[1567] Daharā ca hi ye vuḍḍhā ye bālā ye ca paṇḍitā
addhā ceva daliddā ca sabbe maccuparāyanā.

[1568] Phalānamiva pakkānaṁ niccaṁ patanato bhayaṁ
evaṁ jātāna maccānaṁ niccaṁ maraṇato bhayaṁ.

[1569] Sāyameke na dissanti pāto diṭṭhā bahū janā
pāto eke na dissanti sāyaṁ diṭṭhā bahū janā.

[1570] Paridevayamāno ce kiñcidatthaṁ udabbahe
sammuḷho hiṁsamattānaṁ kayirā taṁ vicakkhaṇo.

[1571] Kīso vivaṇṇo bhavati hiṁsamattānamattano
na tena petā pālenti niratthā paridevanā.

[1572] Yathā saraṇamādittaṁ vārināva nibbāpaye 2
evampi dhīro sutavā medhāvī paṇḍito naro
khippamuppatitaṁ sokaṁ vāto tūlaṁva dhaṁsaye.
1 Ma. nipāletuṁ. 2 Ma. vārinā parinibbaye.

[1573] Ekova macco acceti ekova jāyate kule
saṁyogaparamātveva sambhogā sabbapāṇinaṁ.

[1574] Tasmā hi dhīrassa bahussutassa
sampassato lokamimaṁ parañca
aññāya dhammaṁ hadayaṁ manañca
sokā mahantāpi na tāpayanti.

[1575] Sohaṁ yasañca bhogañca bhariyāpi 1 ca ñātake
sesaṁ sampālayissāmi 2 kiccametaṁ 3 vijānato.

[1576] Dasavassasahassāni saṭṭhivassasatāni ca
kambugīvo mahābāhu rāmo rajjamakārayīti.
Dasarathajātakaṁ sattamaṁ.
---------
8 Saṁvarajātakaṁ