[2117] Evaṁ ānandito hotu saha dārehi luddako
yathā mayajja nandāma disvā rohanamāgataṁ.

[2118] Nanu tvaṁ avaca ludda migacammāni āhariṁ
atha kena nu vaṇṇena migacammāni nāhari.

[2119] Āgamañceva 1 hatthatthaṁ kūṭapāsañca so migo
abajjhi taṁ 2 migarājaṁ tañca muttā upāsare.
Tassa me ahu saṁvego abbhūto lomahaṁsano
imañcāhaṁ migaṁ haññe ajja hissāmi jīvitaṁ.

[2120] Kīdisā te migā ludda kīdisā dhammikā migā
kathaṁvaṇṇā kathaṁsīlā bāḷhaṁ kho ne pasaṁsasi.

[2121] Odātasiṅgā sucivālā jātarūpatacūpamā
pādā lohitakā tesaṁ añjitakkhā manoramā.

[2122] Edisā te migā deva edisā dhammikā migā
mātāpetibharā deva na te so abhihārayiṁ 3 .

[2123] Dammi nikkhasataṁ ludda thūlañca maṇikuṇḍalaṁ
caturassañca 4 pallaṅkaṁ ummāpupphasirinnibhaṁ.
1 Ma. āgamāceva. 2 Yu. tañca. 3 Sī. abhihārayuṁ. Ma. abhihārituṁ. Yu. abhihārayaṁ.
4 Ma. catussadañca.
Dve ca sādisiyo bhariyā usabhañca gavaṁsataṁ
dhammena rajjaṁ kāressaṁ bahukāro mesa luddaka.
Kasivaṇijjā 1 iṇadānaṁ uñchācariyā ca luddaka
etena dāraṁ posehi mā pāpaṁ akarī punāti 2 .
Rohanamigajātakaṁ pañcamaṁ.
----------
6 Haṁsajātakaṁ 3

[2124] Ete haṁsā pakkamanti vaṅkaṅgā bhayameritā
harittaca hemavaṇṇa kāmaṁ sumukha pakkama.
Ohāya maṁ ñātigaṇā ekaṁ pāsavasaṁ gataṁ
anapekkhamānā gacchanti kiṁ eko avahiyyasi.
Pateva patataṁ seṭṭha natthi bandhe sahāyakā
mā anīghāya hāpesi kāmaṁ sumukha pakkama.

[2125] Nāhaṁ dukkhaparetoti dhataraṭṭha tuvaṁ jahe
jīvitaṁ maraṇaṁ vā me tayā saddhiṁ bhavissati.

[2126] Etadariyassa kalyāṇaṁ yaṁ tvaṁ sumukha bhāsasi
tañca vīmaṁsamānāhaṁ 4 patate taṁ avassajiṁ.