[1637] Kāmaṁ kāmayamānassa tassa ce taṁ samijjhati
addhā pītimano hoti laddhā macco yadicchati.

[1638] Kāmaṁ kāmayamānassa tassa ce taṁ samijjhati
tato naṁ aparaṁ kāme ghamme taṇhaṁva vindati.

[1639] Gavaṁva siṅgino siṅgaṁ vaḍḍhamānassa vaḍḍhati
evaṁ mandassa posassa bālassa avijānato
bhiyyo taṇhā pipāsā ca vaḍḍhamānassa vaḍḍhati.

[1640] Paṭhabyā sāliyavakaṁ gavāssaṁ 1 dāsaporisaṁ
datvāpi 2 nālamekassa iti viddhā 3 samaṁ care.
1 Ma. gavassaṁ. 2 Ma. datvā ca. 3 Ma. vidvā.

[1641] Rājā pasayha paṭhaviṁ vijitvā
sasāgarantaṁ mahimāvasanto
oraṁ samuddassa atittarūpo
pāraṁ samuddassapi patthayeva 1 .

[1642] Yāva anussaraṁ kāme manasā titti nājjhagā
tato nivattā paṭikkamma disvā
te ve tittā ye paññāya tittā.

[1643] Paññāya tittīnaṁ seṭṭhaṁ na so kāmehi tappati
paññāya tittaṁ purisaṁ taṇhā na kurute vasaṁ.

[1644] Apacinetheva kāmāni 2 appicchassa alolupo
samuddamatto puriso na so kāmehi tappati.

[1645] Rathakārova cammassa parikantaṁ upāhanaṁ
yaṁ yaṁ jahati 3 kāmānaṁ taṁ taṁ sampajjate sukhaṁ
sabbañce sukhamiccheyya sabbe kāme pariccaje.

[1646] Aṭṭha te bhāsitā gāthā sabbā honti sahassiyo
paṭiggaṇha mahābrahme sādhetaṁ tava bhāsitaṁ.