[1607] Silesūpamā sikhīriva sabbabhakkhā
tikkhamāyā nadīriva sīghasotā
sevanti hetā piyamappiyañca
nāvā yathā orakūlaṁ parañca.

[1608] Na tā ekassa na dvinnaṁ āpaṇova pasārito
yo tā mayhanti maññeyya vātaṁ jālena bandhaye 1 .

[1609] Yathā nadī ca pantho ca pānāgāraṁ sabhā papā
evaṁ lokitthiyo nāma velā tāsaṁ na vijjati.

[1610] Ghatāsanasamā etā kaṇhasappasirūpamā
gāvo bahi tiṇasseva omasanti varaṁ varaṁ.

[1611] Ghatāsanaṁ kuñjaraṁ kaṇhasappaṁ
muddhābhisittaṁ pamudā 2 ca sabbā
ete naro niccayato 3 bhajetha
tesaṁ have dubbidu saccabhāvo.
1 ma bādhaye. 2 Ma. pamadā. 3. Sī. Yu. niccayatto.

[1612] Naccantavaṇṇā na bahūna kantā
na dakkhiṇā pamudā sevitabbā
na parassa bhariyā na dhanassa hetu
etitthiyo pañca na sevitabbāti.
Cullakuṇālajātakaṁ paṭhamaṁ.
----------
2 Bhaddasālajātakaṁ

[1613] Kā tvaṁ suddhehi vatthehi aghe vehāyasaṇṭhitā 1
kena tyassūni vattanti kuto taṁ bhayamāgataṁ.

[1614] Taveva deva vijite bhaddasāloti maṁ vidū
saṭṭhivassasahassāni tiṭṭhato pūjitassa me.

[1615] Kārayantā nagarāni agāre ca disampati
vividhe cāpi pāsāde na mante accamaññisuṁ
yatheva mante pūjesuṁ tatheva tvaṁpi pūjaya.

[1616] Tañca ahaṁ 2 na passāmi thūlaṁ kāyena te dumaṁ
ārohaparināhena abhirūposi jātiyā.