[1807] Dukkho punabbhavo sakka sarīrassa ca bhedanaṁ
sammohamaraṇaṁ dukkhaṁ tasmā sammāmi vāsava.

[1808] Etasmiṁ te sulapite paṭirūpe subhāsite
varaṁ kassapa te dammi yaṅkiñci manasicchasi.

[1809] Varañce me ado sakka sabbabhūtānamissara
yena putte ca dāre ca dhanadhaññaṁ piyāni ca
laddhā narā na tappanti so lobho na mayī vase.

[1810] Etasmiṁ te sulapite paṭirūpe subhāsite
varaṁ kassapa te dammi yaṅkiñci manasicchasi.

[1811] Varañce me ado sakka sabbabhūtānamissara
khettaṁ vatthuṁ hiraññañca gavāssaṁ dāsaporisaṁ
yena jātena jīyanti so doso na mayī vase.

[1812] Etasmiṁ te sulapite paṭirūpe subhāsite
Varaṁ kassapa te dammi yaṅkiñci manasicchasi.

[1813] Varañce me ado sakka sabbabhūtānamissara
bālaṁ na passe na suṇe na ca bālena saṁvase
bālenallāpasallāpaṁ na kare na ca rocaye.

[1814] Kinnu te akaraṁ bālo vada kassapa kāraṇaṁ
kena kassapa bālassa dassanaṁ nābhikaṅkhasi.

[1815] Anayaṁ nayati dummedho adhurāyaṁ niyuñjati
dunnayo seyyaso hoti sammā vutto pakuppati
vinayaṁ so na jānāti sādhu tassa adassanaṁ.

[1816] Etasmiṁ te sulapite paṭirūpe subhāsite
varaṁ kassapa te dammi yaṅkiñci manasicchasi.