[1277] Na aṇṇave santi phalāni dhaṅka
maṁsaṁ kuto khādituṁ cakkavāke
sevālabhakkhamha apāṇabhojanā
(na ghāsahetupi karoma pāpaṁ)
abhītarūpā vicarāma aṇṇave 2 .

[1278] Na me idaṁ ruccati cakkavāke 3
asmiṁ bhave bhojanasannikāso
ahosi pubbe tato me aññathā
icceva me vimati ettha jātā.

[1279] Ahampi maṁsāni phalāni bhuñje
annāni ca loṇikatelikāni
rasaṁ manussesu labhāmi bhottuṁ
sūrova saṅgāmamukhaṁ vijetvā
na ca me tādiso vaṇṇo cakkavāka yathā tava.

[1280] Asuddhabhakkhosi khaṇānupātī
kicchena te labbhati annapānaṁ
na tussasi rukkhaphalehi dhaṅka
maṁsāni vā yāni susānamajjhe.

[1281] Yo sāhasena adhigamma bhoge
1 Ma. anapparūpā. 2 Ma. ime pāṭhā natthi. 3 Ma. cakkāvāka.
Paribhuñjati dhaṅka khaṇānupātī
tato upakkosati naṁ sabhāvo
upakkuṭṭho vaṇṇabalaṁ jahāti.

[1282] Appampi ce nibbutiṁ bhuñjati yadi
asāhasena aparūpaghātī
balañca vaṇṇo ca tadassa hoti
na hi sabbo āhāramayena vaṇṇoti.
Cakkavākajātakaṁ aṭṭhamaṁ.
--------
9 Haliddarāgajātakaṁ

[1283] Sutitikkhaṁ araññamhi pantamhi sayanāsane
ye ca gāme titikkhanti te uḷāratarā tayā.

[1284] Araññā gāmamāgamma kiṁsīlaṁ kiṁvataṁ ahaṁ
purisaṁ tāta seveyyaṁ taṁ me akkhāhi pucchito.

[1285] Yo taṁ 1 vissāsaye tāta vissāsañca khameyya te
sussūsī ca titikkhī ca taṁ bhajehi ito gato.

[1286] Yassa kāyena vācāya manasā natthi dukkaṭaṁ
urasīva patiṭṭhāya taṁ bhajehi ito gato.