[1547] Dhiratthusu bahukāme 1 duggandhe bahukaṇṭake
ye ahaṁ paṭisevanto nālabhiṁ tādisaṁ sukhaṁ.

[1548] Mahassādā sukhā kāmā natthi kāmā paraṁ sukhaṁ
ye kāme paṭisevanti saggante upapajjare.

[1549] Appassādā dukhā kāmā natthi kāmā paraṁ dukkhaṁ
ye kāme paṭisevanti nirayante upapajjare.

[1550] Asi yathā sunisito nettisova 2 supāyiko
sattīva urasī khittā kāmā dukkhatarā tato.

[1551] Aṅgārānaṁva jalitaṁ kāsuṁ sādhikaporisaṁ
phālaṁva divasantattaṁ kāmā dukkhatarā tato.

[1552] Visaṁ yathā halāhalaṁ telaṁ pakkuṭṭhitaṁ 3 yathā
tambalohaṁ vilīnaṁva kāmā dukkhatarā tatoti.
Pānīyajātakaṁ pañcamaṁ.
---------
6 Yudhañjayajātakaṁ 4

[1553] Mittāmaccaparibyuḷhaṁ ahaṁ vande rathesabha
pabbajissāmahaṁ rāja 5 taṁ devo anumaññatu.

[1554] Sace te ūnaṁ kāmehi ahaṁ paripūrayāmi te
yo taṁ hiṁsati vāremi mā pabbajja yudhañjaya 6 .
1 Ma. dhiratthu subahū kāme. 2 Ma. nettiṁ sova. 3 Sī. Yu. ukkaṭṭhitaṁ.
4 Ma. yudhañcayajātakaṁ. 5 Sī. Yu. pabbajissaṁ mahārāja. 6 Ma. pabbaja
yudhañcaya. Yu. pabbaji yuvañjaya. evamuparipi.

[1555] Na matthi ūnaṁ kāmehi hiṁsanto me na vijjati 1
dīpañca kattumicchāmi yaṁ jarā nābhikīrati.

[1556] Putto vā pitaraṁ yāce pitā vā puttamorasaṁ
negamo yācate 2 tāta mā pabbajja yudhañjaya.