[1037] Anantadassī bhagavāhamasmi
jātijjaraṁ sokamupātivatto
kiṁ me purāṇaṁ vatasīlavattaṁ
ācikkha metaṁ yamahaṁ vijaññaṁ.

[1038] Yaṁ tvaṁ apāyesi bahū manusse
pipāsite ghammani samparete
tante purāṇaṁ vatasīlavattaṁ
suttappabuddhova anussarāmi.

[1039] Yaṁ eṇikūlasmiṁ janataṁ gahītaṁ
amocayī gayhaka nīyamānaṁ
tante purāṇaṁ vatasīlavattaṁ
suttappabuddhova anussarāmi.

[1040] Gaṅgāya sotasmiṁ gahītanāvaṁ
1 Ma. brahmapatti. 2 Ma. appaṁ hi etaṁ. 3 Ma. sahassāni. Sī. Yu. sahassānaṁ.
Luddena nāgena manussakappā
amocayī tvaṁ balasā pasayha
tante purāṇaṁ vatasīlavattaṁ
suttappabuddhova anussarāmi.

[1041] Kappo ca te patthacaro ahosiṁ 1
sambuddhivantaṁ vatitaṁ 2 amaññaṁ
tante purāṇaṁ vatasīlavattaṁ
suttappabuddhova anussarāmi.

[1042] Addhā pajānāsi mametamāyuṁ
aññaṁpi jānāsi tathāhi buddho
tathāhi tāyaṁ jalitānubhāvo
obhāsayaṁ tiṭṭhati brahmalokanti.
Bakabrahmajātakaṁ dasamaṁ.
Kukkuvaggo paṭhamo.
---------
Tassuddānaṁ
varakaṇṇika cāpavaro sutano
atha gijjha sarohitamacchavaro
puna dasaṇṇaka 3 senaka yācanako
atha verī sabrahmabakena dasa.
1 Ma. baddhacaro ahosi. 2 Ma. sambuddhimantaṁ vatinaṁ. 3 Ma. paṇṇaka.
2 Gandhāravaggo
1 gandhārajātakaṁ

[1043] Hitvā gāmasahassāni paripuṇṇāni soḷasa
koṭṭhāgārāni phītāni sannidhindāni kubbasi.

[1044] Hitvā gandhāravisayaṁ pahūtadhanapāniyaṁ 1
pasāsanito 2 nikkhanto idhadāni pasāsasi.

[1045] Dhammaṁ bhaṇāmi vedeha adhammo me na ruccati
dhammaṁ me bhaṇamānassa na pāpamupalimpati.

[1046] Yenakenaci vaṇṇena paro labhati ruppanaṁ
mahatthiyampi ce vācaṁ na taṁ bhāseyya paṇḍito.