[967] Sacepimaṁ pihayasi massukuttiṁ sukāritaṁ
kārayissāmi te samma maṇiṁ cāpi dadāmi te.

[968] Tvaññeva maṇinā channo sukatāya ca massuyā
āmanta kho taṁ gacchāmi piyaṁ me tava dassananti.
Maṇijātakaṁ dasamaṁ.
Khuraputtavaggo 1 dutiyo.
---------
Tassuddānaṁ
atha passa sasūci ca tuṇḍilako
miga mayhakapañcamapakkhivaro
atha pañjali vārija majjha puna
atha vaṭṭaka kapoṭavarena dasa.
--------
Tatra vagguddānaṁ bhavati.
Atha vaggaṁ pakittissaṁ chanipātaṁ varuttame
āvāriyā ca sūci 2 ca dve ca vuttā subyañjanā.
Chakkanipātaṁ niṭṭhitaṁ.
--------
1 Sī. senakavaggo. Ma. kharaputtavaggo. 2 Ma. avāriyā ca kharo ca. Sī. senakā.
Sattakanipātajātakaṁ
1 kukkuvaggo
1 kukkujātakaṁ

[969] Diyaḍḍhakukkū udayena kaṇṇikā
vidatthiyo aṭṭha parikkhipanti naṁ
sā sīsapā 1 sāramayā apheggukā
kuhiṁ ṭhitā uparito 2 na dhaṁsati.

[970] Yā tiṁsati sāramayā apheggukā 3
parikiriya gopāṇasiyo samaṭṭhitā 4
tāhi susaṅgahitā 5 balasā ca 6 pīḷitā
samaṭṭhitā 4 uparito 2 na dhaṁsati.

[971] Evampi mittehi daḷhehi paṇḍito
abhejjarūpehi sucīhi mantibhi
susaṅgahīto siriyā na dhaṁsati
gopānasībhāravahāva kaṇṇikā.

[972] Kharattacaṁ bellaṁ yathāpi satthavā
anāmasantopi karoti tittakaṁ
samāharaṁ sādhukaroti patthavā 7
asādhukayirā 8 tanubandhamuddharaṁ 9 .
1 Ma. sā siṁsapā. Sī. Yu. sasiṁsapā. 2 Ma. upparito. 3 Ma. anujjukā.
4 Ma. samaṁ ṭhitā. 5 Sī. tā saṅgahitā .... 6 Ma. casaddo natthi.
7 Ma. sāduṁ karoti patthiva. 8 Ma. asāduṁ kayirā. 9 Sī. Yu. tanuvaṭṭamudadharaṁ.

[973] Evampi gāmanigamesu paṇḍito
asāhasaṁ rāja dhanāni saṅgharaṁ
dhammānuvattī paṭipajjamāno
phātiṁ 1 kayirā aviheṭhayaṁ paraṁ

[974] Odātamūlaṁ sucivārisambhavaṁ
jātaṁ yathā pokkharaṇīsu ambujaṁ
padumaṁ yathā agginibhāsiphālimaṁ 2
na kaddamo na rajo na vāri limpati.

[975] Evampi vohārasuciṁ asāhasaṁ
visuddhakammantamapetapāpakaṁ
na limpati kammakilesa tādiso
jātaṁ yathā pokkharaṇīsu ambujanti.
Kukkujātakaṁ paṭhamaṁ.
--------
2 Manojajātakaṁ

[976] Yathā cāpo ninnamati jiyā cāpi nikujjati 3
haññate nūna manojo migarājā sakhā mama.