[1057] Ambāhamaddaṁ vanamantarasmiṁ
nīlobhāsaṁ phalitaṁ 1 saṁvirūḷhaṁ
tamaddasaṁ phalahetu vibhaggaṁ
taṁ disvā bhikkhācariyaṁ carāmi.

[1058] Selaṁ sumaṭṭhaṁ naravīraniṭṭhitaṁ
nārī yugaṁ dhārayi appasaddaṁ
dutiyañca āgamma ahosi saddo
taṁ disvā bhikkhācariyaṁ carāmi.

[1059] Dijā dijaṁ kuṇapamāharantaṁ
ekaṁ samānaṁ bahukā samecca
āhārahetu paripātayiṁsu
taṁ disvā bhikkhācariyaṁ carāmi.

[1060] Usabhāhamaddaṁ yūthassa majjhe
valakkakuṁ 2 vaṇṇabalūpapannaṁ
tamaddasaṁ kāmahetu vitunnaṁ
taṁ disvā bhikkhācariyaṁ carāmi.

[1061] Karaṇḍako 3 kaliṅgānaṁ gandhārānañca naggaji
nimirājā videhānaṁ pañcālānañca dummukho
ete raṭṭhāni hitvāna pabbajiṁsu akiñcanā.
1 Ma. phalinaṁ. 2 Ma. calakkakuṁ. 3 Sī. Yu. karaṇḍu nāma.

[1062] Sabbepime devasamā samāgatā
aggi yathā pajjalito tathevime
ahaṁpi eko carissāmi bhaggavi
hitvāna kāmāni yathodhikāni.

[1063] Ayameva kālo na hi añño atthi
anusāsito me na bhaveyya pacchā 1
ahampi ekā carissāmi bhaggava
sakuṇīva muttā purisassa hatthā.

[1064] Āmaṁ pakkañca jānanti atho loṇaṁ aloṇakaṁ
tamahaṁ disvāna pabbajiṁ careva tvaṁ carāmahanti.
Kumbhakārajātakaṁ tatiyaṁ.
---------
4 Daḷhadhammajātakaṁ

[1065] Ahañca 2 daḷhadhammassa 3 vahantī nābhirādhayiṁ
nudantī 4 urasi sallaṁ yuddhe vikkantacārinī.

[1066] Nūna 5 rājā na jānāti mama vikkamaporisaṁ
saṅgāme sukatantāni dūtavippahitāni ca.