[150] Athakho bhagavā thullanandaṁ bhikkhuniṁ anekapariyāyena
vigarahitvā .pe. Evañca pana bhikkhave bhikkhuniyo imaṁ sikkhāpadaṁ
uddisantu yā pana bhikkhunī lasuṇaṁ khādeyya pācittiyanti.

[151] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Lasuṇaṁ nāma māgadhikaṁ 1 vuccati.
Khādissāmīti paṭiggaṇhāti āpatti dukkaṭassa ajjhohāre
ajjhohāre āpatti pācittiyassa.

[152] Lasuṇe lasuṇasaññā khādati āpatti pācittiyassa.
Lasuṇe vematikā khādati āpatti pācittiyassa. Lasuṇe alasuṇasaññā
khādati āpatti pācittiyassa. Alasuṇe lasuṇasaññā
khādati āpatti dukkaṭassa. Alasuṇe vematikā khādati āpatti
dukkaṭassa. Alasuṇe alasuṇasaññā khādati anāpatti.

[153] Anāpatti palaṇḍuke bhañjanake harītake cāpalasuṇe
sūpasaṁpāke maṁsasaṁpāke telasaṁpāke sāḷave uttaribhaṅge ummattikāya
ādikammikāyāti.
---------
1 Ma. Yu. māgadhakanti dissati.
Lasuṇavaggassa dutiyasikkhāpadaṁ

[154] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhuniyo sambādhe lomaṁ saṁharāpetvā aciravatiyā nadiyā vesiyāhi
saddhiṁ naggā ekatitthe nahāyanti. Vesiyā ujjhāyanti khīyanti
vipācenti kathaṁ hi nāma bhikkhuniyo sambādhe lomaṁ saṁharāpessanti
seyyathāpi gihiniyo kāmabhoginiyoti. Assosuṁ kho bhikkhuniyo tāsaṁ
vesiyānaṁ ujjhāyantīnaṁ khīyantīnaṁ vipācentīnaṁ. Yā tā bhikkhuniyo
appicchā .pe. Tā ujjhāyanti khīyanti vipācenti kathaṁ hi nāma
chabbaggiyā bhikkhuniyo sambādhe lomaṁ saṁharāpessantīti .pe. Saccaṁ
kira bhikkhave chabbaggiyā bhikkhuniyo sambādhe lomaṁ saṁharāpentīti.
Saccaṁ bhagavāti. Vigarahi buddho bhagavā kathaṁ hi nāma bhikkhave
chabbaggiyā bhikkhuniyo sambādhe lomaṁ saṁharāpessanti netaṁ bhikkhave
appasannānaṁ vā pasādāya .pe. Evañca pana bhikkhave bhikkhuniyo
imaṁ sikkhāpadaṁ uddisantu yā pana bhikkhunī sambādhe lomaṁ saṁharāpeyya
pācittiyanti.

[155] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Sambādho nāma ubho
upakacchakā muttakaraṇaṁ. Saṁharāpeyyāti ekampi lomaṁ saṁharāpeti
Āpatti pācittiyassa. Bahukepi lome saṁharāpeti āpatti
pācittiyassa.

[156] Anāpatti ābādhappaccayā ummattikāya ādikammikāyāti.
--------
Lasuṇavaggassa tatiyasikkhāpadaṁ

[157] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena dve bhikkhuniyo
anabhiratiyā pīḷitā ovarakaṁ pavisitvā talaghātakaṁ karonti.
Bhikkhuniyo tena saddena upadhāvitvā tā bhikkhuniyo etadavocuṁ
kissa tumhe ayye purisena saddhiṁ padussathāti 1 . Na mayaṁ ayye
purisena saddhiṁ padussāmāti 2 . Bhikkhunīnaṁ etamatthaṁ ārocesuṁ. Yā
tā bhikkhuniyo appicchā .pe. Tā ujjhāyanti khīyanti vipācenti
kathaṁ hi nāma bhikkhuniyo talaghātakaṁ karissantīti .pe. Saccaṁ kira
bhikkhave bhikkhuniyo talaghātakaṁ karontīti. Saccaṁ bhagavāti. Vigarahi
buddho bhagavā kathaṁ hi nāma bhikkhave bhikkhuniyo talaghātakaṁ
karissanti netaṁ bhikkhave appasannānaṁ vā pasādāya .pe.
Evañca pana bhikkhave bhikkhuniyo imaṁ sikkhāpadaṁ uddisantu
talaghātake pācittiyanti.
1 Ma. Yu. sampadussathāti. 2 sampadussāmāti.

[158] Talaghātakaṁ nāma samphassaṁ sādiyantī antamaso uppalapattenapi
muttakaraṇe pahāraṁ deti āpatti pācittiyassa.

[159] Anāpatti ābādhappaccayā ummattikāya ādikammikāyāti.
--------
Lasuṇavaggassa catutthasikkhāpadaṁ