
adhitiṭṭha mahārāja aññaṁ gacchāma assamaṁ.
1 Ma. tatthaddasā. 2 Ma. tassā. 3 Ma. - kuṇḍalo. 4 Ma. sāhasā.
5 Ma. nisīthepi.