[130] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena aññatarassa
pūgassa pariveṇavāsikā bhikkhuniyo yāguyā kilamanti. Athakho so
pūgo bhikkhunīnaṁ yāguatthāya chandakaṁ saṅgharitvā aññatarassa āpaṇikassa
ghare parikkhāraṁ nikkhipitvā bhikkhuniyo upasaṅkamitvā etadavoca
amukassa ayye āpaṇikassa ghare yāguatthāya parikkhāro nikkhitto
tato taṇḍule āharāpetvā yāguṁ pacāpetvā paribhuñjathāti.
Bhikkhuniyo tena ca parikkhārena sayaṁpi yācitvā bhesajjaṁ cetāpetvā
paribhuñjiṁsu. [1]- So pūgo jānitvā ujjhāyati khīyati vipāceti kathaṁ
1 Yu. etthantare athakhoti dissati.
Hi nāma bhikkhuniyo aññadatthikena parikkhārena aññuddisikena
mahājanikena saññācikena aññaṁ cetāpessantīti. Assosuṁ kho
bhikkhuniyo tassa pūgassa ujjhāyantassa khīyantassa vipācentassa.
Yā tā bhikkhuniyo appicchā .pe. Tā ujjhāyanti khīyanti vipācenti
kathaṁ hi nāma bhikkhuniyo aññadatthikena parikkhārena aññuddisikena
mahājanikena saññācikena aññaṁ cetāpessantīti .pe. Saccaṁ kira
bhikkhave bhikkhuniyo aññadatthikena parikkhārena aññuddisikena mahājanikena
saññācikena aññaṁ cetāpentīti. Saccaṁ bhagavāti.
Vigarahi buddho bhagavā kathaṁ hi nāma bhikkhave bhikkhuniyo aññadatthikena
parikkhārena aññuddisikena mahājanikena saññācikena aññaṁ
cetāpessanti netaṁ bhikkhave appasannānaṁ vā pasādāya .pe. Evañca
pana bhikkhave bhikkhuniyo imaṁ sikkhāpadaṁ uddisantu yā pana bhikkhunī
aññadatthikena parikkhārena aññuddisikena mahājanikena saññācikena
aññaṁ cetāpeyya nissaggiyaṁ pācittiyanti.

[131] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Aññadatthikena parikkhārena
aññuddisikenāti aññassatthāya dinnena. Mahājanikenāti
gaṇassatthāya [1]- na saṅghassa na ekabhikkhuniyā. Saññācikenāti sayaṁ
yācitvā. Aññaṁ cetāpeyyāti yaṁ atthāya dinnaṁ taṁ ṭhapetvā
aññaṁ cetāpeti payoge dukkaṭaṁ paṭilābhena nissaggiyaṁ hoti
1 Ma. Yu. gaṇassa.
Nissajjitabbaṁ saṅghassa vā gaṇassa vā ekabhikkhuniyā vā. Evañca pana
bhikkhave nissajjitabbaṁ .pe. Idaṁ me ayye aññadatthikena parikkhārena
aññuddisikena mahājanikena saññācikena aññaṁ cetāpitaṁ
nissaggiyaṁ imāhaṁ saṅghassa nissajjāmīti .pe. Dadeyyāti .pe.
Dadeyyunti .pe. Ayyāya dammīti.

[132] Aññadatthike aññadatthikasaññā aññaṁ cetāpeti
nissaggiyaṁ pācittiyaṁ. Aññadatthike vematikā aññaṁ cetāpeti
nissaggiyaṁ pācittiyaṁ. Aññadatthike anaññadatthikasaññā aññaṁ
cetāpeti nissaggiyaṁ pācittiyaṁ. Nissaṭṭhaṁ paṭilabhitvā yathādāne
upanetabbaṁ. Anaññadatthike aññadatthikasaññā āpatti
dukkaṭassa anaññadatthike vematikā āpatti dukkaṭassa. Anaññadatthike
anaññadatthikasaññā anāpatti.

