[1227] Cara cārikaṁ lohitatuṇḍa mā mari
kiṁ tvaṁ suva sukkhadumamhi jhāyasi
tadiṅgha [1]- brūhi vassantasannibha
kasmā suva sukkhadumaṁ na riñcasi.

[1228] Ye ve sakhīnaṁ sakhāro bhavanti
pāṇāccaye sukhadukkhesu haṁsa
khīṇaṁ akhīṇanti na taṁ jahanti
santo sataṁ dhammamanussarantā.

[1229] Sohaṁ sataṁ aññatarosmi haṁsa
ñātī ca me hoti sakhā ca rukkho
taṁ nussahe jīvikattho pahātuṁ
khīṇanti ñatvāna na esa dhammo.

[1230] Sādhu pakkhi 2 kataṁ hoti metti saṁsati santhavo
sacetaṁ dhammaṁ rocesi pāsaṁsosi vijānataṁ.

[1231] So te suva varaṁ dammi pattayāna vihaṅgama
varaṁ varassu vaṅkaṅga yaṅkiñci manasicchasi.

[1232] Varañca me haṁsa tuvaṁ dadeyya
ayañca rukkho punarāyuṁ labhetha
1 Ma. maṁ. 2 Sī. Ma. sakkhi.
So sākhavā phalimā saṁvirūḷho
madhutthiko tiṭṭhatu sobhamāno.

[1233] Taṁ passa samma phalimaṁ uḷāraṁ
sahāva te hotu udumbarena
so sākhavā phalimā saṁvirūḷho
madhutthiko tiṭṭhatu sobhamāno.

[1234] Evaṁ sakka sukhī hohi saha sabbehi ñātibhi
yathāhamajja sukhito disvāna saphalaṁ dumaṁ.

[1235] Suvassa vacanaṁ sutvā 1 katvāna saphalaṁ dumaṁ
pakkāmi saha bhariyāya devānaṁ nandanaṁ vananti.
Mahāsuvarājajātakaṁ tatiyaṁ.
-----------
4 Cullasuvakarājajātakaṁ

[1236] Santi rukkhā haritapattā 2 dumānekaphalā bahū
kasmā nu sukkhe koḷāpe suvassa nirato mano.