[120] Aññadatthike aññadatthikasaññā aññaṁ cetāpeti
nissaggiyaṁ pācittiyaṁ. Aññadatthike vematikā aññaṁ cetāpeti
nissaggiyaṁ pācittiyaṁ. Aññadatthike anaññadatthikasaññā aññaṁ
cetāpeti nissaggiyaṁ pācittiyaṁ. Nissaṭṭhaṁ paṭilabhitvā yathādāne
upanetabbaṁ. Anaññadatthike aññadatthikasaññā āpatti
dukkaṭassa. Anaññadatthike vematikā āpatti dukkaṭassa. Anaññadatthike
anaññadatthikasaññā anāpatti.
1 Ma. Yu. saṅghassāti dissati.

[121] Anāpatti sesakaṁ upaneti sāmike apaloketvā upaneti
āpadāsu ummattikāya ādikammikāyāti.
--------
Pattavaggassa sattamasikkhāpadaṁ

[122] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena upāsakā
bhikkhunīsaṅghassa cīvaratthāya chandakaṁ saṅgharitvā aññatarassa pāvārikassa
ghare parikkhāraṁ nikkhipitvā bhikkhuniyo upasaṅkamitvā etadavocuṁ
amukassa ayye pāvārikassa ghare cīvaratthāya parikkhāro
nikkhitto tato cīvaraṁ āharāpetvā bhājethāti. Bhikkhuniyo tena
ca parikkhārena sayaṁpi yācitvā bhesajjaṁ cetāpetvā paribhuñjiṁsu.
Upāsakā jānitvā ujjhāyanti khīyanti vipācenti kathaṁ hi nāma
bhikkhuniyo aññadatthikena parikkhārena aññuddisikena saṅghikena
saññācikena aññaṁ cetāpessantīti. Assosuṁ kho bhikkhuniyo
tesaṁ upāsakānaṁ ujjhāyantānaṁ khīyantānaṁ vipācentānaṁ. Yā tā
bhikkhuniyo appicchā .pe. Tā ujjhāyanti khīyanti vipācenti
kathaṁ hi nāma bhikkhuniyo aññadatthikena parikkhārena aññuddisikena
saṅghikena saññācikena aññaṁ cetāpessantīti .pe. Saccaṁ kira
bhikkhave bhikkhuniyo aññadatthikena parikkhārena aññuddisikena
saṅghikena saññācikena aññaṁ cetāpentīti. Saccaṁ bhagavāti.
Vigarahi buddho bhagavā kathaṁ hi nāma bhikkhave bhikkhuniyo aññadatthikena
parikkhārena aññuddisikena saṅghikena saññācikena aññaṁ
cetāpessanti netaṁ bhikkhave appasannānaṁ vā pasādāya .pe.
Evañca pana bhikkhave bhikkhuniyo imaṁ sikkhāpadaṁ uddisantu yā
pana bhikkhunī aññadatthikena parikkhārena aññuddisikena saṅghikena
saññācikena aññaṁ cetāpeyya nissaggiyaṁ pācittiyanti.

[123] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Aññadatthikena parikkhārena
aññuddisikenāti aññassatthāya dinnena. Saṅghikenāti
saṅghassatthāya na gaṇassa na ekabhikkhuniyā. Saññācikenāti sayaṁ
yācitvā. Aññaṁ cetāpeyyāti yaṁ atthāya dinnaṁ taṁ ṭhapetvā
aññaṁ cetāpeti payoge dukkaṭaṁ paṭilābhena nissaggiyaṁ hoti
nissajjitabbaṁ saṅghassa vā gaṇassa vā ekabhikkhuniyā vā. Evañca
pana bhikkhave nissajjitabbaṁ .pe. Idaṁ me ayye aññadatthikena
parikkhārena aññuddisikena saṅghikena saññācikena aññaṁ cetāpitaṁ
nissaggiyaṁ imāhaṁ saṅghassa nissajjāmīti .pe. Dadeyyāti .pe.
Dadeyyunti .pe. Ayyāya dammīti.

[124] Aññadatthike aññadatthikasaññā aññaṁ cetāpeti
nissaggiyaṁ pācittiyaṁ. Aññadatthike vematikā aññaṁ cetāpeti
nissaggiyaṁ pācittiyaṁ. Aññadatthike anaññadatthikasaññā aññaṁ
Cetāpeti nissaggiyaṁ pācittiyaṁ. Nissaṭṭhaṁ paṭilabhitvā yathādāne
upanetabbaṁ. Anaññadatthike aññadatthikasaññā āpatti
dukkaṭassa. Anaññasadatthike vematikā āpatti dukkaṭassa.
Anaññadatthike anaññadatthikasaññā anāpatti.

