[2067] Kenānusiṭṭho idhamāgatosi
vanibbaka cakkhupathāni yācituṁ
suduccajaṁ yācasi uttamaṅgaṁ
yamāhu nettaṁ purisena duccajaṁ.

[2068] Yamāhu devesu sujampatīti
maghavāti naṁ āhu manussaloke
tenānusiṭṭho idhamāgatosmi
vanibbako cakkhupathāni yācituṁ.
Vanibbako 1 mayha vaṇiṁ anuttaraṁ
dadāhi me 2 cakkhupathāni yācito
dadāhi me cakkhupathaṁ anuttaraṁ
yamāhu nettaṁ purisena duccajaṁ.
Yena atthena āgañchi yamatthamabhipatthayaṁ
te te ijjhantu saṅkappā labha cakkhūni brāhmaṇa.
Ekante yācamānassa ubhayāni dadāmahaṁ
sa cakkhumā gaccha janassa pekkhato
yadicchase tvaṁ tadate samijjhatu.
1 Ma. vanibbato. 2 Ma. te.

[2069] Mā no deva adā cakkhuṁ mā no sabbe parakkari 1
dhanaṁ dehi mahārāja muttā veḷuriyā bahū.
Yutte deva rathe dehi ājāniye alaṅkate 2
nāge dehi mahārāja hemakappanivāsase.
Yathā taṁ sīviyo sabbe sayoggā sarathā sadā
samantā parikareyyuṁ evaṁ dehi rathesabha.

[2070] Yo ve dassanti vatvāna adāne kurute mano
bhūmyaṁ so patitaṁ pāsaṁ gīvāyaṁ paṭimuñcati.
Yo ve dassanti vatvāna adāne kurute mano
pāpā pāpataro hoti sampatto yamasādhanaṁ.
Yañhi yāce tañhi dade yaṁ na yāce na taṁ dade
svāhaṁ tameva dassāmi yaṁ maṁ yācati brāhmaṇo.

[2071] Āyuṁ nu vaṇṇaṁ nu sukhaṁ balaṁ nu
kiṁ patthayāno nu janinda desi
kathañhi rājā sivinaṁ anuttaro
cakkhūni dajjā paralokahetu.

[2072] Navāhametaṁ yasasā dadāmi
na puttamicche na dhanaṁ na raṭṭhaṁ
satañca dhammo carito purāṇo
icceva dāne ramati 3 mano mama.
1 Ma. parākari. 2 Ma. calaṅkate. 3 Ma. ramate.

[2073] Na 1 me dessā ubho cakkhū attānaṁ me na dessiyaṁ
sabbaññutaṁ piyaṁ mayhaṁ tasmā cakkhumadāsihaṁ 1 .

[2074] Sakhā ca mitto ca mamāsi sīvika
susikkhito sādhu karohi me vaco
uddharitvā cakkhūni mama jigiṁsato
hatthesu ṭhapehi vanibbakassa.

[2075] Codito sīvirājena sīviko vacanaṁ karo
rañño cakkhūni uddharitvā brāhmaṇassūpanāmayi
sacakkhu brāhmaṇo āsi andho rājā upāvisi.

[2076] Tato so katipāhassa uparūḷhesu cakkhusu
sutaṁ āmantayi rājā sīvīnaṁ raṭṭhavaḍḍhano.
Yojehi sārathi yānaṁ yuttañca paṭivedaya
uyyānabhūmiṁ gacchāma pokkharaññe vanāni ca.
So ca pokkharaṇītīre pallaṅkena upāvisi
tassa sakko pāturahu devarājā sujampati.