[1237] Phalassa upabhuñjimhā nekavassagaṇe bahū
aphalampi viditvāna sāva mitti 3 yathā pure.

[1238] Sukkhañca rukkhakoḷāpaṁ opattamaphalaṁ dumaṁ
ohāya sakuṇā yanti kiṁ dosaṁ maññase 4 dija.
1 Sī. Ma. suvassa ca varaṁ datvā. evamuparipi. 2 Ma. haripattā. 3 Ma. metti.
4 Ma. passase.

[1239] Ye phalatthā sambhajanti aphaloti jahanti naṁ
attatthapaññā dummedhā te honti pakkhapātino.

[1240] Sādhu pakkhi kataṁ hoti mitti 1 saṁsati santhavo
sacetaṁ dhamma rocesi pāsaṁsosi vijānataṁ.

[1241] So te suva varaṁ dammi pattayāna vihaṅgama
varaṁ varassu vaṅkaṅga yaṅkiñci manasicchasi.

[1242] Api nāma naṁ puna passe 2 sapattaṁ saphalaṁ dumaṁ
daliddova nidhiṁ laddhā nandeyyāhaṁ punappunaṁ.

[1243] Tato amatamādāya abhisiñci mahīruhaṁ
tassa sākhā virūhiṁsu sītacchāyā manoramā.

[1244] Evaṁ sakka sukhī hohi saha sabbehi ñātibhi
yathāhamajja sukhito disvāna saphalaṁ dumaṁ.

[1245] Suvassa vacanaṁ sutvā katvāna saphalaṁ dumaṁ
pakkāmi saha bhariyāya devānaṁ nandanaṁ vananti.
Cullasuvakarājajātakaṁ catutthaṁ.
-----------
5 Haritacajātakaṁ

[1246] Sutametaṁ mahābrahme kāme bhuñjati hārito
kaccetaṁ vacanaṁ tucchaṁ kacci suddho irīyasi.