[1467] Na paṇḍitā attasukhassa hetu
pāpāni kammāni samācaranti
dukkhena phuṭṭhā khalitāpi santā
chandā ca dosā na jahanti dhammaṁ.

[1468] Yenakenaci vaṇṇena mudunā dāruṇena vā
uddhare dīnamattānaṁ pacchā dhammaṁ samācare.

[1469] Yassa rukkhassa chāyāya nisīdeyya sayeyya vā
na tassa sākhaṁ bhañjeyya mittadubbho hi pāpako.

[1470] Yassāpi 1 dhammaṁ puriso 2 vijaññā
ye cassa kaṅkhaṁ vinayanti santo
1 Sī. yassa hi. 2 Sī. manujo.
Taṁ hissa dīpañca parāyanañca
na tena mettiṁ jirayetha 1 pañño.

[1471] Alaso gihī kāmabhogī na sādhu
asaññato pabbajito na sādhu
rājā na sādhu anisammakārī
yo paṇḍito kodhano taṁ na sādhu.

[1472] Nisamma khattiyo kayirā nānisamma disampati
nisammakārino rāja yaso kittī ca vaḍḍhatīti.
Bhūripañhājātakaṁ cuddasamaṁ.
-----------
15 Mahāmaṅgalajātakaṁ

[1473] Kiṁsu naro jappamadhicca kāle
kaṁ vā vijjaṁ katamaṁ vā sutānaṁ
so macco asmiṁ ca paramhi loke
kathaṁkaro sotthānena gutto.

[1474] Yassa devā pitaro ca sabbe
siriṁsapā 2 sabbabhūtāni cāpi
mettāya niccaṁ apacitāni honti
bhūtesu ve sotthānaṁ tadāhu.

[1475] Yo sabbalokassa nivātavutti
1 Ma. jarayetha. 2 Ma. sarīsapā.
Itthīpumānaṁ sahadārakānaṁ
khantā duruttānaṁ appaṭikūlavādī
adhivāsanaṁ sotthānaṁ tadāhu.

[1476] Yo nāvajānāti sahāyamitte 1
sippena kulyābhi dhanena jaccā
rucipañño atthakāle 2 matīmā 3
sahāyesu ve sotthānaṁ tadāhu.