[1587] Taṁtaṁ ñātiparibyuḷhaṁ nānāratanamocitaṁ
amittā nappasahanti indaṁva asurādhipoti.
Saṁvarajātakaṁ aṭṭhamaṁ.
---------
9 Suppārakajātakaṁ

[1588] Ummujjanti nimujjanti manussā khuranāsikā
1 Yu. tesu. 2 Sī. Yu. nibaddhaṁ. 3 Sī. Yu. cāpi.
Suppārakantaṁ pucchāma samuddo katamo ayaṁ.

[1589] Bharukacchā 1 payātānaṁ vāṇijānaṁ dhanesinaṁ
nāvāya vippanaṭṭhāya khuramālīti vuccati.

[1590] Yathā aggi suriyo ca 2 samuddo paṭidissati
suppārakantaṁ pucchāma samuddo katamo ayaṁ.

[1591] Bharukacchā payātānaṁ vāṇijānaṁ dhanesinaṁ
nāvāya vippanaṭṭhāya aggimālīti vuccati.

[1592] Yathā dadhi ca khīrañca samuddo paṭidissati
suppārakantaṁ pucchāma samuddo katamo ayaṁ.

[1593] Bharukacchā payātānaṁ vāṇijānaṁ dhanesinaṁ
nāvāya vippanaṭṭhāya dadhimālīti vuccati.

[1594] Yathā kuso ca sasso ca samuddo paṭidissati
suppārakantaṁ pucchāma samuddo katamo ayaṁ.

[1595] Bharukacchā payātānaṁ vāṇijānaṁ dhanesinaṁ
nāvāya vippanaṭṭhāya kusamālīti vuccati.

[1596] Yathā naḷo ca veḷu ca samuddo paṭidissati
suppārakantaṁ pucchāma samuddo katamo ayaṁ.