[2097] Parassa vā attano vāpi hetu
na bhāsati alikaṁ bhūripañño
so pūjito hoti sabhāya majjhe
pacchāpi so suggatigāmi hoti
etampi disvāna ahaṁ vadāmi
paññova seyyo na yasassi bālo.

[2098] Hatthigavassā maṇikuṇḍalā ca
nāriyo 1 ca iddhesu kulesu jātā
sabbāva tā upabhogā bhavanti
iddhassa posassa aniddhimanto
etampi disvāna ahaṁ vadāmi
pañño nihīno sirimāva seyyo.

[2099] Asaṁvihitakammantaṁ bālaṁ dummantimantinaṁ 2
sirī jahati dummedhaṁ jiṇṇaṁva urago tacaṁ
etampi disvāna ahaṁ vadāmi
paññova seyyo na yasassi bālo.

[2100] Pañca paṇḍitā mayaṁ bhadante
1 Ma. thiyo. 2 Ma. dummedhamantinaṁ.
Sabbe pañjalikā upaṭṭhitā taṁ 1
tvaṁ no abhibhuyya issarosi
sakkova bhūtappati devarājā
etampi disvāna ahaṁ vadāmi
pañño nihīno sirimāva seyyo.

[2101] Dāsova paññassa yasassi bālo
atthesu jātesu tathāvidhesu
yaṁ paṇḍito nipuṇaṁ saṁvidheti
sammohamāpajjati tattha bālo
etampi disvāna ahaṁ vadāmi
paññova seyyo na yasassi bālo.

[2102] Addhā hi paññāva sataṁ pasatthā
kantā sirī bhogaratā manussā
ñāṇañca buddhānamatulyarūpaṁ
paññaṁ na acceti sirī kadāci.

[2103] Yantaṁ apucchimha akittayī no
mahosadha kevaladhammadassi
gavaṁsahassaṁ usabhañca nāgaṁ
ājaññayutte ca rathe dasa ime
pañhassa veyyākaraṇena tuṭṭho
1 Ma. ayaṁ pāṭho natthi.
Dadāmi te gāmavarāni soḷasāti.
Sirimandajātakaṁ catutthaṁ.
-----------
5 Rohanamigajātakaṁ 1

[2104] Ete yūthā paṭiyanti bhītā maraṇā 2 cittaka
gaccha tuvaṁpi mā kaṅkhi jīvissanti tayā saha.

[2105] Nāhaṁ rohana 3 gacchāmi hadayaṁ me avakassati
na taṁ ahaṁ jahissāmi idha hessāmi 4 jīvitaṁ.
Te hi nūna marissanti andhā apariṇāyakā
gaccha tuvaṁpi mā kaṅkhi jīvissanti tayā saha.
Nāhaṁ rohana gacchāmi hadayaṁ me avakassati
na taṁ bandhaṁ jahissāmi idha hessāmi jīvitaṁ.

[2106] Gaccha bhīru palāyassu kūṭe bandhosmi āyase
gaccha tuvaṁpi mā kaṅkhi jīvissanti tayā saha.