[160] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena aññataro 1
purāṇarājorodho 2 bhikkhunīsu pabbajito 3 hoti. Aññatarā bhikkhunī
anabhiratiyā pīḷitā yena sā bhikkhunī tenupasaṅkami upasaṅkamitvā
taṁ bhikkhuniṁ etadavoca rājā kho ayye tumhe cirāciraṁ gacchati
kathaṁ tumhe dhārethāti. Jatumaṭṭhakena ayyeti. Kiṁ etaṁ ayye
jatumaṭṭhakanti. Athakho sā bhikkhunī tassā bhikkhuniyā jatumaṭṭhakaṁ
ācikkhi. Athakho sā bhikkhunī jatumaṭṭhakaṁ ādiyitvā dhovituṁ
vissaritvā ekamantaṁ chaḍḍesi. Bhikkhuniyo makkhikāhi samparikiṇṇaṁ
passitvā evamāhaṁsu kassidaṁ kammanti. Sā evamāha mayhidaṁ
kammanti. Yā tā bhikkhuniyo appicchā .pe. Tā ujjhāyanti
khīyanti vipācenti kathaṁ hi nāma bhikkhunī jatumaṭṭhakaṁ ādiyissatīti .pe.
Saccaṁ kira bhikkhave bhikkhunī jatumaṭṭhakaṁ ādiyatīti 4 . Saccaṁ bhagavāti.
1-2-3 Ma. Yu. itthīliṅge ākāranto yojiyati. 4 Ma. Yu. ādiyīti.
Vigarahi buddho bhagavā kathaṁ hi nāma bhikkhave bhikkhunī jatumaṭṭhakaṁ
ādiyissati netaṁ bhikkhave appasannānaṁ vā pasādāya .pe.
Evañca pana bhikkhave bhikkhuniyo imaṁ sikkhāpadaṁ uddisantu
jatumaṭṭhake pācittiyanti.

[161] Jatumaṭṭhakaṁ nāma jatumayaṁ kaṭṭhamayaṁ piṭṭhamayaṁ mattikāmayaṁ. 1
Samphassaṁ sādiyantī antamaso uppalapattampi muttakaraṇaṁ paveseti
āpatti pācittiyassa.

[162] Anāpatti ābādhappaccayā ummattikāya ādikammikāyāti.
---------
Lasuṇavaggassa pañcamasikkhāpadaṁ

[163] Tena samayena buddho bhagavā sakkesu viharati
kapilavatthusmiṁ nigrodhārāme. Athakho mahāpajāpati 2 gotamī yena bhagavā
tenupasaṅkami upasaṅkamitvā bhagavantaṁ abhivādetvā adhovāte
aṭṭhāsi duggandho bhagavā mātugāmoti. Athakho bhagavā ādiyantu
kho bhikkhuniyo udakasuddhikanti mahāpajāpatiṁ gotamiṁ dhammiyā kathāya
sandassesi samādapesi samuttejesi sampahaṁsesi. Athakho mahāpajāpatī
gotamī bhagavatā dhammiyā kathāya sandassitā samādapitā samuttejitā
sampahaṁsitā bhagavantaṁ avivādetvā padakkhiṇaṁ katvā pakkāmi. Athakho
bhagavā etasmiṁ nidāne etasmiṁ pakaraṇe dhammiṁ kathaṁ katvā bhikkhū
1 Ma. Yu. ādiyeyyātīti dissati. 2 Ma. Yu. mahāpajāpatiiti likhitaṁ.
Āmantesi anujānāmi bhikkhave bhikkhunīnaṁ udakasuddhikanti.

