[1187] Addhā hi dānaṁ bahudhā pasatthaṁ
dānā ca kho dhammapadaṁva seyyo
pubbeva hi pubbatareva santo
nibbānamevajjhagamuṁ sapaññāti.
Ādittajātakaṁ aṭṭhamaṁ.
--------
9 Aṭṭhānajātakaṁ

[1188] Gaṅgā kumudinī santā saṅkhavaṇṇā ca kokilā
jambu tālaphalaṁ dajjā atha nūna tadā siyā.

[1189] Yadā kacchapalomānaṁ pāvāro tividho siyā
hemantikaṁ pāpuraṇaṁ 1 atha nūna tadā siyā.

[1190] Yadā makasapādānaṁ 2 aṭṭālo sukato siyā
daḷho ca avikampī 3 ca atha nūna tadā siyā.

[1191] Yadā sasavisāṇānaṁ nisseṇi sukatā siyā
saggassārohaṇatthāya atha nūna tadā siyā.

[1192] Yadā nissenimāruyha candaṁ khādeyyu mūsikā
rāhuñca paribāheyyuṁ 4 atha nūna tadā siyā.

[1193] Yadā surāghaṭaṁ pitvā makkhikā gaṇacārinī
1 Ma. pāvuraṇaṁ. 2 Sī. Yu. makasadāṭhānaṁ. 3 Sī. Yu. akampica.
4 Sī. paripādeyyuṁ. Ma. paripāteyyuṁ.
Aṅgāre vāsaṁ kappeyyuṁ atha nūna tadā siyā.

[1194] Yadā bimboṭṭhasampanno gadrabho sumukho siyā
kusalo naccagītassa atha nūna tadā siyā.

[1195] Yadā kākā ulūkā ca mantayeyyuṁ rahogatā
aññamaññaṁ pihayeyyuṁ atha nūna tadā siyā.

[1196] Yadā mūlāsapattānaṁ 1 chattaṁ thirataraṁ siyā
vassassa paṭighātāya atha nūna tadā siyā.