[133] Anāpatti sesakaṁ upaneti sāmike apaloketvā upaneti
āpadāsu ummattikāya ādikammikāyāti.
----------
Pattavaggassa dasamasikkhāpadaṁ

[134] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena thullanandā
bhikkhunī bahussutā hoti bhāṇikā visāradā paṭṭhā dhammiṁ kathaṁ kātuṁ.
Bahū manussā thullanandaṁ bhikkhuniṁ payirūpāsanti. Tena kho pana
Samayena thullanandāya bhikkhuniyā pariveṇaṁ udrīyati. Manussā
thullanandaṁ bhikkhuniṁ etadavocuṁ kissidaṁ te 1 ayye pariveṇaṁ udrīyatīti.
Natthāvuso dāyakā natthi kārakāti. Athakho te manussā thullanandāya
bhikkhuniyā pariveṇatthāya chandakaṁ saṅgharitvā thullanandāya bhikkhuniyā
parikkhāraṁ adaṁsu. Thullanandā bhikkhunī tena ca parikkhārena sayaṁpi
yācitvā bhesajjaṁ cetāpetvā paribhuñji. Manussā jānitvā
ujjhāyanti khīyanti vipācenti kathaṁ hi nāma ayyā thullanandā aññadatthikena
parikkhārena aññuddisikena puggalikena saññācikena aññaṁ
cetāpessatīti .pe. Saccaṁ kira bhikkhave thullanandā bhikkhunī aññadatthikena
parikkhārena aññuddisikena puggalikena saññācikena aññaṁ
cetāpetīti. Saccaṁ bhagavāti. Vigarahi buddho bhagavā kathaṁ hi
nāma bhikkhave thullanandā bhikkhunī aññadatthikena parikkhārena aññuddisikena
puggalikena saññācikena aññaṁ cetāpessati netaṁ bhikkhave
appasannānaṁ vā pasādāya .pe. Evañca pana bhikkhave bhikkhuniyo
imaṁ sikkhāpadaṁ uddisantu yā pana bhikkhunī aññadatthikena parikkhārena
aññuddisikena puggalikena saññācikena aññaṁ cetāpeyya
nissaggiyaṁ pācittiyanti.

[135] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Aññadatthikena parikkhārena
1 Ma. Yu. vo.
Aññuddisikenāti aññassatthāya dinnena. Puggalikenāti 1 ekabhikkhuniyā
atthāya na saṅghassa na gaṇassa. Saññācikenāti sayaṁ yācitvā.
Aññaṁ cetāpeyyāti yaṁ atthāya dinnaṁ taṁ ṭhapetvā aññaṁ
cetāpeti payoge dukkaṭaṁ paṭilābhena nissaggiyaṁ hoti
nissajjitabbaṁ saṅghassa vā gaṇassa vā ekabhikkhuniyā vā. Evañca pana
bhikkhave nissajjitabbaṁ .pe. Idaṁ me ayye aññadatthikena
parikkhārena aññuddisikena puggalikena saññācikena aññaṁ cetāpitaṁ
nissaggiyaṁ imāhaṁ saṅghassa nissajjāmīti .pe. Dadeyyāti .pe.
Dadeyyunti .pe. Ayyāya dammīti.

[136] Aññadatthike aññadatthikasaññā aññaṁ cetāpeti
nissaggiyaṁ pācittiyaṁ. Aññadatthike vematikā aññaṁ cetāpeti
nissaggiyaṁ pācittiyaṁ. Aññadatthike anaññadatthikasaññā aññaṁ
cetāpeti nissaggiyaṁ pācittiyaṁ. Nissaṭṭhaṁ paṭilabhitvā yathādāne
upanetabbaṁ. Anaññadatthike aññadatthikasaññā āpatti
dukkaṭassa. Anaññadatthike vematikā āpatti dukkaṭassa. Anaññadatthike
anaññadatthikasaññā anāpatti.