[125] Anāpatti sesakaṁ upaneti sāmike apaloketvā
upaneti āpadāsu ummattikāya ādikammikāyāti.
----------
Pattavaggassa aṭṭhamasikkhāpadaṁ

[126] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena aññatarassa
pūgassa pariveṇavāsikā bhikkhuniyo yāguyā kilamanti. Athakho so
pūgo bhikkhunīnaṁ yāguatthāya chandakaṁ saṅgharitvā aññatarassa
āpaṇikassa ghare parikkhāraṁ nikkhipitvā bhikkhuniyo upasaṅkamitvā
etadavoca amukassa ayye āpaṇikassa ghare yāguatthāya parikkhāro
nikkhitto tato taṇḍule 1 āharāpetvā yāguṁ pacāpetvā
paribhuñjathāti. Bhikkhuniyo tena parikkhārena bhesajjaṁ cetāpetvā
paribhuñjiṁsu. [2]- So pūgo jānitvā ujjhāyati khīyati vipāceti
kathaṁ hi nāma bhikkhuniyo aññadatthikena parikkhārena aññuddisikena
mahājanikena aññaṁ cetāpessantīti. Assosuṁ kho bhikkhuniyo tassa
upāsakassa ujjhāyantassa khīyantassa vipācentassa. Yā tā bhikkhuniyo
1 Ma. Yu. taṇḍulaṁ. 2 Ma. Yu. etthantare atha khoti dissati.
Appicchā .pe. Tā ujjhāyanti khīyanti vipācenti kathaṁ hi
nāma bhikkhuniyo aññadatthikena parikkhārena aññuddisikena mahājanikena
aññaṁ cetāpessantīti .pe. Saccaṁ kira bhikkhave bhikkhuniyo
aññadatthikena parikkhārena aññuddisikena mahājanikena aññaṁ
cetāpentīti. Saccaṁ bhagavāti. Vigarahi buddho bhagavā kathaṁ hi
nāma bhikkhave bhikkhuniyo aññadatthikena parikkhārena aññuddisikena
mahājanikena aññaṁ cetāpessanti netaṁ bhikkhave appasannānaṁ vā
pasādāya .pe. Evañca pana bhikkhave bhikkhuniyo imaṁ sikkhāpadaṁ
uddisantu yā pana bhikkhunī aññadatthikena parikkhārena aññuddisikena
mahājanikena aññaṁ cetāpeyya nissaggiyaṁ pācittiyanti.

[127] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Aññadatthikena parikkhārena
aññuddisikenāti aññassatthāya dinnena. Mahājanikenāti
gaṇassatthāya [1]- na saṅghassa na ekabhikkhuniyā. Aññaṁ cetāpeyyāti
yaṁ atthāya dinnaṁ taṁ ṭhapetvā aññaṁ cetāpeti payoge
dukkaṭaṁ paṭilābhena nissaggiyaṁ hoti nissajjitabbaṁ saṅghassa vā gaṇassa
vā ekabhikkhuniyā vā. Evañca pana bhikkhave nissajjitabbaṁ
.pe. Idaṁ me ayye aññadatthikena parikkhārena aññuddisikena
mahājanikena aññaṁ cetāpitaṁ nissaggiyaṁ imāhaṁ saṅghassa nissajjāmīti
.pe. Dadeyyāti .pe. Dadeyyunti .pe. Ayyāya dammīti.
1 Ma. Yu. gaṇassa.

[128] Aññadatthike aññadatthikasaññā aññaṁ cetāpeti
nissaggiyaṁ pācittiyaṁ. Aññadatthike vematikā aññaṁ cetāpeti
nissaggiyaṁ pācittiyaṁ. Aññadatthike anaññadatthikasaññā aññaṁ
cetāpeti nissaggiyaṁ pācittiyaṁ. Nissaṭṭhaṁ paṭilabhitvā yathādāne
upanetabbaṁ. Anaññadatthike aññadatthikasaññā āpatti
dukkaṭassa. Anaññadatthike vematikā āpatti dukkaṭassa.
Anaññadatthike anaññadatthikasaññā anāpatti.

[129] Anāpatti sesakaṁ upaneti sāmike apaloketvā upaneti
āpadāsu ummattikāya ādikammikāyāti.
----------
Pattavaggassa navamasikkhāpadaṁ