[1427] Mittavasenidhekacce 4 sākhalyena acetasā
vividhehi upāyanti tādisampi na vissase.

[1428] Āmisaṁ vā dhanaṁ vāpi yattha passati tādiso
dubbhiṁ karoti dummedho tañca hantvāna gacchati.

[1429] Mittarūpena bahavo channā sevanti sattavo
jahe kāpurise hete kukkuṭo viya senakaṁ.

[1430] Yo ca uppatitaṁ atthaṁ khippameva na bujjhati
amittavasamanveti pacchāva anutappati.

[1431] Yo ca uppatitaṁ atthaṁ khippameva nibodhati
muccate sattusambādhā kukkuṭo viya senakā.

[1432] Taṁ tādisaṁ kūṭamivoḍḍitaṁ vane
adhammikaṁ niccavidhaṁsakārinaṁ
ārā vivajjeyya naro vicakkhaṇo
senaṁ yathā kukkuṭo vaṁsakānaneti.
Kukkuṭajātakaṁ dasamaṁ.
--------
1 Ma. kammamokkantaṁ. 2 Ma. athetaṁ. 3 Ma. ca nāsmase. evamuparipi.
4 mittarūpe idhekaccetipi pāṭho. Sī. Ma. mittarūpenidhekacce.
11 Maṭṭhakuṇḍalijātakaṁ

[1433] Alaṅkato maṭṭhakuṇḍalī
māladhārī 1 haricandanussado
bāhā paggayha kandasi
vanamajjhe kiṁ dukkhito tuvaṁ.

[1434] Sovaṇṇamayo pabhassaro
uppanno rathapañjaro mama
tassa cakkayugaṁ na vindāmi
tena dukkhena jahāmi jīvitaṁ.

[1435] Sovaṇṇamayaṁ maṇimayaṁ
lohamayaṁ atha rūpiyamayaṁ 2
pāvada rathaṁ karissāmi te
cakkayugaṁ paṭilābhayāmi 3 taṁ.

[1436] Atha 4 māṇavo tassa pāvadi
candimasuriyā ubhayattha 5 bhātaro
sovaṇṇamayo ratho mama
tena cakkayugena sobhati.