[2017] Apetā te ca brāhmaññā (iti rājā ca korabyo)
na te vuccanti brāhmaṇā
aññe vidhūra pariyesa sīlavante bahussute
virate methunā dhammā ye me bhuñjeyyu bhojanaṁ
dakkhiṇaṁ samma dassāma yattha dinnaṁ mahapphalaṁ.

[2018] Araññe kuṭikaṁ katvā kūṭāni kārayanti te
sasaviḷāre bādhenti āgodhā macchakacchapaṁ
te luddakasamā rāja 1 tepi vuccanti brāhmaṇā
akkhātā te mahārāja tādise nipatāmase.

[2019] Apetā te ca brāhmaññā (iti rājā ca korabyo)
na te vuccanti brāhmaṇā
aññe vidhūra pariyesa sīlavante bahussute
virate methunā dhammā ye me bhuñjeyyu bhojanaṁ
dakkhiṇaṁ samma dassāma yattha dinnaṁ mahapphalaṁ.

[2020] Aññe dhanassa kāmā hi heṭṭhā mañce pasakkhitā 2
rājāno upari nhāyanti somayāge upaṭṭhite
malamajjasamā 3 rāja tepi vuccanti brāhmaṇā
akkhātā te mahārāja tādise nipatāmase.
1 Sī. Yu. luddakā te mahārāja. 2 Ma. pasakkitā. 3 malamajjana-malamajjaka-itipi.

[2021] Apetā te ca brāhmaññā (iti rājā ca korabyo)
na te vuccanti brāhmaṇā
aññe vidhūra pariyesa sīlavante bahussute
virate methunā dhammā ye me bhuñjeyyu bhojanaṁ
dakkhiṇaṁ samma dassāma yattha dinnaṁ mahapphalaṁ.

[2022] Atthi kho brāhmaṇā deva sīlavanto bahussutā
viratā methunā dhammā ye te bhuñjeyyu bhojanaṁ.
Ekañca bhattaṁ bhuñjanti na ca majjaṁ pivanti te
akkhātā te mahārāja tādise nipatāmase.

[2023] Ete kho brāhmaṇā vidhūra sīlavanto bahussutā
ete vidhūra pariyesa khippañca ne nimantayāti.
Dasabrāhmaṇajātakaṁ dvādasamaṁ.
----------------
13 Bhikkhāparamparajātakaṁ

[2024] Sukhumālarūpaṁ disvā raṭṭhā vivanamāgataṁ
kūṭāgāravarūpetaṁ mahāsayanamupocitaṁ 1
tassa te pemakenāhaṁ adāsiṁ vaḍḍhamodanaṁ 2
sālīnaṁ vicittaṁ bhattaṁ sucimaṁsūpasecanaṁ 3
taṁ tvaṁ bhattaṁ paṭiggayha brāhmaṇassa adāpayi 4
1 mahāsayanamupāsitantipi. 2 Sī. Yu. baddhamodanaṁ. 3 Ma. suciṁ maṁsūpasecanaṁ.
evamuparipi. 4 Ma. adāsayi.
Attānaṁ anasitvāna koyaṁ dhammo namatthu te.

[2025] Ācariyo brāhmaṇo mayhaṁ kiccākiccesu vyāvaṭo
garu ca āmantaniyo ca dātumarahāmi bhojanaṁ.

[2026] Brāhmaṇaṁdāni pucchāmi gotamaṁ rājapūjitaṁ
rājā te bhattaṁ pādāsi sucimaṁsūpasecanaṁ
taṁ tvaṁ bhattaṁ paṭiggayha isissa bhojanaṁ adā
akhettaññūsi dānassa koyaṁ dhammo namatthu te.