[137] Anāpatti sesakaṁ upaneti sāmike apaloketvā upaneti
āpadāsu ummattikāya ādikammikāyāti.
----------
1 Ma. Yu. ekāya bhikkhuniyā na saṅghassāti dissati.
Cīvaravaggassa paṭhamasikkhāpadaṁ

[138] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena thullanandā
bhikkhunī bahussutā hoti bhāṇikā visāradā paṭṭhā dhammiṁ kathaṁ kātuṁ.
Athakho rājā pasenadi kosalo sītakāle mahagghaṁ kambalaṁ pārupitvā
yena thullanandā bhikkhunī tenupasaṅkami upasaṅkamitvā thullanandaṁ
bhikkhuniṁ abhivādetvā ekamantaṁ nisīdi. Ekamantaṁ nisinnaṁ kho
rājānaṁ pasenadiṁ kosalaṁ thullanandā bhikkhunī dhammiyā kathāya sandassesi
samādapesi samuttejesi sampahaṁsesi. Athakho rājā pasenadi kosalo
thullanandāya bhikkhuniyā dhammiyā kathāya sandassito samādapito
samuttejito sampahaṁsito thullanandaṁ bhikkhuniṁ etadavoca vadeyyāsi
ayye yena atthoti. Sace me tvaṁ mahārāja dātukāmosi
imaṁ kambalaṁ dehīti. Athakho rājā pasenadi kosalo thullanandāya
bhikkhuniyā kambalaṁ datvā uṭṭhāyāsanā thullanandaṁ bhikkhuniṁ abhivādetvā
padakkhiṇaṁ katvā pakkāmi. Manussā ujjhāyanti khīyanti vipācenti
mahicchā imā bhikkhuniyo asantuṭṭhā kathaṁ hi nāma rājānaṁ kambalaṁ
viññāpessantīti. Assosuṁ kho bhikkhuniyo tesaṁ manussānaṁ
ujjhāyantānaṁ khīyantānaṁ vipācentānaṁ. Yā tā bhikkhuniyo appicchā
.pe. Tā ujjhāyanti khīyanti vipācenti kathaṁ hi nāma ayyā
Thullanandā 1 rājānaṁ kambalaṁ viññāpessatīti .pe. Saccaṁ kira
bhikkhave thullanandā bhikkhunī rājānaṁ kambalaṁ viññāpetīti 2 . Saccaṁ
bhagavāti. Vigarahi buddho bhagavā kathaṁ hi nāma bhikkhave thullanandā
bhikkhunī rājānaṁ kambalaṁ viññāpessati netaṁ bhikkhave appasannānaṁ
vā pasādāya .pe. Evañca pana bhikkhave bhikkhuniyo imaṁ
sikkhāpadaṁ uddisantu garupāpuraṇaṁ 3 pana bhikkhuniyā cetāpentiyā
catukkaṁsaparamaṁ cetāpetabbaṁ tato ce uttariṁ 4 cetāpeyya
nissaggiyaṁ pācittiyanti.

[139] Garupāpuraṇaṁ nāma yaṅkiñci sītakāle pāpuraṇaṁ 5 .
Cetāpentiyāti viññāpentiyā. Catukkaṁsaparamaṁ cetāpetabbanti
soḷasakahāpaṇagghanakaṁ cetāpetabbaṁ. Tato ce uttariṁ cetāpeyyāti
taduttariṁ viññāpeti payoge dukkaṭaṁ paṭilābhena nissaggiyaṁ hoti
nissajjitabbaṁ saṅghassa vā gaṇassa vā ekabhikkhuniyā vā. Evañca
pana bhikkhave nissajjitabbaṁ idaṁ me ayye garupāpuraṇaṁ
atirekacatukkaṁsaparamaṁ cetāpitaṁ nissaggiyaṁ imāhaṁ saṅghassa nissajjāmīti
.pe. Dadeyyāti .pe. Dadeyyunti .pe. Ayyāya dammīti.