[1017] Ādāya daṇḍaṁ parisumbha bhastaṁ
passelamūgaṁ uragaṁ dujivhaṁ
chindajja kaṅkhaṁ vicikicchitāni
bhujaṅgamaṁ passa pamuñca bhastaṁ.
1 Ma. atibhoti. 2 Sī. Ma. sattubhastajātakaṁ. 3 Ma. tadiṅgha.

[1018] Saṁviggarūpo parisāya majjhe
so brāhmaṇo sattubhastaṁ pamuñci
atha nikkhami urago uggatejo
āsīviso sappo phaṇaṁ karitvā.

[1019] Suladdhalābhā janakassa rañño
yo passati senakaṁ sādhupaññaṁ
vivaṭṭacchado 1 nusi sabbadassī
ñāṇaṁ nu te brāhmaṇa bhiṁsarūpaṁ
imāni me sattasatāni atthi
gaṇhāhi sabbāni dadāmi tuyhaṁ
tayā hi me jīvitamajja laddhaṁ
athopi bhariyāyamakāsi sotthiṁ.

[1020] Na paṇḍitā vettanamādiyanti
citrāhi gāthāhi subhāsitāhi
itopi te brāhmaṇa dadantu vittaṁ
ādāya tvaṁ gaccha sakaṁ niketanti.
Senakajātakaṁ sattamaṁ.
---------
1 Ma. vivaṭṭachaddo. Sī. vivattacchaddo. Yu. vivattacchaddā.
8 Aṭṭhisenajātakaṁ 1

[1021] Yeme ahaṁ na jānāmi aṭṭhisena vanibbake
te maṁ saṅgamma yācanti kasmā maṁ tvaṁ na yācasi.

[1022] Yācako appiyo hoti yācaṁ adadamappiyo
tasmāhantaṁ na yācāmi mā me viddessanā ahu.

[1023] Yo ca 2 yācanajīvāno kāle yācaṁ na yācati
parañca puññaṁ 3 dhaṁseti attanāpi na jīvati.

[1024] Yo ca yācanajīvāno kāle yācaṁpi 4 yācati
parañca puññaṁ labbheti attanāpi ca jīvati.

[1025] Na ve dussanti 5 sappaññā disvā yācakamāgate
brahmacārī piyo mesi vara bhaññitamicchasi 6 .

[1026] Na ve yācanti sappaññā dhīro ca viditumarahati
uddissa ariyā tiṭṭhanti esā ariyāna yācanā.