[164] Tena kho pana samayena aññatarā bhikkhunī bhagavatā
udakasuddhikā anuññātāti atigambhīraṁ udakasuddhikaṁ ādiyantī
muttakaraṇe vaṇaṁ akāsi. Athakho sā bhikkhunī bhikkhunīnaṁ etamatthaṁ
ārocesi. Yā tā bhikkhuniyo appicchā .pe. Tā ujjhāyanti khīyanti
vipācenti kathaṁ hi nāma bhikkhunī atigambhīraṁ udakasuddhikaṁ
ādiyissatīti .pe. Saccaṁ kira bhikkhave bhikkhunī atigambhīraṁ udakasuddhikaṁ
ādiyatīti 1 . Saccaṁ bhagavāti. Vigarahi buddho bhagavā kathaṁ hi nāma
bhikkhave bhikkhunī atigambhīraṁ udakasuddhikaṁ ādiyissati netaṁ bhikkhave
appasannānaṁ vā pasādāya .pe. Evañca pana bhikkhave bhikkhuniyo imaṁ
sikkhāpadaṁ uddisantu udakasuddhikaṁ pana bhikkhuniyā ādiyamānāya
dvaṅgulapabbaparamaṁ ādātabbaṁ taṁ atikkāmentiyā pācittiyanti.

[165] Udakasuddhikā nāma muttakaraṇassa dhovanā vuccati.
Ādiyamānāyāti dhovantiyā. Dvaṅgulapabbaparamaṁ ādātabbanti dvīsu
aṅgulīsu 2 dvepabbaparamā ādātabbā. Taṁ atikkāmentiyāti
samphassaṁ sādiyantī antamaso kesaggamattaṁpi atikkāmeti āpatti
pācittiyassa.

[166] Atirekadvaṅgulapabbe atirekasaññā ādiyati āpatti
pācittiyassa. Atirekadvaṅgulapabbe vematikā ādiyati āpatti
1 Ma. Yu. ādiyīti. 2 Ma. Yu. aṅgulesu.
Pācittiyassa. Atirekadvaṅgulapabbe ūnakasaññā ādiyati āpatti
pācittiyassa. Ūnakadvaṅgulapabbe atirekasaññā āpatti
dukkaṭassa. Ūnakadvaṅgulapabbe vematikā āpatti dukkaṭassa.
Ūnakadvaṅgulapabbe ūnakasaññā anāpatti.

[167] Anāpatti dvaṅgulapabbaparamaṁ ādiyati ūnakadvaṅgulapabbaparamaṁ
ādiyati ābādhappaccayā ummattikāya ādikammikāyāti.
-------
Lasuṇavaggassa chaṭṭhasikkhāpadaṁ

[168] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena ārohanto
nāma mahāmatto bhikkhūsu pabbajito hoti. Tassa purāṇadutiyikā
bhikkhunīsu pabbajitā hoti. Tena kho pana samayena so bhikkhu tassā
bhikkhuniyā santike bhattavissaggaṁ karoti. Athakho sā bhikkhunī
tassa bhikkhuno bhuñjantassa pānīyena ca vidhūpanena ca upatiṭṭhitvā
gehasitakathaṁ katheti accāvadati. Athakho so bhikkhu taṁ bhikkhuniṁ
apasādeti mā bhagini evarūpaṁ akāsi netaṁ kappatīti. Pubbe
maṁ tvaṁ evañca evañca karosi idāni ettakaṁ na sahasīti
pānīyathālakaṁ matthake āsumbhitvā vidhūpanena pahāraṁ adāsi. Yā
tā bhikkhuniyo appicchā .pe. Tā ujjhāyanti khīyanti vipācenti
Kathaṁ hi nāma bhikkhunī bhikkhussa pahāraṁ dassatīti .pe. Saccaṁ kira
bhikkhave bhikkhunī bhikkhussa pahāraṁ detīti 1 . Saccaṁ bhagavāti. Vigarahi
buddho bhagavā kathaṁ hi nāma bhikkhave bhikkhunī bhikkhussa pahāraṁ
dassati netaṁ bhikkhave appasannānaṁ vā pasādāya .pe. Evañca
pana bhikkhave bhikkhuniyo imaṁ sikkhāpadaṁ uddisantu yā pana
bhikkhunī bhikkhussa bhuñjantassa pānīyena vā vidhūpanena vā
upatiṭṭheyya pācittiyanti.

[169] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Bhikkhussāti upasampannassa.
Bhuñjantassāti pañcannaṁ bhojanānaṁ aññataraṁ bhojanaṁ
bhuñjantassa. Pānīyaṁ nāma yaṅkiñci pānīyaṁ. Vidhūpanaṁ nāma
yā kāci vījanī. Upatiṭṭheyyāti hatthapāse tiṭṭhati āpatti
pācittiyassa.