[1987] Sādhu sambahulā ñātī api rukkhā araññajā
sūkarehi samaggehi byaggho ekāyane hato.

[1988] Brāhmaṇañceva byagghañca ubho hantvāna sūkarā
ānandino pamoditā 1 mahānādamanādisuṁ 2 .

[1989] Te sudumbaramūlasmiṁ 3 sūkarā susamāgatā
tacchakaṁ abhisiñciṁsu tvaṁ no rājāsi issaroti.
Tacchasūkarajātakaṁ navamaṁ.
------------
10 Mahāvāṇijajātakaṁ

[1990] Vāṇijā samitiṁ katvā nānāraṭṭhato āgatā
dhanahārā pakkamiṁsu ekaṁ katvāna gāmaṇiṁ.
Te taṁ kantāramāgamma appabhakkhaṁ anūdakaṁ 4
mahānigrodhamaddakkhuṁ sītacchāyaṁ manoramaṁ.
Te ca tattha nisīditvā tassa rukkhassa chādiyā
vāṇijā samacintesuṁ bālā mohena pārutā.
Allāyate 5 ayaṁ rukkho api vārīva 6 sandati
iṅghassa purimaṁ sākhaṁ mayaṁ chindāma vāṇijā.
Sā ca chinnāva pagghari acchaṁ vāri 7 anāvilaṁ
1 Ma. pamuditā. 2 Ma. mahānādaṁ panādisuṁ. 3 Ma. te su udumbaramūlasmiṁ.
4 Ma. anodakaṁ. 5 Sī. Yu. addāyate. 6 Sī. Yu. vārī ca. 7 Ma. vārī.
Te tattha nhātvā pivitvā yāvaticchiṁsu vāṇijā.
Dutiyaṁ samacintesuṁ bālā mohena pārutā
iṅghassa dakkhiṇaṁ sākhaṁ mayaṁ chindāma vāṇijā.
Sā ca chinnāva pagghari sālimaṁsodanaṁ bahuṁ
appodavaṇṇe kummāse siṅgividalasūpiyo
te tattha bhutvā khāditvā yāvaticchiṁsu vāṇijā.
Tatiyaṁ samacintesuṁ bālā mohena pārutā
iṅghassa pacchimaṁ sākhaṁ mayaṁ chindāma vāṇijā.
Sā ca chinnāva pagghari nāriyo samalaṅkatā
vicittavatthābharaṇā āmuttamaṇikuṇḍalā.
Apisu vāṇijā ekā nāriyo pañcavīsati
samantā parikariṁsu 1 tassa rukkhassa chādiyā
te tāhi parivāretvā 2 yāvaticchiṁsu vāṇijā.
Catutthaṁ samacintesuṁ bālā mohena pārutā
iṅghassa uttaraṁ sākhaṁ mayaṁ chindāma vāṇijā.
Sā ca chinnāva pagghari muttā veḷuriyā bahū
rajataṁ jātarūpañca kuttiyo paṭiyāni ca
kāsikāni ca vatthāni uddhiyāni 3 ca kambalā
te tattha bhāre bandhitvā yāvaticchiṁsu vāṇijā.
Pañcamaṁ samacintesuṁ bālā mohena pārutā
1 Ma. parivāriṁsu. 2 Ma. paricāretvā. 3 uddiyāni. Sī. Yu. uddiyāne ca
kammabale.
Iṅghassa mūle 1 chindāma api bhiyyo labhāmase.
Athuṭṭhahi satthavāho yācamāno katañjali
nigrodho kiṁ aparajjhati 2 vāṇijā bhaddamatthu te.
Vāridā purimā sākhā annapānañca dakkhiṇā
nāridā pacchimā sākhā sabbakāme ca uttarā
nigrodho kiṁ aparajjhati 2 vāṇijā bhaddamatthu te.
Yassa rukkhassa chāyāya nisīdeyya sayeyya vā
na tassa sākhaṁ bhañjeyya mittadubbho hi pāpako.
Te ca tassa anāditvā 3 ekassa vacanaṁ bahū
nisitāhi kuṭhārīhi mūlato naṁ upakkamuṁ.

[1991] Tato nāgā nikkhamiṁsu sannaddhā pañcavīsati
dhanuggahānaṁ tisatā chasahassā ca cammino 4 .

[1992] Ete hanatha bandhatha mā vo muñcittha jīvitaṁ
ṭhapetvā satthavāhaṁva sabbe bhasmaṁ karotha ne.

[1993] Tasmāhi paṇḍito poso sampassaṁ atthamattano
lobhassa na vasaṁ gacche haneyya disakaṁ manaṁ 5
evamādīnavaṁ 6 ñatvā taṇhā dukkhassa sambhavaṁ
vītataṇho anādāno sato bhikkhu paribbajeti.
Mahāvāṇijajātakaṁ dasamaṁ.
1 Sī. Yu. mūlaṁ. 2 Sī. aparajjhatha. Ma. parajjhati. 3 Ma. tasasānādiyitvā.
4 Ma. vammino. 5 Ma. haneyyārisakaṁ manaṁ. 6 Sī. Yu. eta....
11 Sādhinarājajātakaṁ

[1994] Abbhūto vata lokasmiṁ uppajji lomahaṁsano
dibbo ratho pāturahu vedehassa yasassino.

[1995] Devaputto mahiddhiko mātali devasārathi
nimantayittha rājānaṁ vedehaṁ mithilaggahaṁ
ehimaṁ rathamāruyha rāja seṭṭha disampati
devā dassanakāmā te tāvatiṁsā saindakā
saramānā hi te devā sudhammāyaṁ samacchare.
Tato ca rājā sādhino vedeho mithilaggaho 1
sahassayuttaṁ abhiruyha 2 agā devāna santike
(sahassayuttaṁ hayavāhiṁ dibbayānamadhiṭṭhito
yāyamāno mahārājā addasa devasabhaṁ idaṁ 3 )
taṁ devā paṭinandiṁsu disvā rājānamāgataṁ
svāgatante mahārāja atho te adurāgataṁ
nisīdadāni rājisi devarājassa santike.
Sakkopi paṭinandittha vedehaṁ mithilaggahaṁ
nimantayittha 4 kāmehi āsanena ca vāsavo
sādhu khosi anuppatto āvāsaṁ vasavattinaṁ
1 Sī. Yu. pamukho rathamāruhi. 2 Ma. sahassayuttamāruyha. 3 ayaṁ gāthā
sabbapotthakesu na dissati aṭṭhakathāyaṁ pana dissati. 4 Sī. Yu. nimantayī ca.
Vasa devesu rājisi sabbakāmasamiddhisu
tāvatiṁsesu devesu bhuñja kāme amānuse.

[1996] Ahaṁ pure saggagato ramāmi
naccehi gītehi ca vāditehi
sodāni ajja na ramāmi sagge
āyunnu khīṇaṁ 1 maraṇannu 2 santike
udāhu muḷhosmi janindaseṭṭha.