[1657] Ācariyamanusatthāraṁ sabbakāmarasāharaṁ
pitaraṁ atimaññissaṁ iti pacchānutappati.

[1658] Samaṇe brāhmaṇe cāpi sīlavante bahussute
na pubbe payirupāsissaṁ iti pacchānutappati.

[1659] Sādhu hoti tapo ciṇṇo santo ca payirupāsito
na ca pubbe tapo ciṇṇo iti pacchānutappati.

[1660] Yo ca etāni ṭhānāni yoniso paṭipajjati
karaṁ purisakiccāni sa pacchā nānutappatīti.
Janasandhajātakaṁ pañcamaṁ.
---------
6 Mahākaṇhajātakaṁ

[1661] Kaṇho kaṇho ca ghoro ca sukkadāṭho patāpavā 1
bandho 2 pañcahi rajjūhi kiṁ vīra sunakho tava.

[1662] Nāyaṁ migānamatthāya usinnara 3 bhavissati
manussānaṁ anayo hutvā tadā kaṇho pamokkhati.

[1663] Pattahatthā samaṇakā muṇḍā saṅghāṭipārutā
naṅgalehi kasissanti tadā kaṇho pamokkhati.

[1664] Tapassiniyo pabbajitā muṇḍā saṅghāṭipārutā
yadā loke gamissanti tadā kaṇho pamokkhati.
1 Ma. pabhāsavā. 2 Ma. baddho. 3 Sī. Yu. usīnara.

[1665] Dīghuttaroṭṭhā jaṭilā paṅkadantā rajassirā
iṇaṁ codaya 1 gacchanti tadā kaṇho pamokkhati.

[1666] Adhicca vede sāvittiṁ yaññaṁ tatrañca 2 brāhmaṇā
bhatikāya yajissanti tadā kaṇho pamokkhati.