[1337] Snehasaṅganthitā 4 ganthā senti manomayā puthū
te bhusaṁ upatāpenti tasmā snehaṁ na rocaye.

[1338] Etasmiṁ te sulapite paṭirūpe subhāsite
varaṁ brāhmaṇa te dammi yaṅkiñci manasicchasi.

[1339] Varañce me ado sakka sabbabhūtānamissara
araññe me viharato niccaṁ ekavihārino
ābādhā na 5 uppajjeyyuṁ antarāyakarā bhusā.

[1340] Etasmiṁ te sulapite paṭirūpe subhāsite
varaṁ brāhmaṇa te dammi yaṅkiñci manasicchasi.

[1341] Varañce me ado sakka sabbabhūtānamissara
na mano vā sarīraṁ vā maṅkute 6 sakka kassaci
1 Ma. tvaṁ. 2 sampassasītipi. 3 Sī. Yu. paṭhamā. 4 Ma. saṅgathitā.
5 Ma. mā. 6 Ma. maṁ kate.
Kadāci upahaññetha etaṁ sakka varaṁ vareti.
Kaṇhajātakaṁ dutiyaṁ.
--------
3 Catuposathajātakaṁ

[1342] Yo kopaneyye na karoti kopaṁ
na kujjhati sappuriso kadāci
kuddhopi so nāvikaroti kopaṁ
taṁ ve naraṁ samaṇamāhu loke.

[1343] Onodaro yo sahate jighacchaṁ
danto tapassī mitapānabhojano
āhārahetu na karoti pāpaṁ
taṁ ve naraṁ samaṇamāhu loke.

[1344] Khiḍḍaṁ ratiṁ vippajahitvāna sabbaṁ
na cālikaṁ bhāsati kiñci loke
vibhūsanaṭṭhānā virato methunasmā
taṁ ve naraṁ samaṇamāhu loke.

[1345] Pariggahaṁ lobhadhammañca sabbaṁ
yo ve pariññāya pariccajeti
dantaṁ ṭhitattaṁ amamaṁ nirāsaṁ
taṁ ve naraṁ samaṇamāhu loke.

[1346] Pucchāma kattāramanomapañña 1
kathāsu no viggaho atthi jāto
chindajja kaṅkhaṁ vicikicchitāni
tadajja kaṅkhaṁ vitaremu sabbe.