[837] Mā tāta kujjhi na hi sādhu kodho
bahumpi te adiṭṭhaṁ assutañca
mātāpitā disā 1 tāta setaketu
ācariyamāhu disataṁ pasatthā.

[838] Agārino annapānavatthadā 2
avhāyikā tampi disaṁ vadanti
esā disā paramā setaketu
yaṁ patvā dukkhī sukhino bhavanti.

[839] Kharājinā jaṭilā paṅkadantā
dumukkharūpā 3 yeme japanti mante
kacci nu te mānusake payoge
idaṁ vidū parimuttā apāyā.

[840] Pāpāni kammāni karitvā 4 rāja
bahussuto neva 5 careyya dhammaṁ
sahassavedopi na taṁ paṭicca
dukkhā pamuñce caraṇaṁ apatvā.

[841] Sahassavedopi na taṁ paṭicca
dukkhā pamuñce caraṇaṁ apatvā
1 Ma. disatā. Yu. disā tā. 2 Ma. annadapānavatthadā. 3 Ma. dummakkharūpā.
Yu. dummukkharūpa. 4 Ma. karitvāna. 5 Ma. na.
Maññāmi vedā aphalā bhavanti
sasaṁyamaṁ caraṇaññeva 1 saccaṁ.

[842] Na heva vedā aphalā bhavanti
sasaṁyamaṁ caraṇaññeva 1 saccaṁ
kittiñca 2 pappoti adhicca vede
santiṁ puṇeti 3 caraṇena dantoti.
Setaketujātakaṁ dutiyaṁ.
---------
3 Darīmukhajātakaṁ

[843] Paṅko ca kāmā palipo ca kāmā
bhayañca metaṁ timūlaṁ pavuttaṁ
rajo ca dhūmo ca mayā pakāsitā
hitvā tuvaṁ pabbaja brahmadatta.

[844] Gadhito 4 ca ratto ca adhimucchito ca
kāmesvāhaṁ 5 brāhmaṇa bhiṁsarūpaṁ
taṁ nussahe jīvikattho pahātuṁ
kāhāmi puññāni anappakāni.

[845] Yo atthakāmassa hitānukampino
ovajjamāno na karoti sāsanaṁ
idameva seyyo iti maññamāno
1 Ma. caraṇameva. 2 Ma. kittiṁ hi. 3 Sī. Yu. santaṁ puneti.
4 Sī. gathito. 5 Ma. kāmesvahaṁ.
Punappunaṁ gabbhamupeti mando.

[846] So ghorarūpaṁ nirayaṁ upeti
subhāsubhaṁ muttakarīsapūraṁ
sattā sakāye na jahanti giddhā
ye honti kāmesu avītarāgā.