[1487] Na vāhamete 1 icchāmi ye sasā paṭhaviṁsitā
candato sasamicchāmi tamme ohara kesava.

[1488] So nūna madhuraṁ ñāti jīvitaṁ vijahissasi
apatthayaṁ yo patthayasi candato sasamicchasi.

[1489] Evañce kaṇha jānāsi yadaññamanusāsasi
kasmā pure mataṁ puttaṁ ajjāpi anusocasi.

[1490] Yaṁ na labbhā manussena amanussena vā puna
jāto me mā marī putto kuto labbhā alabbhiyaṁ.
Na mantā mūlabhesajjā osadhehi dhanena vā
sakkā ānayituṁ kaṇha yaṁ petamanusocasi.

[1491] Yassa etādisā assu amaccā purisapaṇḍitā
yathā nijjhāpaye ajja ghato purisapaṇḍito.
Ādittaṁ vata maṁ santaṁ ghatasittaṁva pāvakaṁ
vārinā viya osiñci sabbaṁ nibbāpaye daraṁ.
1 Sī. cāhametaṁ. Ma. na cāhamete. Yu. vāhametaṁ.
Abbuhi vata me sallaṁ yamāsi hadayassitaṁ
yo me sokaparetassa puttasokaṁ apānudi.
Sohaṁ abbūḷhasallosmi vītasoko anāvilo
na socāmi na rodāmi tava sutvāna māṇava.

[1492] Evaṁ karonti sappaññā ye honti anukampakā
nivattayanti sokamhā ghato jeṭṭhaṁva bhātaranti.
Ghatapaṇḍitajātakaṁ soḷasamaṁ.
----------
Tassuddānaṁ
daḷha kaṇha dhanañjaya saṅkhavaro
rājā sattāha sasākha 1 takkalinā
dhammaṁ kukkuṭa kuṇḍali bhojanadā
cakkavāka subhūri sasotthi ghato.
Dasakanipātaṁ niṭṭhitaṁ.
---------
1 Ma. raja sattaha kassa ca.
Ekādasanipātajātakaṁ
1 mātuposakajātakaṁ

[1493] Tassa nāgassa vippavāsena
virūḷhā sallakiyo ca kuṭajā 1
kuruvindakaravarā bhisasāmā 2 ca
nivāte pupphitā ca kaṇṇikārā 3 .

[1494] Kocideva suvaṇṇakāyurā
nāgarājaṁ bharanti piṇḍena
yattha rājā rājakumāro vā
kavacamabhihessati asambhito 4 .

[1495] Gaṇhāhi nāga kabalaṁ mā nāga kisako bhava
bahūni rājakiccāni tāni 5 nāga karissasi.

[1496] Sā nūna sā kapaṇikā andhā aparināyikā 6
khāṇuṁ pādena ghaṭṭeti giriṁ caṇḍoraṇaṁ pati.