[1837] Sabbo loko paracittena 1 aticitto
sabbo loko cittavā samhi citte
paccekacittā puthu sabbasattā
kassīdha cittassa vase na vatte.

[1838] Tuṇhī ahu kiṁpuriso sabhariyo 2
yodāni byākāsi bhayassa bhīto
sodāni mutto sukhito arogo
vācā kirevatthavatī narānanti.
Takkāriyajātakaṁ aṭṭhamaṁ.
----------
9 Rurumigajātakaṁ 3

[1839] Tassa 4 gāmavaraṁ dammi nāriyo ca alaṅkatā
ko 5 me taṁ migamakkhāsi migānaṁ migamuttamaṁ.

[1840] Mayhaṁ gāmavaraṁ dehi nāriyo ca alaṅkatā
ahaṁ te migamakkhissaṁ migānaṁ migamuttamaṁ.

[1841] Etasmiṁ vanasaṇḍasmiṁ ambā sālā ca pupphitā
1 Ma. paricitto. 2 abhāṇisotipi. 3 Ma. rurumigarājajātakaṁ. 4 Sī. Yu. kassa.
5 Ma. yo. taṁ yuttataraṁ.
Indagopakasañchannā ettheso tiṭṭhati migo.

[1842] Dhanuṁ advejjhaṁ katvāna usuṁ sannayhupāgami 1
migo ca disvā rājānaṁ dūrato ajjhabhāsatha
āgamehi mahārāja mā maṁ vijjhi rathesabha
ko nu te idamakkhāsi ettheso tiṭṭhati migo.

[1843] Esa pāpacaro poso samma tiṭṭhati ārakā
so hi 2 me idamakkhāsi ettheso tiṭṭhati migo.

[1844] Saccaṁ kirevamāhaṁsu narā ekacciyā idha
kaṭṭhaṁ nipāvataṁ 3 seyyo na tvevekacciyo naro.

[1845] Kinnu ruru garahasi migānaṁ
kiṁ pakkhinaṁ kiṁ pana mānusānaṁ
bhayaṁ hi maṁ vindatinapparūpaṁ
sutvāna taṁ mānusi 4 bhāsamānaṁ.

[1846] Yamuddhariṁ vāhane vuyhamānaṁ
mahodake salile sīghasote
tatonidānaṁ bhayamāgataṁ mama
dukkho have rāja asabbhi saṅgamo.