[1817] Varañce me ado sakka sabbabhūtānamissara
dhīraṁ passe suṇe dhīraṁ dhīrena saha saṁvase
dhīrenallāpasallāpaṁ taṁ kare tañca rocaye.

[1818] Kinnu te akaraṁ dhīro vada kassapa kāraṇaṁ
kena kassapa dhīrassa dassanaṁ abhikaṅkhasi.

[1819] Nayaṁ nayati medhāvī adhurāyaṁ na yuñjati
sunayo seyyaso hoti sammā vutto na kuppati
vinayaṁ so pajānāti sādhu tena samāgamo.

[1820] Etasmiṁ te sulapite paṭirūpe subhāsite
Varaṁ kassapa te dammi yaṅkiñci manasicchasi.

[1821] Varañce me ado sakka sabbabhūtānamissara
tato ratyā vivasane 1 suriyassuggamanaṁ pati
dibbā bhakkhā pātubhaveyyuṁ sīlavanto ca yācakā
dadato me na khīyetha datvā nānutapeyyahaṁ
dadaṁ cittaṁ pasādeyyaṁ etaṁ sakka varaṁ vare.

[1822] Etasmiṁ te sulapite paṭirūpe subhāsite
varaṁ kassapa te dammi yaṅkiñci manasicchasi.

[1823] Varañca me ado sakka sabbabhūtānamissara
na maṁ puna upeyyāsi etaṁ sakka varaṁ vare.

[1824] Bahūhi vattacariyāhi narā ca atha nāriyo
dassanaṁ abhikaṅkhanti kinnu me dassane bhayaṁ.

[1825] Taṁ tādisaṁ devavaṇṇaṁ 2 sabbakāmasamiddhinaṁ
disvā tapo pamajjeyyaṁ 3 etaṁ te dassane bhayanti.
Akittijātakaṁ sattamaṁ.
---------
8 Takkāriyajātakaṁ

[1826] Ahameva dubbhāsitaṁ bhāsi bālo
bhekovaraññe ahimavhāyamāno
takkāriye sobbhamimaṁ patāmi
1 Ma. vivasāne. 2 Yu. devavaṇṇiṁ. 3 Ma. pamajjeyya.
Na kireva sādhu ativelabhāṇī.