[1267] Dhiratthu taṁ yasalābhaṁ dhanalābhañca brāhmaṇa
yā vutti vinipātena adhammacaraṇena vā.

[1268] Api ce pattamādāya anāgāro paribbaje
sāyeva jīvikā seyyo yā cādhammena esanā.

[1269] Api ce pattamādāya anāgāro paribbaje
aññaṁ ahiṁsayaṁ loke api rajjena taṁ varaṁ.

[1270] Balaṁ cando balaṁ suriyo balaṁ samaṇabrāhmaṇā
balaṁ velā samuddassa balātibalamitthiyo.

[1271] Yathā uggatapaṁ santaṁ isiṁ lomasakassapaṁ
pitu atthāya candavatī vājapeyyaṁ ayājayi.

[1272] Taṁ lobhapakataṁ kammaṁ kaṭukaṁ kāmahetukaṁ
1 Ma. seyya.
Tassa mūlaṁ gavesissaṁ chejjaṁ rāgaṁ sabandhanaṁ.

[1273] Dhiratthu kāme subahūpi loke
tapova seyyo kāmaguṇehi rāja
tapo karissāmi pahāya kāme
taveva raṭṭhaṁ candavatī ca hotūti.
Lomasakassapajātakaṁ sattamaṁ.
----------
8 Cakkavākajātakaṁ

[1274] Kāsāyavatthe sakuṇe vadāmi
duve duve nandamane 1 carante
kaṁ aṇḍajaṁ aṇḍajamānusesu
jātiṁ pasaṁsanti tadiṅgha brūtha.

[1275] Amhe manussesu manussahiṁsa
anubbate cakkavāke vadanti
kalyāṇabhāvamhe dijesu sammatā
(abhītarūpā 2 vicarāma aṇṇave)
na ghāsahetupi karoma pāpaṁ 3 .

[1276] Kiṁ aṇṇave kāni phalāni bhuñje
maṁsaṁ kuto khādatha cakkavākā
kiṁ bhojanaṁ bhuñjatha vo anomā
1 Sī. Yu. nandimane. 2 Ma. abhirūpā. 3 Ma. ime pāṭhā natthi.
Balañca vaṇṇo ca anapparūpo 1 .