[1257] Yattha vījāni rūhanti sattā yattha patiṭṭhitā
sā me sīsaṁ nipīḷeti jātaṁ saraṇato bhayaṁ.

[1258] Yena bhattāni paccanti sītaṁ yena vihaññati
so maṁ ḍahati gattāni jātaṁ saraṇato bhayaṁ.

[1259] Yena bhattena 1 yāpenti puthū brāhmaṇakhattiyā
so maṁ bhutto byāpādi jātaṁ saraṇato bhayaṁ.

[1260] Gimhānaṁ pacchime māse vātamicchanti paṇḍitā
so maṁ bhañjati gattāni jātaṁ saraṇato bhayaṁ.

[1261] Yaṁ nissitā jagatiruhaṁ (vihaṅgamā) svāyaṁ aggiṁ pamuñcati
disā bhajatha vaṅkaṅgā jātaṁ saraṇato bhayaṁ.

[1262] Yamānayiṁ somanassaṁ māliniṁ candanussadaṁ
sā maṁ gharā nīharati 2 jātaṁ saraṇato bhayaṁ.

[1263] Yena jātena nandissaṁ yassa ca bhavamicchisaṁ
so maṁ gharā nīharati 2 jātaṁ saraṇato bhayaṁ.

[1264] Suṇantu me jānapadā negamā ca samāgatā
yatodakaṁ tadādittaṁ yato khemaṁ tato bhayaṁ
1 Ma. bhuttena. 2 Sī. Ma. nicchubhati.
Rājā vilumpate raṭṭhaṁ brāhmaṇo ca purohito
attaguttā viharatha jātaṁ saraṇato bhayanti.
Padakusalamāṇavajātakaṁ chaṭṭhaṁ.
----------
7 Lomasakassapajātakaṁ

[1265] Assa indasamo rāja accantaṁ ajarāmaro
sace tvaṁ yaññaṁ yajeyya isiṁ lomasakassapaṁ.

[1266] Sasamuddapariyāyaṁ mahiṁ sāgarakuṇḍalaṁ
na icche saha nindāya evaṁ seyha 1 vijānahi.